Lwabili Luya Kuli Timoti
2 Nkinkaako mwanaangu, yinkilila kunembo kujana manguzu muluzyalo lupati luli muli Kkristu Jesu, 2 amuzintu nzwaakamvwa kulindime, zyakazuminwa aabakamboni biingi, zintu eezi zipe baalumi basyomeka, aabo batazooyelele bukkwene kuyiisya bamwi. 3 Mbuli musoja waKkristu Jesu uuli kabotu, libambile kuswaana mapenzi. 4 Taakwe muntu uubeleka kali musoja uuliswaanizya* mulizyakuuzizyania zyabuumi oobuno,* kuti abotezye ooyo wakamunjizya mulimu wabusoja. 5 Nikuba muzisobano, muntu uutola lubazu mumizundaano, tabupegwi pe bulumbu,* kunze kwakuti watobelezya milawu yamumizundaano. 6 Mulimi uubeleka changuzu, nguwe weelede kuba wakusaanguna kulya michelo yamumuunda wakwe. 7 Kkala kwaayeeya makani ngindilikwaamba, Mwaami uzookugwasya kumvwisisisya zintu zyoonse.
8 Yeeya kuti Jesu Kkristu wakabusigwa kuzwa kubafu akuti wakali kuzwa kubana baDavida kweendelana amakani mabotu ngindikambawuka, 9 aalikupa kuti ndiswaane mapenzi akusungwa mbuli kuti ndilichigwebenga. Nikuba oobo, jwi lyaLeza talisungidwe pe. 10 Alubo akaambo kakaambo aaka, ndilikwiinkilila kunembo kulisimya muzintu zyoonse akaambo kabaabo basalidwe, kuchitila kuti ambabo bakajane lufutuko lujanwa kwiinda muli Kkristu Jesu, aamwi abulemu butamani. 11 Makani aaya alasyomeka: Kwaamba choonzyo, kuti kakuli kuti twakafwaamwi anguwe, tuzooponaamwi anguwe. 12 Kuti twayinkilila kunembo kulisimya, tuzooyendelezyaamwi anguwe katuli baami, kuti twamukaka, anguwe uzootukaka, 13 kuti katutasyomeki, we unoosyomeka nkaambo takonzyi pe kulikaka.
14 Yinkilila kunembo kubayeezya zintu eezi, kubayiisya* kunembo lyaLeza kuti batalwani akaambo kamabala, zintu zitagwasyi pe nkaambo zipambanisya* aabo baswiilila. 15 Chita zyoonse nzukonzya kuti ulitondeezye kuti uli muntu uuyandwa aaLeza, mubelesi uutakwe chintu chimufwisya bweeme alubo uuyiisya jwi lyakasimpe akulipandulula munzila yeelede. 16 Pesi tukake twaambo tutagwasyi, tubisya zintu zisalala, nkaambo tupa kuti muntu ayindilile kutayoowa Leza, 17 alubo majwi aabo azoomwayika mbuli chilonda chiyabukomena. Himenayo aFiletasi balaakati kabo. 18 Baalumi aaba baleya mukasimpe, kabaamba kuti kubusigwa kwabantu bafwide kwakachitika kale alubo balikunyonyoona lusyomo lwabamwi. 19 Nikuba oobo, ntalisyo iisimide yaLeza inooyimvwi, kayili aachitondeezyo eechi chakuti, “Jehova* ulibazi aabo bali kubbazu lyakwe,” achakuti, “Muntu woonse wiita zina lyaJehova* akukake kutalulama.”
20 Mung’anda mpati muli zibelesyo, kutali zyangolida azyansiliva kupela, pesi azyazisamu azyabulongo alubo zimwi zibeleka mulimu uuli aabulemu, pesi zimwi zibeleka mulimu uutakwe bulemu. 21 Nkinkaako, kuti muntu walitantamuna kuzibelesyo zibeleka mulimu uutakwe bulemu, ulaba chibelesyo chamulimu uulemekwa, chisalazidwe, chigwasya kuli munaacho, chibambilidwe kuchita mulimu woonse mubotu. 22 Nkinkaako, chija zintu nzibalombozya bachikula, pesi utobele bululami, lusyomo, luyando, luumuno, aamwi abaabo bayita Mwaami amoyo uusalala.
23 Mukuyungizya, kaka kukazyania kwabufuba-fuba akwabaabo batakwe luzibo, nkaambo ulizi kuti kweeta kulwana. 24 Nkaambo muzike waMwaami teelede kulwana pe, pesi weelede kuba aamoyo mutete* kubantu boonse, weelela kuyiisya, uulinyona kuti bantu bamubisizya, 25 uubayiisya kali aamoyo uubombede aabo bakazya. Amwi Leza ulakonzya kupa kuti basanduke* mpawo bajane luzibo lwachoonzyo lwakasimpe, 26 alubo mizeezo yabo iboolaamwi mpawo bafutuke kukakole kaDyabbulosi, mbukunga wakabajata kabalanga, kuti bachite kuyanda kwakwe.