Joshuwa
10 Mwaami Adonizedekki waJerusalema mbaakamvwa biyo kuti Joshuwa wabweza muunzi wa-Ayi akuunyonyoona, muunzi wa-Ayi amwaami wawo wawuchita mbuli mbaakayichita Jerikko amwaami wayo, akuti bantu bamuGibbiyoni bapangana chizuminano chaluumuno ama-Israyeli akuti baabukkala aambabo, 2 wakayoowa loko nkaambo Gibbiyoni wakali muunzi mupati mbuli umwi wamyuunzi yabwaami. Wakali mupati kwiinda muunzi wa-Ayi alubo baalumi bawo boonse bakali basilumamba. 3 Nkinkaako, Adonizedekki mwaami waJerusalema wakatuma mulumbe kuli Hohamu mwaami waHebburoni, Piramu mwaami waJamuti, Jafiya mwaami waLakkishi aDebbiri mwaami wa-Egiloni wakuti: 4 “Amuze muzoondigwasye tulwane muunzi waGibbiyoni nkaambo bapanga luumuno aJoshuwa ama-Israyeli.” 5 Mpawo baami bali musanu bama-Amori—mwaami waJerusalema, mwaami waHebburoni, mwaami waJamuti, mwaami waLakkishi amwaami wa-Egiloni—bakabungana amasooja aabo mpawo bakeenda baakukkempa kuti bazinge muunzi waGibbiyoni.
6 Mpawo baalumi bamuGibbiyoni bakatuma jwi kuli Joshuwa kukkeempu kuGiligali lyakuti: “Utatulekelezyi pe tubazike bako.* Fwambaana kuza! Zootuvune utugwasye! Baami boonse bama-Amori bamuchilawu chili aazilundu babungana kuti bazootulwane.” 7 Nkinkaako, Joshuwa wakatanta kazwa kuGiligali abaalumi boonse bankondo abasilumamba bali aamanguzu.
8 Mpawo Jehova wakati kuli Joshuwa: “Utabayoowi pe nkaambo ndababikka mukuboko kwako. Taakwe naaba uumwi uutakuzunde pe.” 9 Joshuwa naakeenda busiku boonse kuzwa kuGiligali, wakabasikila kabalyiibide. 10 Jehova wakabanyongania kunembo lyama-Israyeli, mpawo ma-Israyeli bakajaya bantu biingi kuGibbiyoni, bakabaandilila anzila iitanta kiiya kuBbeti-horoni, kabaya bubajaya kusikila ku-Azekka akuMakkeda. 11 Nibakali kuchija ma-Israyeli kabali aamunkunu waBbeti-horoni, Jehova wakabalosezya chivulamabwe chipati kuyoosika ku-Azekka zyakuti bakamana kufwa. Kwaamba choonzyo, aabo bakajayigwa aachivulamabwe bakali biingi loko kwiinda bakajayigwa aapanga lyama-Israyeli.
12 Mubuzuba mbuboobo, Jehova wakazunda ma-Amori kunembo lyama-Israyeli alubo Joshuwa wakabuzya Jehova kunembo lyama-Israyeli kuti:
“O zuba, yimikila aajulu aaGibbiyoni,
Anduwe O mweezi, yimikila muKkuti* lya-Ayijaloni!”
13 Nkinkaako, zuba lyakayimikila anguwo mweezi teewakeenda pe kusikila chisi chakkwichizya basinkondonyina. Tazilembedwe na eezi mubbuku lyaJashari? Zuba lyakayimikila aakati kajulu alubo teelyakafwambaana pe kubbila kwachiindi chilampa buzuba bumwi. 14 Taakwe nikwakabede buzuba buli boobu pe, nikuba musule aambubo naakuti nibwakayinda, aawo Jehova naakaswiilila jwi lyamuntu nkaambo Jehova wakali kulwanina ma-Israyeli.
15 Mpawo Joshuwa ama-Israyeli boonse bakabweeda kukkeempu kuGiligali.
16 Kuchiindi eecho, baami bali musanu bakachija baakuyuba mumpako yabbwe kuMakkeda. 17 Mpawo Joshuwa wakabuzigwa kuti: “Kwajanika baami bali musanu kabayubide mumpako yabbwe kuMakkeda.” 18 Mpawo Joshuwa wakati: “Amukunkulisye mabwe mapati mujale mulomo wampako eeyo mpawo mubikke baalumi kuti babalinde. 19 Pesi inywe moonse mutayimikili pe, amubatobele basinkondonyokwe mubajaye, mutabalekeli pe kuti banjile mumyuunzi yabo nkaambo Jehova Leza wanu wababikka mumaboko aanu.”
20 Joshuwa ama-Israyeli nibakamana kujaya biingi babo zyakuti bakali baamba kubamaninsya, kutabikkilizya abakachija baakunjila mumyuunzi iikwabilidwe, 21 bantu boonse bakaboola muluumuno kuli Joshuwa kukkeempu kuMakkeda kakutakwe uulichiside. Taakwe umwi muntu wakazoobbanuna mulomo* wakwe kuti aambe zintu zitali kabotu kuma-Israyeli. 22 Mpawo Joshuwa wakati: “Amujule mulomo wampako mugwisye baami bali musanu mubeete kulindime.” 23 Nkinkaako, bakabagwisya baami aabo bali musanu kuzwa mumpako: mwaami waJerusalema, mwaami waHebburoni, mwaami waJamuti, mwaami waLakkishi amwaami wa-Egiloni. 24 Nibakatola baami aabo kuli Joshuwa, wakayita baalumi boonse ba-Israyeli, mpawo wakati kubapati babasilumamba mbaakali wayinka aabo: “Amuze kunembo. Amulyate nsingo zyabaami aaba.” Nkinkaako, bakaswena kunembo balyata nsingo zyabo. 25 Mpawo Joshuwa wakati kulimbabo: “Mutayoowi pe nikuba kuzazama. Amusime mube aachibindi, nkaambo eezi nzizyo nzyayoochita Jehova kuli basinkondonyokwe boonse mbimuyoolwana.”
26 Joshuwa wakabajaya mpawo wakabaanzika aazisamu* zili musanu, bakalaanzikidwe aazisamu eezyo kusika goko. 27 Nilyakaba goko, Joshuwa wakalayilila kuti baangulwe aazisamu mpawo bawaalilwe mumpako mubakayubide. Mpawo mabwe mapati akabikkwa aamulomo wampako eeyo, oomo mubachibede kusikila sunu.
28 Mubuzuba oobo, Joshuwa wakabweza muunzi waMakkeda wawunyonyoona apanga. Wakanyonyoona mwaami wanguwo amuntu woonse wakali mumo, taakwe ngwaakaleka pe kuti afutuke. Mwaami waMakkeda wakamuchita mbuli mbaakachita kumwaami waJerikko.
29 Mpawo Joshuwa ama-Israyeli boonse bakazwa kuMakkeda baya kuLibbina baakulwana aanjiyo. 30 Anjiyo Libbina kuswaanizya amwaami wayo, Jehova wakayibikka mukuboko kwama-Israyeli, bakayinyonyoona apanga kuswaanizya amuntu woonse wakali mulinjiyo, taakwe wakafutuka pe. Nkinkaako, bakachitila mwaami wayo mbuli mbubakachita kumwaami waJerikko.
31 Mpawo Joshuwa ama-Israyeli boonse bakazwa kuLibbina baya kuLakkishi baakukkempa nkukooko bayilwana. 32 Jehova wakabikka muunzi waLakkishi mukuboko kwama-Israyeli, bakawubweza mubuzuba bwachibili. Bakawunyonyoona apanga kuswaanizya amuntu woonse wakali mumo mbuli mbubakachita kuLibbina.
33 Mpawo Horamu mwaami waGezeri wakatanta kuti akagwasye Lakkishi, pesi Joshuwa wakamujaya aamwi abantu bakwe zyakuti taakwe naba uumwi wakafutuka pe.
34 Mpawo Joshuwa ama-Israyeli boonse bakazwa kuLakkishi baya ku-Egiloni baakukkempa nkukooko bawulwana. 35 Bakawubweza mubuzuba mbuboobo mpawo bakawunyonyoona apanga. Bakanyonyoona muntu woonse wakali mumo mubuzuba mbuboobo mbuli mbubakachita kuLakkishi.
36 Mpawo Joshuwa ama-Israyeli boonse bakazwa ku-Egiloni bayinka kuHebburoni baakwiilwana. 37 Bakayibweza bayinyonyoona apanga amwaami wayo atuunzi twayo amuntu woonse wakali mumo, taakwe wakafutuka pe. Bakayinyonyoona kuswaanizya amuntu woonse wakali mumo mbuli mbubakachita ku-Egiloni.
38 Kumamanino, Joshuwa ama-Israyeli bakalulama kuDebbiri mpawo bakawulwana muunzi ooyo. 39 Wakayibweza amwaami wayo, atuunzi twayo toonse alubo bakanyonyoona muntu woonse wakali muli ntuto, taakwe wakafutuka pe. Debbiri amwaami wayo wakayichita mbuli mbaakachita Hebburoni aLibbina amwaami wayo.
40 Joshuwa wakazunda nyika yoonse iili aazilundu, Negebbu, Shefela, minkunu abaami bayo boonse, taakwe wakafutuka pe; wakanyonyoona chintu choonse chiyoya mbuli mbaakalayilila Jehova Leza wa-Israyeli. 41 Joshuwa wakabazunda kuzwa kuKkadeshi-bbaneya kuyoosika kuGaza anyika yoonse yaGosheni kuyoosika kuGibbiyoni. 42 Joshuwa wakabazunda baami aaba boonse anyika zyabo nkaambo Jehova Leza wa-Israyeli nguwe wakali kubalwanina. 43 Mpawo Joshuwa wakabweeda kukkeempu kuGiligali ama-Israyeli boonse.