KuBaroma
6 Lino tutyeni? Twiinkilile kunembo katuli muchibi na, kuchitila kuti luzyalo lupati luvule? 2 Peepe! Mbukunga twakafwa kuchibi, nkamboonzi nituchiyanda kupona mulinchicho? 3 Naakuti, tamuzi na kuti iswe toonse nitwakabbabbatizigwa muli Kkristu Jesu, twakabbabbatizigwa mulufu lwakwe? 4 Nkinkaako, twakazikkwaamwi anguwe kwiinda mukubbabatizigwa mulufu lwakwe, kuchitila kuti, mbuli Kkristu mbaakabusigwa kuzwa kubafu kwiinda mubulemu bwaTaata, andiswe tweende mubuumi bupya. 5 Kuti katujisini aanguwe mulufu luli mbuli lwakwe, nkukwaamba kuti, tuzoojatana choonzyo anguwe mukubusigwa kuli mbuli kwakwe. 6 Nkaambo tulizi kuti buntu bwesu bwachiindi bwakagankaminwa aachisamu aamwi anguwe, kuti mubili wesu uuli aachibi utabi aamanguzu, kuchitila kuti tutayinkilili kunembo katuli bazike bachibi. 7 Nkaambo ooyo wafwa, waangununwa kuchibi chakwe.*
8 Mukuyungizya, kuti kakuli kuti twakafwaamwi aKkristu, tusyoma kuti tuzooponaamwi anguwe. 9 Mbukunga tulizi kuti Kkristu wakabusigwa kuzwa kubafu, tachizoofwi lubo pe, lufu taluchikwe manguzu pe aalinguwe. 10 Nkaambo kufwa nkwaakafwa, wakafwa kamwi biyo kuti agwisye chibi, pesi buumi mbwapona, uponena Leza. 11 Munzila iikozyenie, andinywe amulibone kuti mulifwide kuchibi pesi muponene Leza kwiinda muli Kkristu Jesu.
12 Nkinkaako, mutalekeli chibi kuti chiinkilile kunembo kweendelezya mbuli mwaami mumibili yanu iifwa, kuti muchite ziyandwa aamibili yanu. 13 Alubo mutayinkilili kunembo kupa mibili yanu* kuchibi mbuli zilwanisyo zyakutalulama, pesi amulipede kuli Leza mbuli bantu bakabusigwa kuzwa kubafu alubo amupe Leza mibili yanu* mbuli zilwanisyo zyabululami. 14 Nkaambo chibi tacheelede kumweendelezya pe mbukunga tamuli aansi aamulawu, pesi mulaansi aaluzyalo lupati.
15 Eezi zyaambaanzi? Zyaamba kuti tweelede kubisya na akaambo kakuti tatuli aansi aamulawu pesi tulaansi aaluzyalo lupati? Teembubo pe! 16 Tamuzi na kuti, kuti mwalipeda kuli umwi muntu mbuli bazike baswiilila, munooli mwaba bazike bamuntu ngumuswiilila? Kuti mwaba bazike bachibi, muzoofwa pesi kuti mwaba bazike bakuswiilila, muzoojana bululami. 17 Pesi tulamulumba Leza nkaambo nikuba kuti aali chimwi chiindi mwakali bazike bachibi, mwakayiswiilila kazizwa aansi aamoyo njiisyo njimwakapegwa. 18 Mbukunga mwakaangununwa kuchibi, mwakaba bazike babululami. 19 Ndilikwaambuula mbuli mbubaambuula bantu akaambo kakubula manguzu kwamibili yanu. Mbuli mbumwakapa zipanzi zyamibili yanu kuti mube bazike bakutasalala abakutatobela mulawu, zitola kukutatobela mulawu, nkinkaako lino amupe zipanzi zyamibili yanu mbuli bazike babululami butola kubusalali. 20 Nkaambo nimwakali bazike bachibi, mwakalaangunukide kuti muchite zintu zitaluleme.
21 Nimwakali bazike bachibi, mwakali kuzyala michelo iili biyeni? Mwakajana zintu zilikumufwisya bweeme lino, nkaambo mamanino aazintu eezyo ndufu. 22 Nikuba oobo, mbukunga lino mwakaangununwa kuchibi, mpawo mwakaba bazike baLeza, mwaabuzyala michelo mubusalali alubo kumamanino, muzoojana buumi butamani. 23 Nkaambo mbadalo yachibi ndufu, pesi chipo nchapa Leza, mbuumi butamani kwiinda muli Kkristu Jesu Mwaami wesu.