Milimu yaBaapostoli
1 Tiyofilasi uuyandwa, mulugwalo lwakusaanguna, ndakakulembela atala azintu zyoonse Jesu nzyaakachita anzyaakayiisya, 2 kusikila mubuzuba mbwaakatolwa kujulu kali wabapa malayilile baapostoli mbaakasala, kwiinda mumuuya uusalala. 3 Naakapenzegwa, wakalitondeezya kulimbabo kali muumi, kwiinda mubukamboni bwiingi bumvwisisika. Kwamazuba aali 40, bakamubona alubo wakali kwaambuula atala aBwaami bwaLeza. 4 Naakali aamuswaangano ambabo, wakababuzya kuti: “Mutazwi pe muJerusalema pesi kamuswini kulindila eecho nchaakamusyomezya Taata, nchimwakamvwa kulindime, 5 nkaambo Johane wakali kubbabbatizya aamaanzi pesi inywe muzoobbabbatizigwa aamuuya uusalala, mumazuba mache aatobela nizyayinda zintu eezi.”
6 Nibakabungana, bakamubuzya kuti: “Mwaami, ulikububweedezya kuchiindi eechino na bwaami kuma-Israyeli?” 7 Mpawo wakabasandula kuti: “Teezyanu pe kuti muzibe ziindi amazuba aabikkidwe, eezyo Taata nzyaakabikka mumaboko aakwe. 8 Pesi muzootambula manguzu, muuya uusalala waakusika aalindinywe alubo muzooba bakamboni bangu muJerusalema, muJudiya yoonse amuSamariya, kusikila kundawu zili kule loko zyanyika.”* 9 Naakamaninsya kwaamba zintu eezi, wakatolwa kujulu kabalangide mpawo joba lyakamuvumba alubo teebakachili kumubona pe. 10 Nibakachili kulanga kujulu we kalikwiinka, bamwi baalumi babili bakazweete zigogo zituba bakayimikila kumbali lyabo. 11 Mpawo bakati: “Nibaalumi bakuGalili, nkamboonzi nimwiimvwi kamulangide kujulu? Ooyu Jesu watolwa kujulu kuzwa kulindinywe, uzooza munzila iikozyenie mbuli mbumwamubona kaya kujulu.”
12 Mpawo bakabweeda kuJerusalema kabazwa kuchilundu chitegwa Chilundu chama-Olifa, chili aafwiifwi aJerusalema, musinzo weendwa mubuzuba bwasabata. 13 Nibakasika kuJerusalema, bakatanta baya mung’anda yamujulu mubakali kukkala. Mung’anda eeyo, mwakali Petro kuswaanizya aJohane aJakkobo a-Andreya, Filipi aTomasi, Bbatolomeyo aMateyo, Jakkobo mwana wa-Alifasi aSimoni uutegwa musungu aJudasi mwana waJakkobo. 14 Boonse bakali aamakanze aamwi, kabaswini kukomba, kabalaamwi abamwi banakazi aMariya banyina aaJesu abanike bakwe.
15 Mumazuba aayo, Petro wakanyampuka aakati kabakombinyina (bantu aaba bakali kusika ku 120) mpawo wakati: 16 “Nibaalumi, bakombima, kwakali kuyandikana kuti lugwalo oolu luzuzikizigwe, lwakaambwa aamuuya uusalala mubupolofita kwiinda muli Davida, atala aJudasi ooyo wakazoozulwida aabo bakasunga Jesu. 17 Nkaambo wakalaamwi andiswe alubo wakapedwe chaabilo mumulimu ooyu. 18 (Mwaalumi ooyu wakawula muunda kabelesya mali njaakajana munzila iitaluleme alubo naakawa aamutwe, mubili wakwe wakabboloka* alubo zyamukati zyoonse zyakawayukila aanze. 19 Makani aaya akazibinkana kubantu boonse bamuJerusalema, zyakuti muunda ooyo wakayitwa kuti Akkelidama mumulaka wabo, nkukwaamba kuti, “Muunda waGanzi.”) 20 Nkaambo kulilembedwe mubbuku lyaNtembawuzyo kuti: ‘Ndawu yakwe yakukkala ayibe tongo alubo taakwe muntu weelede kukkala aalinjiyo’ akuti, ‘Mulimu wakwe wabulangizi awubwezegwe aawumwi muntu.’ 21 Nkinkaako, kuleelela kuti aakati kabaalumi bakali kweenda aandiswe chiindi choonse Mwaami Jesu naakali kuchita milimu yakwe* aakati kesu, 22 kusaangunina kuchiindi naakabbabbatizigwa aaJohane, kusikila mubuzuba mbwaakatolwa kujulu kuzwa kulindiswe, umwi wabaalumi aaba weelede kuba kamboni wakubusigwa kwaJesu kalaamwi andiswe.”
23 Mpawo bakasala babili, Josefa uutegwa Bbasabbasi, ooyo wakali kwiitwa kuti Justo, aMatiyasi. 24 Mpawo bakakomba kabati: “O Jehova,* iwe nuuzi myoyo yabantu boonse, tutondeezye ngwaasala aakati kabaalumi aaba babili, 25 uutabweze mulimu ooyu alubo uutabe mwaapostoli, eezyo nzyaakasiya Judasi akuya kwakwe.” 26 Nkinkaako, bakawuma chisale* mpawo chakawida Matiyasi alubo wakabalwaamwi* abamwi baapostoli bali 11.