Makani mabotu aakalembwa aaMateyo
8 Jesu naakaseluka kuzwa kuchilundu, makamu aabantu akamutobela. 2 Lino bona, umwi muntu wakali aachipele wakasika kulinguwe wamufugamina, mpawo wakati: “Mwaami, kuti kuyanda, ulakonzya kundisalazya.” 3 Jesu wakatandabika kuboko kwakwe, wamujata mpawo wakati: “Ndilayanda! Salazigwa.” Mpawo wakasalazigwa kuchipele chakwe mpawaawo. 4 Mpawo Jesu wakati kulinguwe: “Utaabuzyi muntu pe makani aaya, pesi yinka ukalitondeezye kumupayizi mpawo upe chipo Mozesi nchaakaamba, kuchitila kuti bube bukamboni kulimbabo.”
5 Naakanjila muKkapenawume, mupati wamasoja wakasika kulinguwe mpawo wakamukombelezya 6 kati: “Mwaami, mubelesi wangu ulilede mung’anda, uyumide mubili alubo ulikuchiswa loko.” 7 Wakati kulinguwe: “Ndilamusilika nindasika nkukooko.” 8 Mpawo mupati wamasoja wakamusandula kuti: “Mwaami, ime tandeeleli pe kuti usike kung’anda yangu, pesi amba jwi biyo mpawo mubelesi wangu ulapona. 9 Nkaambo andime ndili aabantu bandeendelezya alubo ndili aamasoja ngindeendelezya. Kuti ndabuzya ooyu kuti: ‘Yinka!’ ulayinka, kuti ndabuzya umwi kuti ‘Kuza!’ ulasika, alubo kuti ndabuzya muzike wangu kuti ‘Chita eechi!’ ulachichita.” 10 Jesu naakamvwa makani aaya, wakagamba, mpawo wakabuzya aabo bakali kumutobela kuti: “Ndimubuzya simpe kuti, tandinajana muntu ulaalusyomo lupati oobu pe mu-Israyeli. 11 Pesi ndimubuzya kuti, bantu biingi bazwa kubuzwezuba akububbila, bazoosika bazookkale aatebbulu a-Abbrahamu a-Izakka aJakkobo muBwaami bwakujulu, 12 kakuli bana bamuBwaami bazoowaalilwa aanze mumudima. Ooko nkuko nkubatazoolilile akulumina ntwinyo.” 13 Mpawo Jesu wakabuzya mupati wamasoja kuti: “Yinka. Mbukunga watondeezya kuti ulaalusyomo, azichitike kweendelana anzwaakumbila.” Mpawo mubelesi wakwe wakapona mu-awa njiyeeyo.
14 Jesu naakanjila mung’anda yaPetro, wakabona banyinazyala aaPetro kabalede, kabali kupya mubili. 15 Nkinkaako, wakabajata kuboko mpawo kupya mubili kwakamana, mpawo bakabuka basaanguna kumujikila. 16 Pesi nilyakaba goko, bantu bakamweetela bantu biingi bakali aamadimoni mpawo wakatanda myuuya mibi kabelesya jwi biyo alubo wakabasilika boonse bakali kuchiswa, 17 kuchitila kuti kuzuzikizigwe eezyo zyakaambwa kwiinda muli Isaya mupolofita, zyakuti: “We lwakwe wakabweza machise eesu, alubo wakanyampula malwazi eesu.”
18 Jesu naakabona nkamu yabantu yakamuzyungulukide, wakalayilila kuti baye mutaleeliya. 19 Mpawo kwakasika mulembi mpawo wakati kulinguwe: “Muyiisi, ndilakutobela kufumbwa nkuya.” 20 Pesi Jesu wakati kulinguwe: “Bamwaaba balaampako alubo bayuni bakujulu balaazitendele, pesi Mwanaamuntu takwe aakubikka mutwe wakwe pe.” 21 Mpawo umwi wabasikwiiya wakati kulinguwe: “Mwaami, ndizumizye saansi ndikazikke ndeende.” 22 Jesu wakati kulinguwe: “Yinkilila kunembo kunditobela, ulekele bafwide bazikke bafwide babo.”
23 Naakatanta bwaato, basikwiiya bakwe bakamutobela. 24 Lino bona, kwakaba guwo pati mulwizi zyakuti bwaato bwakali kuvumbwa aamayuwe, pesi we wakali koona. 25 Mpawo bakasika kulinguwe bamubusya kabati: “Mwaami tuvune, twaamba kufwa!” 26 Pesi wakati kulimbabo: “Nkamboonzi nimwayoowa* oobu, inywe nimuli aalusyomo luniini?” Mpawo wakanyampuka wakalalila guwo alwizi mpawo kwakawumuna wii! 27 Nkinkaako, baalumi aaba bakagamba mpawo bakati: “Muntu ooyu ulibiyeni? Niliba guwo alwizi zilamuswiilila.”
28 Naakasika mutaleeliya, muchilawu chabantu bakuGadarina, bamwi baalumi babili bakali aamadimoni bakaza kulinguwe kabazwa kutubanda.* Baalumi aaba bakali kuyoosya loko zyakuti taakwe muntu wakali aachibindi chakwiinda aanzila eeyo. 29 Mpawo bakakwiila kabati: “Tuleenzi anduwe Mwana waLeza? Waza kuzootupenzya na chiindi chibikkidwe kachitanakkwana?” 30 Kule ambabo, kwakali tanga lyangulube zyakali kuchela. 31 Mpawo madimoni akasaanguna kumukombelezya, kaati: “Kuti ututande, tutandile mutanga lyangulube.” 32 Mpawo wakaabuzya kuti: “Amwiinke!” Mpawo, akazwa aakunjila mungulube, mpawo tanga lyoonse lyakalundumukila kujeleele* mpawo lyakawida mulwizi akufwida mumaanzi. 33 Pesi basikweembela ngulube bakachija alubo nibakasika mumuunzi, bakaamba zyoonse zyakachitika, kuswaanizya azyakachitika kubaalumi bakali aamadimoni. 34 Alubo muunzi woonse wakasika kuzoobona Jesu, mpawo nibakamubona, bakamubuzya kuti azwe muchilawu chabo.