Myeelwe
31 Jehova wakaambuula aaMozesi kati: 2 “Bape chisubulo maMidiyani akaambo kazintu nzibakachitila ma-Israyeli. Kuzwa waawo, ulazikkwa mbuli mbubakazikkwa masianyookulu.”*
3 Nkinkaako, Mozesi wakaambuula aabantu kati: “Amusale baalumi aakati kanu kuti balibambile kuyoolwana maMidiyani akuti beete chisubulo chaJehova kumaMidiyani. 4 Amutume baalumi bali 1 000 kuzwa kumusyobo umwi awumwi wama-Israyeli kuti baye kunkondo.” 5 Kuzwa kuzyuulu zyama-Israyeli, kwakasalwa baalumi bali 1 000 kumusyobo umwi awumwi, baalumi bali 12 000 bakalibambilide kuya kunkondo.
6 Mpawo Mozesi wakatuma baalumi bali 1 000 kuzwa kumusyobo umwi awumwi kuti baye kunkondo aamwi a-Eliyezari mupayizi, ooyo wakajisi zibelesyo zisalala amyeembo yankondo. 7 Bakalwana maMidiyani mbuli Jehova mbaakalayilila Mozesi alubo bakajaya baalumi boonse. 8 Bamwi bakajayigwa mbaami bali musanu bakuMidiyani nkukwaamba Evi, Rekkemu, Zuri, Huri aRebba. Mukuyungizya, bakajaya Bbalamu mwana waBbewori apanga. 9 Pesi ma-Israyeli bakatola banakazi abana bamaMidiyani kubuzike alubo bakabanyanga zivuubwa zyabo zyoonse azintu zyoonse nzibakalaazyo. 10 Mukuyungizya, myuunzi yabo yoonse njibakali kukkala amakkeempu aabo woonse bakaatenta aamulilo.* 11 Bakabweza zintu zyabo zyoonse, nkukwaamba bantu azivuubwa. 12 Bakatola bazike azintu nzibakabanyanga kuli Mozesi akuli Eliyezari mupayizi akumbungano yoonse yama-Israyeli kukkeempu, kumabuwa aakuMowabbu aafwiifwi aMulonga waJodani kuJerikko.
13 Mpawo Mozesi a-Eliyezari mupayizi abasilutwe boonse bambungano, bakazwa kuti bakaswaanane aambabo aanze aakkeempu. 14 Pesi Mozesi wakabanyemena loko baalumi bakasalidwe kuzulwida basikulwana, basilutwe bazyuulu abasilutwe bamyaanda bakali kusika kabazwa kunkondo. 15 Mozesi wakati kulimbabo: “Nkamboonzi nimwasiya banakazi boonse kabali bawumi? 16 Mbimbabo bakatobela jwi lyaBbalamu kwiinda mukweena ma-Israyeli kuti batasyomeki kuli Jehova kumakani aakuPeyori, zyakuti mbungano yoonse yaJehova yakasikilwa penzi. 17 Mweelede kujaya bana balombe boonse abanakazi boonse bakoona aabaalumi. 18 Pesi basimbi boonse batanawona aamwaalumi mutabajayi pe. 19 Mweelede kukkala aanze aakkeempu kwamazuba aali musanu aabili. Muntu woonse wakajaya muntu, amuntu woonse wakaguma muntu wakajayigwa, weelede kulisalazya mubuzuba bwachitatu amubuzuba bwamusanu aabili, nkukwaamba ndinywe abazike banu. 20 Mweelede kusalazya zigogo zyoonse, zintu zyoonse zyachikumba, zintu zyoonse zipangidwe aaboya bwampongo azintu zyoonse zipangidwe aachisamu.”
21 Mpawo Eliyezari mupayizi wakabuzya masooja aakayinkide kuyoolwana kunkondo kuti: “Ngoyu mulawu Jehova ngwaakalayilila Mozesi, 22 ‘Ngolida, nsiliva, kkopa, nsimbi, tiini ansimbi ndemu, 23 zintu zyoonse zikonzya kwiinzigwa mumulilo, mweelede kuzyiinzya mumulilo mpawo zilasalala. Nikuba oobo, zyeelede kusalazigwa aamaanzi aakusalazya. Chintu choonse chitakonzyi kwiinzigwa mumulilo, mweelede kuchisalazya aamaanzi. 24 Alubo mweelede kuwacha zigogo zyanu mubuzuba bwamusanu aabili, musalale, kuzwa waawo, mulakonzya kunjila mukkeempu.”
25 Mpawo Jehova wakati kuli Mozesi: 26 “Bala zintu zyakanyangwa kunkondo. Ubale bantu azivuubwa. Zibale kulaamwi a-Eliyezari mupayizi abasilutwe bamaanda aamawisi aambungano. 27 Zintu zyakanyangwa uzipambule zibe zipanzi zibili zitaabanisigwe aakati kamasooja aakayinka kunkondo ambungano yoonse. 28 Weelede kubbadala mutelo kuli Jehova kuzwa kubaalumi bakaya kunkondo, muntu uumwi aakati kabantu bali 500, ubweze ng’ombe iimwi aakati kazili 500, donki limwi aakati kamadonki aali 500, mbelele iimwi aakati kazili 500. 29 Mweelede kuzibweza kuzwa kuchipanzi chabo muzipe Eliyezari mupayizi kazili chipo kuli Jehova. 30 Kuchipanzi chipegwa ma-Israyeli, weelede kubweza muntu uumwi aakati kabantu bali 50, ng’ombe iimwi aakati kazili 50, donki limwi aakati kamadonki aali 50, mbelele iimwi aakati kazili 50 amunyama uumwi aakati kamisyobo yoonse yabanyama bavubwa mpawo uzipe maLevi babeleka milimu yaatente lyaJehova lyakukombela.”
31 Nkinkaako, Mozesi a-Eliyezari bakachita mbuli Jehova mbaakalayilila Mozesi. 32 Zintu zyoonse zyakanyangwa, nkukwaamba zintu zyoonse nzibakazaazyo bantu bakayinkide kunkondo zyakali mbelele zili 675 000, 33 ng’ombe zili 72 000 34 amadonki aali 61 000. 35 Banakazi bakatalinawona aabaalumi bakali 32 000. 36 Chipanzi chabaabo bakayinkide kukulwana, chakali mbelele zili 337 500. 37 Mutelo waJehova kuzwa kumbelele, wakali mbelele zili 675. 38 Kwakali ng’ombe zili 36 000 mpawo eezyo zyakapegwa kuti zibe mutelo waJehova zyakali 72. 39 Kwakali madonki aali 30 500 mpawo aakapegwa kuti abe mutelo waJehova akali 61. 40 Kwakali bantu bali 16 000 mpawo bakapegwa kuti babe mutelo waJehova bakali 32. 41 Mozesi wakapa mutelo ooyu kawuli chipo chaJehova kuli Eliyezari mupayizi mbuli Jehova mbaakalayilila Mozesi.
42 Kuchipanzi chama-Israyeli Mozesi nchaakapambwide kuzwa kuchaabilo chabaalumi bakayinkide kunkondo, 43 kwakali mbelele zili 337 500, 44 ng’ombe zili 36 000 45 amadonki aali 30 500 46 abantu bali 16 000. 47 Mpawo kuzwa kuchipanzi chama-Israyeli, Mozesi wakabweza muntu uumwi aakati kabantu bali 50 amunyama uumwi aakati kazivuubwa zili 50 wazipa maLevi bakali kubeleka milimu yaatente lyaJehova lyakukombela mbuli Jehova mbaakalayilila Mozesi.
48 Baalumi bakasalidwe bakali kuzulwida zyuulu zyamasooja, basilutwe bazyuulu abasilutwe bamyaanda bakayinka kuli Mozesi 49 mpawo bakati kulinguwe: “Tubabelesi bako twabala masooja ngituzulwida alubo taakwe nikuba uumwi aakati kesu wabulika. 50 Nkinkaako, zumizya umwi awumwi wesu kuti ape zintu nzyaakajana kazili chipo kuli Jehova, nkukwaamba: zintu zyangolida, tuncheni twamungo, tuntu twakuzwaata mumaboko, maring’i aali aachidindo, malangu-langu* atumwi tuntu twakulibotya kuchitila kuti milandu yesu imaninsigwe kunembo lyaJehova.”
51 Nkinkaako, Mozesi a-Eliyezari mupayizi bakatambula zintu zyangolida kuzwa kulimbabo, tuntu toonse twakulibotya. 52 Ngolida yoonse yakapegwa kuli Jehova yakazwa kuli basilutwe bazyuulu abasilutwe bamyaanda, yakali mashekeli* aali 16 750. 53 Musooja umwi awumwi wakali wabweza kale chaabilo chakwe kuzwa kuzintu zyakali zyanyangwa. 54 Mozesi a-Eliyezari mupayizi bakatambula ngolida kuzwa kuli basilutwe bazyuulu abasilutwe bamyaanda mpawo bakayiyeta kutente lyakuswaanganina kuti ibe chiyeekezyo kuma-Israyeli kunembo lyaJehova.