Myeelwe
34 Jehova wakayinkilila kunembo kwaambuula aaMozesi kati: 2 “Buzya ma-Israyeli malayilile aaya: ‘Mwaakunjila munyika yaKkenani, eeyi njinjiyo nyika njimutazoopegwe kayili lukono, nyika yaKkenani kweendelana amigaano yayo.
3 “‘Mugaano wakumusanza unootalikila munkanda yaZini iili kumbali aa-Edomu mpawo mugaano wakumusanza kubbazu lyakubuzwezuba uzoosaangunina kuLwizi lwaMunyo.* 4 Mugaano wanu uzooya kuli lumwi lubazu, wiinde kumusanza kwamatantilo aa-Akkirabbimu, wiinkilile kunembo kuya kuZini mpawo uzoomanina kumusanza kwaKkadeshi-bbaneya. Kuzwa waawo, uzooya kuHazari-adari usike ku-Azimoni. 5 Mugaano ooyo uzoozwa ku-Azimoni uye kuli lumwi lubazu kawutozya kuKalonga* ka-Ijipita mpawo uzoomanina kuLwizi.*
6 “‘Mugaano wanu wakububbila unooli kuLwizi Lupati* akunkomwe. Ooyu nguwo uunooli mugaano wanu wakububbila.
7 “‘Ooyu nguumugaano wanu wakubbazu lyakunyika: Kuzwa kuLwizi Lupati, mweelede kubikka mugaano wanu kusika kuChilundu chaHori. 8 Kuzwa kuChilundu chaHori, mweelede kubikka mugaano wanu kusika kuLebbo-Hamati* mpawo mugaano wanu uzoomanina kuZedadi. 9 Mugaano uzooyindilila uye kuZifironi kuumanina kuHazari-enani. Ooyu nguwo uunooli mugaano wanu wakubbazu lyakunyika.
10 “‘Kubbazu lyakubuzwezuba, mweelede kubikka mugaano wanu kuzwa kuHazari-enani kusika kuShefamu. 11 Mugaano wanu uzooyindilila kuzwa kuShefamu kuya kuRibbila kubbazu lyakubuzwezuba kwa-Ayini mpawo mugaano uzookunuka uzubuke munkunu waLwizi lwaKkinereti* uuli kubuzwezuba. 12 Mugaano uzooyindilila kuya kuJodani alubo uzoomanina kuLwizi lwaMunyo. Eeyi njiyo iinooli nyika yanu amigaano iiyizyungulukide.’”
13 Nkinkaako, Mozesi wakalayilila ma-Israyeli kati: “Eeyi njinjiyo nyika njimutaabane kayili lukono lwanu kwiinda mukuuma chisale* mbuli Jehova mbaakalayilila kuti mupe misyobo iili musanu ayine ahafu. 14 Nkaambo musyobo waRubbeni kweendelana amaanda aamawisi amusyobo waGadi kweendelana amaanda aamawisi ahafu yamusyobo waManase, babweza kale lukono lwabo. 15 Misyobo iibili ahafu yabweza kale lukono lwayo kubuzwezuba muchilawu chili mutala aaJodani, kumbali aaJerikko kubbazu lyakubuzwezuba.”
16 Jehova wakayinkilila kunembo kwaambuula aaMozesi kati: 17 “Aaya ngiimazina aabaalumi batazoowabanisye nyika njimutazookone: Eliyezari mupayizi aJoshuwa mwana waNuni. 18 Mweelede kubweza silutwe uumwi kuzwa kumusyobo umwi awumwi utaabanisye nyika kayili lukono lwanu. 19 Aaya ngiimazina aabaalumi aabo: kuzwa kumusyobo waJuda, Kkalebbu mwana waJefune, 20 kumusyobo wabana baSimiyoni, Shemuweli mwana wa-Amihudi, 21 kumusyobo waBbenjamini, Elidadi mwana waKkisiloni, 22 kumusyobo wabana baDani, silutwe Bbukki mwana waJogili, 23 kuzwa kubana baJosefa kumusyobo wabana baManase, silutwe Haniyeli mwana wa-Efodi, 24 kumusyobo wabana ba-Efremu, silutwe Kkemuweli mwana waShifutani, 25 kumusyobo wabana baZebbuloni, silutwe Elizafani mwana waPanakki, 26 kumusyobo wabana ba-Isakkara, silutwe Palatiyeli mwana wa-Azani, 27 kumusyobo wabana ba-Asha, silutwe Ahihudi mwana waShelomi, 28 kumusyobo wabana baNafutali, silutwe Pedaheli mwana wa-Amihudi.” 29 Aaba mbiibantu Jehova mbaakalayilila kuti baabanisye nyika kuma-Israyeli munyika yaKkenani.