Joshuwa
22 Mpawo Joshuwa wakayita musyobo waRubbeni, waGadi ahafu yamusyobo waManase, 2 mpawo wakati kulimbabo: “Mwazichita zyoonse Mozesi mubelesi waJehova nzyaakalayilila alubo mwaliswiilila jwi lyangu muzintu zyoonse nzindakamulayilila. 3 Teemwakabalekelezya pe bananyokwe mazuba woonse kusikila sunu. Mwawubamba mulawu Jehova Leza wanu ngwaakamulayilila. 4 Jehova Leza wanu wabapa kulyookezya bananyokwe mbuli mbaakabasyomezya. Nkinkaako, amubweede kumatente aanu kunyika Mozesi mubelesi waJehova njaakamupa kuti ibe lukono lwanu mutala* aaJodani. 5 Amube aachoonzyo chakuti mwabamba malayilile aMulawu waMozesi mubelesi waJehova nzyaakamupa kwiinda, mukuyanda Jehova Leza wanu, kweenda munzila zyakwe zyoonse, kubamba malayilile aakwe, mukukakatila kulinguwe akumubelekela amoyo wanu woonse abuumi bwanu boonse.”
6 Joshuwa wakabalongezya mpawo wakati beende. Kuzwa waawo, bakabweeda kumatente aabo. 7 Mozesi wakapa hafu yamusyobo waManase lukono muBbashani, mpawo imwi hafu yamusyobo ooyo, Joshuwa wakayipa nyika kububbila kwaJodani aamwi abananyina. Mukuyungizya, Joshuwa wakabalongezya mpawo wakabaleka kuti babweede kumatente aabo. 8 Mpawo wakati kulimbabo: “Amubweede kumatente aanu abunoti bwiingi azivuubwa zyiingi ansiliva angolida akkopa ansimbi azigogo zyiingi. Amwaabane abananyokwe zintu nzimwakabweza kuli basinkondonyokwe.”
9 Kuzwa waawo, musyobo waRubbeni, waGadi ahafu yamusyobo waManase bakapambukana abamwi ma-Israyeli kuShilo munyika yaKkenani. Bakabweeda kunyika yabo njibakapegwa, nyika yaGiliyadi, mbuli mbubakalayililwa aaJehova kwiinda muli Mozesi. 10 Musyobo waRubbeni, waGadi ahafu yamusyobo waManase nibakasika kuzilawu zyaJodani munyika yaKkenani, bakayaka chipayililo chipati loko kumbali aaJodani. 11 Nikwakayinda chiindi, bamwi ma-Israyeli bakazimvwa mpawo bakati: “Amubone! Musyobo waRubbeni awaGadi ahafu yamusyobo waManase bayaka chipayililo kunembo aanyika yaKkenani muzilawu zyaJodani, kubbazu lyanyika yama-Israyeli.” 12 Ma-Israyeli nibakazimvwa, mbungano yoonse yama-Israyeli yakabungana kuShilo kuti bakabalwane.
13 Mpawo ma-Israyeli bakatuma Finiyasi mwana wa-Eliyezari mupayizi kumusyobo waRubbeni awaGadi ahafu yamusyobo waManase munyika yaGiliyadi. 14 Wakali aabasilutwe bali kkumi, silutwe uumwi kuzwa kumusyobo uumwi wama-Israyeli, umwi awumwi kali silutwe wang’anda yawisi, aakati kazyuulu zyama-Israyeli. 15 Nibakasika kumusyobo waRubbeni, waGadi ahafu yamusyobo waManase munyika yaGiliyadi, bakati kulimbabo:
16 “Nzezi nziyaamba mbungano yoonse yaJehova: ‘Niinzi eezi nzimwachita zitondeezya kutasyomeka kuli Leza wa-Israyeli? Sunu mwafutatila Jehova kwiinda mukuliyakila chipayililo akupapila Jehova. 17 Chibi nchitwakachita kuPeyori chakali chiniini na? Tatunalisalazya pe kulinchicho kusikila sunu nikuba kuti mbungano yaJehova yakasikilwa aachipenzyo. 18 Muli aachoonzyo na kuti sunu muyanda kuleka kutobela Jehova? Kuti sunu mwapapila Jehova, juunza bukali bwakwe bulavutukila mbungano yoonse ya-Israyeli. 19 Kuti kakuli kuti nyika yalukono lwanu ilisofweede, amuzubuke muze kunyika yalukono lwaJehova, ikuli tente lyakukombela lyaJehova, mukkale aakati kesu, pesi mutamupapili pe Jehova alubo mutapi kuti tube basikupapila kwiinda mukuba basikuliyakila chipayililo kuyungizya kuchipayililo chaJehova Leza wesu chiliwo kale. 20 Akkani mwana waZera naakatondeezya kutasyomeka atala azintu zyakeelede kunyonyoonwa, bukali bwaLeza teebwakasikila mbungano yoonse na ya-Israyeli? Taakafwa aalikke pe akaambo kamulandu wakwe.’”
21 Bamusyobo waRubbeni, waGadi ahafu yamusyobo waManase nibakamvwa oobo, bakasandula basilutwe bazyuulu zyama-Israyeli kabati: 22 “Jehova, Leza wabaleza! Jehova, Leza wabaleza! Ulizi ama-Israyeli balaziba, kuti kakuli kuti twakapapila akuti teetwakasyomeka kuli Jehova, mutatusiyi katuli bawumi sunu. 23 Kuti kakuli kuti twakaliyakila chipayililo katuli aamakanze aakuleka kutobela Jehova kuti tupe zipo zitentwa, zipo zyazilyo azipayizyo zyalumvwanano aalinchicho, Jehova atusubule. 24 Pesi kuli kamwi kaambo kakapa kuti tuchite oobo, nkaambo twakati, ‘Mukuya kwamazuba bana banu bazoobuzya bana besu kuti: Muli aalubazuunzi biya aJehova Leza wa-Israyeli? 25 Jehova wakabikka mugaano waJodani aakati kandiswe andinywe, nibamusyobo waRubbeni awaGadi. Tamukwe chaabilo pe muli Jehova.” Mpawo bana banu bazookasya bana besu kukomba* Jehova.’
26 “Nkinkaako, twakati, ‘Atuyake chipayililo, tachikooba chazipo zitentwa naakuti zipayizyo, 27 pesi chilaba kamboni aakati kesu andinywe abana* mbitutazoozyale kuti tuzooyinkilila kunembo kubelekela Jehova katumupa zipo zyesu zitentwa azipayizyo zyesu azipayizyo zyesu zyalumvwanano, kuchitila kuti mukuya kwamazuba bana banu batazoobuzyi bana besu kuti: “Tamukwe chaabilo pe muli Jehova.”’ 28 Nkinkaako, twakati, ‘Kuti mumazuba aali kunembo bazootubuzya naakuti babuzya bana* besu, tuzoobabuzya kuti: “Amubone chipayililo chikozyenie aachaJehova nchibakapanga masianene, teechazipo zitentwa pe naakuti zipayizyo, pesi kuti chibe kamboni aakati kesu andinywe.”’ 29 Tazichiti pe kuti tupapile Jehova akuti sunu tuleke kutobela Jehova kwiinda mukuyaka chipayililo chazipo zitentwa, zipo zyazilyo azipayizyo kunze kwachipayililo chaJehova Leza wesu, chili kunembo aatente lyakwe lyakukombela!”
30 Finiyasi mupayizi, basilutwe bambungano abasilutwe bazyuulu zyama-Israyeli mbaakali aabo, bakakkutisikana nibakamvwa majwi ngibakaamba bana baRubbeni, baGadi, abaManase. 31 Nkinkaako, Finiyasi mwana wa-Eliyezari mupayizi wakabuzya bana baRubbeni, baGadi, abaManase kuti: “Sunu twaziba kuti Jehova uli aakati kesu, nkaambo teemwachita chintu chitondeezya kutasyomeka kuli Jehova. Mwabavuna ma-Israyeli mukuboko kwaJehova.”
32 Mpawo Finiyasi mwana wa-Eliyezari mupayizi abasilutwe bakaboola munyika yaKkenani kabazwa kumusyobo waRubbeni awaGadi munyika yaGiliyadi, bakeeta mulumbe kuli bamwi ma-Israyeli. 33 Ma-Israyeli bakakkutisikana amulumbe ooyu mpawo ma-Israyeli bakatembawula Leza. Taakwe nibakazoowamba lubo kuti bayanda kulwana musyobo waRubbeni awaGadi akunyonyoona nyika njibakali kukkala.
34 Bamusyobo waRubbeni awaGadi bakawuzika chipayililo,* nkaambo “ngukamboni aakati kesu wakuti Jehova nguLeza wakasimpe.”