Milimu yaBaapostoli
4 Aaba babili nibakachili kwaambuula aabantu, bapayizi, mupati wabalindi batempele, abaSadusi bakasika kulimbabo. 2 Bakalinyemede nkaambo baapostoli bakali kuyiisya bantu akwaambilizya aantanganana atala akubusigwa kwaJesu kuzwa kubafu. 3 Nkinkaako, bakabajata* mpawo bakababikka mujele kusikila mubuzuba bwakatobela nkaambo lyakali lyaba goko. 4 Nikuba oobo, bantu biingi bakali baswiilila makani aayo, bakasyoma alubo baalumi bakasyoma, bakasisike ku 5 000.
5 Mubuzuba bwakatobela, beendelezi babo abaalu abalembi bakabunganaamwi muJerusalema, 6 kabalaamwi amupayizi mupati Anasi, aKkayafasi, aJohane, a-Alekizanda ababbululu bamupayizi mupati boonse. 7 Bakiimikizya Petro aJohane aakati kabo mpawo bakasaanguna kubabuzya-buzya kabati: “Zintu eezi muzichita mumanguzu aani alubo mubelesya zina lyani?” 8 Mpawo Petro, kazwide muuya uusalala, wakati kulimbabo:
“Nibeendelezi babantu andinywe nibaalu, 9 kuti sunu katulikubetekwa akaambo kachintu chibotu nchitwachita kumwaalumi ooyu wakatali kweenda alubo kuti kamuyanda kuziba kuti ngwani wamuponia, 10 azizibwe kulindinywe moonse akubantu boonse bamu-Israyeli kuti, mwaalumi ooyu uliimvwi kunembo lyanu kasimide akaambo kazina lyaJesu Kkristu wakuNazareta ngumwakagankamina aachisamu pesi Leza wakamubusya kuzwa kubafu. 11 Ooyu ‘ndibbwe ndimwakawubaansya kakutakwe kaambo inywe nibayaki, alubo lyaba bbwe liyandikana lyaakkona.’* 12 Mukuyungizya, taakwe umwi muntu uukonzya kufutula bantu alubo taakwe limwi zina aanyika ndibakapegwa bantu, nditweelede kufutulwa aandilyo.”
13 Nibakabona kuti Petro aJohane bakali kwaambuula kabatayoowi anibakaziba kuti bakali bantu biyo bakatayiide,* bakagamba. Alubo bakaziba kuti bakalaamwi aJesu. 14 Bakabula lyakwaamba nkaambo bakalimulangide mwaalumi wakali waponesegwa kayimvwi aambabo. 15 Nkinkaako, bakabalayilila kuti bazwe muNkuta Mpati yamaJuda mpawo bakasaanguna kwaambuuzyania muli chabo-chabo 16 kabati: “Tubachite biyeni baalumi aaba? Nkaambo kwaamba choonzyo, bachita chigambyo chipati chabonwa aabantu boonse bamuJerusalema alubo tatukonzyi pe kuchikaka. 17 Atubayoosezye mpawo tubabuzye kuti batabuzyi muntu naaba uumwi atala azina eeli, kuchitila kuti makani aaya atazuli mubantu.”
18 Mpawo bakabayita, bababuzya kuti bataambi chintu nichiba chimwi akuti baleke kuyiisya atala azina lyaJesu. 19 Pesi Petro aJohane bakabasandula kuti: “Kuti kamubonaanga zilikabotu mumeso aaLeza kuswiilila ndinywe kwiinda kuti tuswiilile Leza, zyasyaalila kulindinywe. 20 Pesi iswe tatukooleka pe kwaambuula atala azintu nzitwakabona anzitwakamvwa.” 21 Nkinkaako, nibakamana kubayoosezya lubo, bakabaangununa nkaambo bakabula mulandu wakali kukonzya kupa kuti bapenzegwe alubo bakayoowa bantu bakali kulumbayizya Leza akaambo kazintu zyakali zyachitika. 22 Nkaambo mwaalumi wakaponesegwa kwiinda muchigambyo* wakali aaminyaka yiinda ku 40.
23 Nibakaangununwa, bakayinka kubantu bakulimbabo mpawo bakabalungunwida nzibakabuzigwa abapati babapayizi abaalu. 24 Nibakamvwa zintu eezi, bakakomba kuli Leza kabalaamwi ajwi pati kabati:
“Mwaami Singuzuzyoonse, nduwe wakalenga julu anyika alwizi azyoonse zili mumo, 25 alubo nduwe wakaamba kwiinda mumuuya uusalala kubelesya sianene Davida mubelesi wako kuti: ‘Nkamboonzi zisi nizyaba aalupyopyongano alubo nkamboonzi bantu nibalikuyeeyesesya zintu zitagwasyi? 26 Baami banyika bakalibambila alubo beendelezi bakabunganaamwi kuti balwane Jehova* amunanike wakwe.’* 27 Kwaamba choonzyo, Herodi aPontiyo Pilato kalaamwi abantu bazisi abantu bamu-Israyeli, bakabunganaamwi mumuunzi ooyu kuti balwane mubelesi wako uusalala Jesu ngwaakananika, 28 kuti bachite nzwaakakanza kuti zichitike kakuchili chiindi akuboko kwako alubo akuyanda kwako. 29 Jehova,* bona lino mbubali kutuyoosezya alubo gwasya babelesi bako kuti bayinkilile kunembo kwaamba jwi lyako kakutakwe nchibayoowa pe. 30 Alubo tandabika kuboko kwako kuti uponie bachiswa, uchite zitondeezyo azigambyo kwiinda muzina lyamubelesi wako uusalala Jesu.”
31 Nibakazwa aakukomba nkombyo zyakukombelezya,* ndawu njibakabede yakazungaana mpawo boonse bakazula muuya uusalala alubo bakasaanguna kwaambuula jwi lyaLeza kabatayoowi pe.
32 Mukuyungizya, bantu biingi bakali basyoma, bakali aamoyo uumwi amuzeezo uumwi zyakuti taakwe naaba uumwi aakati kabo wakali kwaamba kuti zintu nzyalaazyo nzizyakwe alikke, pesi bakaabana zintu zyoonse nzibakalaazyo. 33 Baapostoli bakayinkilila kunembo kupa bukamboni amanguzu woonse atala akubusigwa kwaMwaami Jesu alubo luzyalo lupati lwakali aalimbabo boonse kaluli lwiingi loko. 34 Kwaamba choonzyo, taakwe wakali kufwaba pe aakati kabo nkaambo aabo boonse bakali aamyuunda amaanda bakali kuzyuuzya mpawo mali njibakali kujana 35 bakali kwiitola kubaapostoli. Alubo mali eeyo yakali kupegwa bantu kweendelana azyakali kuyandikana kumuntu umwi awumwi. 36 Josefa, ooyo baapostoli ngubakali kwiita kuti Bbanabbasi (zina eeli kuti lyasandululwa lyaamba kuti, “Mwana waLuumbulizyo”), wakali muLevi alubo wakazyalilwa kuKkupro, 37 wakali aamuunda. Wakawuzya muunda ooyo mpawo mali wakayitola kubaapostoli.