Makani mabotu aakalembwa aaMateyo
1 Bbuku lyamakani aabuumi bwaJesu Kkristu,* mwana waDavida, mwana wa-Abbrahamu:
2 Abbrahamu wakazyala Izakka;
Izakka wakazyala Jakkobo;
Jakkobo wakazyala Juda abamwi bana balombe;
3 Juda wakazyala Perezi aZera kwiinda muli Tamari;
Perezi wakazyala Hezironi;
Hezironi wakazyala Ramu;
4 Ramu wakazyala Aminadabbu;
Aminadabbu wakazyala Nasoni;
Nasoni wakazyala Salimoni;
5 Salimoni wakazyala Bbowazi kwiinda muli Rahabbu;
Bbowazi wakazyala Obbedi kwiinda muli Rute;
Obbedi wakazyala Jese;
6 Jese wakazyala mwaami Davida;
Davida wakazyala Solomoni kwiinda mumwanakazi wa-Uriya;
7 Solomoni wakazyala Rehobbowamu;
Rehobbowamu wakazyala Abbija;
Abbija wakazyala Asa;
8 Asa wakazyala Jehoshafati;
Jehoshafati wakazyala Jehoramu;
Jehoramu wakazyala Uziya;
9 Uziya wakazyala Jotamu;
Jotamu wakazyala Ahazi;
Ahazi wakazyala Hezekkiya;
10 Hezekkiya wakazyala Manase;
Manase wakazyala Amoni;
Amoni wakazyala Josiya.
11 Josiya wakazyala Jekkoniya abamwi bana balombe kuchiindi chakutolwa kubuzike kuBbabbiloni.
12 Nibakali kubuzike kuBbabbiloni, Jekkoniya wakazyala Shelatiyeli;
Shelatiyeli wakazyala Zerubbabbeli;
13 Zerubbabbeli wakazyala Abbiyudi;
Abbiyudi wakazyala Eliyakkimu;
Eliyakkimu wakazyala Azori;
14 Azori wakazyala Zadokki;
Zadokki wakazyala Akkimu;
Akkimu wakazyala Eliyudi;
15 Eliyudi wakazyala Eliyezeri;
Eliyezeri wakazyala Matani;
Matani wakazyala Jakkobo;
16 Jakkobo wakazyala Josefa mulumi waMariya, banyina aaJesu uutegwa Kkristu.
17 Mazyalani woonse kuzwa kuli Abbrahamu kusika kuli Davida akali 14; kuzwa kuli Davida kusika kuchiindi chakutolwa kubuzike kuBbabbiloni akali 14; alubo kuzwa kuchiindi chakutolwa kubuzike kuBbabbiloni kusika kuli Kkristu akali 14.
18 Pesi Jesu Kkristu wakazyalwa munzila eeyi: Chiindi Mariya banyina aaJesu naakasyomezedwe kukwatwa kuli Josefa, kwakajanika kuti ulaada kwiinda mumuuya uusalala* kabatanakwatana pe. 19 Pesi akaambo kakuti mulumaakwe Josefa wakaliluleme akuti taakali kuyanda kumufwisya bweeme kubantu, wakayeeya kumuleka chakusisikizya. 20 Pesi naakamana kuyeeyesesya makani aaya, ngilozi yaJehova* yakaboneka kulinguwe muchiloto, mpawo yakati: “Josefa mwana waDavida, utayoowi pe kubweza mwanakazi wako Mariya kuti wiinkaawe kung’anda yako, nkaambo muuya uusalala nguwo wachita kuti abe aada. 21 Uzootumbuka mwana mulombe alubo weelede kumuuzika zina lyakuti Jesu,* nkaambo uzoofutula bantu bakwe kuzwa kuzibi zyabo.” 22 Zintu zyoonse eezi zyakachitika kuti kuzuzikizigwe zyakaambwa aaJehova* kwiinda mumupolofita wakwe, kati: 23 “Amubone! Nakalindu* uzooba aada alubo uzootumbuka mwana mulombe mpawo bazoomuuzika zina lyakuti Imanuweli.” Zina eeli kuti lyasandululwa lyaamba kuti, “Leza Ulaandiswe.”
24 Mpawo Josefa wakasinsimuka, wachita mbuli mbaakabuzigwa aangilozi yaJehova,* alubo wakabweza mwanakazi wakwe, wayinkaawe kung’anda. 25 Pesi taakwe naakoonaawe pe kusikila naakatumbuka mwana mulombe, mpawo Josefa wakamuuzika kuti Jesu.