Makani aakalembwa aaMakko
4 Alubo, wakasaanguna kuyiisya kumbali aalwizi mpawo nkamu mpati loko yabantu yakabungana kulinguwe. Nkinkaako, wakanjila mubwaato wakkala mukati, kule akunkomwe, pesi nkamu yoonse yabantu yakali kumbali aalwizi, kunkomwe. 2 Mpawo wakasaanguna kubayiisya zintu zyiingi kabelesya zikozyanisyo, alubo naakali kuyiisya, wakati kulimbabo: 3 “Amuswiilile. Sikubyala wakaya kukubyala. 4 Naakali kubyala, imwi mbuto yakawida kumbali aanzila mpawo bayuni bakasika bayilya. 5 Imwi yakawida aandawu yakali aamabwe, yakatalikwe seele* jingi, alubo yakafwambaana kumena nkaambo teekwakalikwe seele jingi pe. 6 Pesi zuba nilyakabala, yakapya mpawo yakapusama nkaambo teeyakalikwe miyanda pe. 7 Imwi mbuto yakawida mumaamvwa mpawo maamvwa akakomena ayisyanikizya alubo teeyakazyala pe. 8 Pesi imwi yakawida aanyika mbotu mpawo niyakakomena akuvula, yakasaanguna kuzyala michelo alubo yakali kuzyala kwaziindi zyiindulwidwe tuli 30, tuli 60, alubo tuli 100.” 9 Mpawo wakayungizya kati: “Ooyo uuli aamatwi aamvwa, amvwe.”
10 Naakaba aalikke, aabo mbaakalaabo kuswaanizya abali Kkumi Ababili, bakasaanguna kumubuzya mibuzyo atala azikozyanisyo. 11 Wakati kulimbabo: “Inywe mwakapegwa kumvwisisisya nsiswa iisalala yaBwaami bwaLeza pesi kubantu bali kunze, zintu zyoonse zili muzikozyanisyo biyo, 12 kuchitila kuti, nikuba kuti balalanga, balange pesi bataboni pe, akuti nikuba kuti balamvwa, bamvwe pesi batazimvwisisisyi pe zyaambwa, alubo tabakoosanduka pe kuti balekelelwe.” 13 Mukuyungizya, wakati kulimbabo: “Tamuchizi pe chikozyanisyo eechi, ani muzoozimvwisisisya biyeni zimwi zikozyanisyo zyoonse?
14 “Sikubyala, ubyala jwi. 15 Eeyo yakabyalwa kumbali aanzila, mbaabo bamvwa jwi pesi mbubatalimvwe biyo, Saatani ulasika mpawo abweze jwi lyakabyalwa mulimbabo. 16 Munzila iikozyenie, eeyo yakabyalwa aandawu iilaamabwe, mbaabo banga mbubatalimvwe biyo jwi, balitambula kabakondwa. 17 Mbukunga tabakwe miyanda, balayinkilila kunembo kwachiindi chifwiifwi biyo, mpawo mbukutasike mapenzi akupenzegwa akaambo kajwi, balalebwa. 18 Alubo eeyo yakabyalwa mumaamvwa, mbaabo bamvwa jwi, 19 pesi makataazyo aabwiime bwazintu oobuno,* amanguzu aabunoti aayena, akuyandisya zintu zyoonse, zilanjila mpawo zisyanikizye jwi akupa kuti litazyali michelo. 20 Kumamanino, eeyo yakabyalwa aanyika mbotu, mbaabo baswiilila jwi akulitambula amoyo woonse alubo bazyala michelo kwaziindi zyiindulwidwe tuli 30, tuli 60 alubo tuli 100.”
21 Alubo wakati kulimbabo: “Zilachita na kuti lambe libikkwe aansi aabbasikiti* naakuti aansi aabulo? Talibikkwi aachibikkilo chalambe na? 22 Nkaambo taakwe chintu chisisidwe chitazooyubununwi alubo taakwe chintu chisisidwe kabotu-kabotu chitazoobi aantanganana. 23 Kufumbwa muntu uuli aamatwi aamvwa, amvwe.”
24 Mpawo wakayungizya kubabuzya kuti: “Amuswiilile zintu nzimulikumvwa. Chipimyo nchimupimya, nchicho nchibatazoomupimine andinywe, kwaamba choonzyo bazoomuyungizizya zyiingi. 25 Nkaambo kufumbwa ulaazyo, uzoopegwa zyiingi pesi ooyo uutakwe chintu, uzoonyangwa nichiba eecho nchalaacho.”
26 Alubo wakayinkilila kunembo kwaamba kuti: “Bwaami bwaLeza buli mbuli muntu uubyala mbuto munyika. 27 Mansiku uloona mpawo nibwacha ulabuka alubo mbuto ilamena akukomena, pesi kuti eezi zichitika biyeni, tazi pe. 28 Nyika lwayo izyala michelo mbichaani-mbichaani, kusaanguna chisiko, mpawo kuze chitwe mpawo kumamanino, chitwe chibikka nseke. 29 Pesi mbuzitabizwe biyo zilyo, ulanjizya sikela nkaambo chiindi chakutebula chinooli chasika.”
30 Alubo wakayinkilila kunembo kwaamba kuti: “Bwaami bwaLeza kujana twabukozyanisyaanzi alubo nchiichili chikozyanisyo nchitukonzya kubelesya kuti tubupandulule? 31 Buli mbuli nseke yamasitadi, eeyo aachiindi niyakabyalwa munyika, yakali niini loko kwiinda nseke zyoonse zili aanyika. 32 Pesi kuti yabyalwa, ilakomena akuba munsamu mupati kwiinda zilimwa zyoonse alubo nga yaba aamitabi mipati, zyakuti bayuni bakujulu nga bajana aakukkala mumweenzule wawo.”
33 Wakabayiisya jwi kabelesya zikozyanisyo zyiingi zili boobu, kweendelana anzibakali kukonzya kumvwisisisya. 34 Kwaamba choonzyo, taakali kwaambuulaabo katabelesezye chikozyanisyo pe, pesi basikwiiya bakwe wakali kubapandulwida zintu zyoonse kabali aabalikke.
35 Mubuzuba mbuboobo, nilyakaba goko, wakati kulimbabo: “Atuzubukile mutaleeliya.” 36 Nkinkaako, nibakamaninsya kubuzya bantu kuti beende, bakamutansika bwaato alubo kwakali amwi maato aandawu eeyo. 37 Mpawo kwakaba guwo pati alubo mayuwe akali kuuminina aabwaato zyakuti bwaato bwakali bwaba aafwiifwi kuzula maanzi. 38 Pesi we wakali koona kusule mubwaato kasegede musego. Nkinkaako, bakamubusya mpawo bakati kulinguwe: “Muyiisi, tukwe ndaba pe kuti twaamba kufwa?” 39 Mpawo wakabuka wakalalila guwo alubo wakati kulwizi: “Shii! Wumuna!” Mpawo guwo lyakamana alubo kwakawumuna wii! 40 Nkinkaako, wakati kulimbabo: “Nkamboonzi nimwayoowa oobu?* Tamunaba aalusyomo pe?” 41 Pesi bakayoowa loko mpawo bakabuzyania kuti: “Muntu ooyu ngwani loko? Niliba guwo alwizi zilamuswiilila.”