Makani aakalembwa aaMakko
15 Mbubwakacha biyo, bapati babapayizi abaalu abalembi, nkukwaamba Nkuta Mpati yoonse yamaJuda, bakabunganaamwi kuti baambuuzyanie. Mpawo bakasunga Jesu bayinkaawe, baakumusiya kuli Pilato. 2 Nkinkaako, Pilato wakamubuzya mubuzyo wakuti: “Uli Mwaami wamaJuda na?” Jesu wakasandula kuti: “Iwe nduwe waamba oobo.” 3 Pesi bapati babapayizi bakali kumutamikizya twaambo twiingi. 4 Pilato wakasaanguna kumubuzisisya lubo kati: “Ani tusanduli na? Bona mbiili myiingi milandu njibalikukwaamba.” 5 Pesi Jesu taakwe naakasandula lubo, zyakuti Pilato wakagamba.
6 Chiindi choonse nikwakali kuchitwa pobwe, Pilato wakazibide kubaangunwida musungwa ngubakali kuyanda. 7 Aachiindi eecho, mwaalumi uutegwa Bbarabbasi wakali mujele abasikubukila bweendelezi, aabo bakali bajaya bantu nibakabukilide bweendelezi. 8 Nkinkaako, nkamu yabantu yakasika mpawo yakasaanguna kukumbila Pilato kuti abachitile kweendelana anzyaakazibide kubachitila. 9 Mpawo wakati kulimbabo: “Muyanda kuti ndimwaangunwide Mwaami wamaJuda na?” 10 Nkaambo Pilato wakalizi kuti bapati babapayizi bakamweetede kulinguwe akaambo kamunyono. 11 Pesi bapati babapayizi bakasungilizya bantu kuti bape kuti abaangunwide Bbarabbasi kutali Jesu. 12 Mpawo Pilato wakababuzya lubo kuti: “Ani mpo ndimuchite biyeni ooyu ngumwaamba kuti Mwaami wamaJuda?” 13 Mpawo bantu bakoompolola lubo kabati: “Agankaminwe aachisamu!” 14 Pesi Pilato wakati kulimbabo: “Nkamboonzi? Ani wakabisyaanzi?” Pesi bantu bakayungizya koompolola kabati: “Agankaminwe aachisamu!” 15 Mpawo Pilato kayanda kubotezya nkamu yabantu, wakabaangunwida Bbarabbasi mpawo naakapa kuti Jesu awumwe loko, wakati akaakujayigwe aachisamu.
16 Masoja akamutola mulubuwa, nkukwaamba kung’anda yamweendelezi, mpawo akayita nkamu yoonse yamasoja. 17 Bakamuzwaatika chigogo chapepulu alubo bakaluka ngowani yamaamvwa bamuzwaatika 18 mpawo bakasaanguna kumubuzya kuti: “Mbiyeni, yooMwaami wamaJuda!” 19 Alubo bakali kumuumya tete kumutwe akumuswida mate mpawo bakamufugamina.* 20 Kumamanino, nibakamaninsya kumufubaazya, bakamuzwaatununa chigogo chapepulu, bamuzwaatika zigogo zyakwe zyaajulu mpawo bakamutola kuti bakamugankamine aachisamu. 21 Alubo bakasungilizya umwi Simoni wakuKkurene, wisi aa-Alekizanda aRufu, wakali kulyeendela kazwa kuliimwi myuunzi, kuti anyampule chisamu chaJesu chakupenzezya.*
22 Nkinkaako, bakamusisya kundawu iitegwa Gologota, nkukwaamba, “Ndawu yaChipompo.” 23 Nkukooko, bakeezya kumupa wayini iiswaanizidwe amusamu uukola uutegwa mure pesi taakayinywa pe. 24 Mpawo bakamugankamina aachisamu alubo bakaabana zigogo zyakwe zyaajulu kwiinda mukuuma chisale,* kabayanda kubona kuti umwi awumwi ulabweza chili. 25 Aachiindi eecho, zyakali kuma 9 kuseeni,* alubo bakamugankamina aachisamu. 26 Alubo kwakalembedwe majwi aakali aamulandu ngubakamupede aakuti: “Mwaami wamaJuda.” 27 Mukuyungizya, bakabikka zigwebenga zibili aazisamu aamwi anguwe, chimwi chakali kuchilisyo mpawo chimwi chakali kuchimweensi. 28 *—— 29 Bantu bakali kwiinda, bakali kwaambuula majwi mabi kulinguwe kabatikinia mitwe kabati: “Yaa! Iwe nwaakali kuti uladilisya tempele akuliyakulula mumazuba aatatu, 30 lifutule kwiinda mukuseluka aachisamu chakupenzezya.”* 31 Munzila iikozyenie, bapati babapayizi abalembi bakali kumufubaazya aakati kabo, kabati: “Bamwi wakabafutula, we takonzyi pe kulifutula! 32 Kkristu, Mwaami wa-Israyeli, aseluke lino aachisamu chakupenzezya* kuchitila kuti tubone akuti tusyome.” Nibaba aabo bakali aazisamu aamwi anguwe, bakali kwaambuula majwi mabi atala anguwe.
33 Nikwakaba kuma 12 sikati,* mudima wakavumba chisi choonse kusikila kuma 3 sikati.* 34 Alubo kuma 3 sikati, Jesu wakoompolola ajwi pati kati: “Eli, Eli, lama sabbakkitani?” nkukwaamba kuti: “Leza wangu, Leza wangu, nkamboonzi nwaandilekelezya?” 35 Alubo bamwi bakayimvwi aafwiifwi nibakamvwa kaamba oobo, bakasaanguna kwaamba kuti: “Amumvwe, ulikwiita Elija.” 36 Mpawo umwi muntu wakachijaana waakunika chiponchi muwayini iilula, wachidyunga aatete mpawo wakamupa kuti anywe, kati: “Amumuleke! Tuyanda kubona kuti Elija ulasika na kuzoomuselusya.” 37 Pesi Jesu wakoompolola ajwi pati mpawo wakafwa.* 38 Mpawo kketeni lyamundawu iisalala lyakadeluka, kuzwa aajulu kusika aansi akuba zipanzi zibili. 39 Mupati wamasoja wakayimvwi mpawaawo kamulangide, naakabona zintu zyoonse zyakachitika kalikufwa, wakati: “Kwaamba choonzyo, mwaalumi ooyu wali Mwana waLeza.”
40 Alubo kwakali banakazi bakali kulanga zyakali kuchitika kabayimvwi kule-kule, aakati kabo, kwakali Mariya Magadalina, aMariya banyina aaJakkobo Muniini aJosesi, aSalomi, 41 aabo bakali kweendaawe kabamubelekela naakali kuGalili, abamwi banakazi biingi bakazide aanguwe kuJerusalema.
42 Lyakali lyaba goko, alubo mbukunga bwakali Buzuba Bwakulibambila, nkukwaamba buzuba busaangunina Sabata, 43 kwakasika Josefa waku-Arimateya mwaalumi uulemekwa wamuNkuta Mpati yamaJuda, ooyo wakali kulindila Bwaami bwaLeza anguwe. Wakaba aachibindi mpawo wakayinka kuli Pilato waakukumbila mubili waJesu. 44 Pesi Pilato taakali kuyeeyela pe kuti Jesu wafwa kale, nkinkaako, naakayita mupati wamasoja, wakabuzya kayanda kuziba kuti Jesu wakali wafwa kale na. 45 Naakaziba kuzwa kumupati wamasoja, wakazumizya Josefa kuti apegwe mubili. 46 Josefa naakawula mulembo mubotu akumwaangula, wakamulambila amulembo ooyo, mpawo wakaakumulazika mukabanda* kakafokwedwe mumwaala mpawo wakakunkulisya bbwe, wajala mulyango wakabanda. 47 Pesi Mariya Magadalina aMariya banyina aaJosesi, bakasyaala mpawaawo kabalangide mpaakalazikidwe.