Joshuwa
8 Mpawo Jehova wakabuzya Joshuwa kuti: “Utayoowi pe nikuba kuzazama. Bweza baalumi boonse bankondo ukalwane muunzi wa-Ayi. Bona, ndabikka mwaami wa-Ayi, bantu bakwe, muunzi wakwe anyika yakwe mukuboko kwako. 2 Ayi amwaami wayo wiichite mbuli mbuwakachita Jerikko amwaami wayo, pesi mulakonzya kubweza zintu zyayo azivuubwa zyayo. Usale bantu batabwatilile kusule aamuunzi.”
3 Nkinkaako, Joshuwa abaalumi boonse bankondo bakayinka kuyoolwana Ayi. Joshuwa wakasala basilumamba bali aamanguzu bali 30 000 mpawo wakabatuma mansiku. 4 Wakabalayilila kuti: “Mweelede kubwatilila muunzi nkuuli kusule. Mutayinki kule pe anguwo, mukkale kamulibambilide moonse. 5 Ime abantu boonse mbindili aabo tulalulama muunzi. Nibazwa kuti bazoolwane aandiswe mbuli mbubakachita kumatalikilo, tulabachija. 6 Nibatwaandilila, tulabachija tubasisye kule amuunzi, nkaambo bazoowamba kuti, ‘Balikutuchija mbuli mbubakachita kumatalikilo.’ Mpawo tuzoobachija. 7 Mpawo inywe mweelede kubbutunuka mubweze muunzi; Jehova Leza wanu uzoomupa muunzi ooyu. 8 Mbumutawubweze biyo muunzi ooyu, mweelede kuutenta. Mweelede kuchita kweendelana ajwi lyaJehova. Ndamubuzya nzimweelede kuchita.”
9 Mpawo Joshuwa wakabatuma, baakubwata; bakabwata aakati kaBbeteli a-Ayi, kububbila kwa-Ayi, pesi mubusiku oobo, Joshuwa wakoona aabantu mbaakali aabo.
10 Joshuwa wakafuma wabunganizya basilumamba mpawo we abaalu bama-Israyeli bakayinkaabo ku-Ayi. 11 Baalumi boonse bankondo mbaakali aabo bakeenda balulama kunembo aamuunzi. Bakakkempa kubbazu lyakunyika kwa-Ayi, aakati kabo amuunzi wa-Ayi kwakali kkuti.* 12 Aachiindi eecho, wakali wabweza baalumi basika ku 5 000 mbaakabikka kuti babwate aakati kaBbeteli a-Ayi, kububbila kwamuunzi. 13 Nkinkaako, bantu bakachita nkamu mpati kubbazu lyakunyika lyamuunzi, mpawo imwi nkamu yakali kububbila kwamuunzi. Mpawo mubusiku oobo, Joshuwa wakayinka aakati kakkuti.*
14 Mwaami wa-Ayi naakazibona, wakafuma abaalumi bamuunzi kuti bakalwane aama-Israyeli kundawu iilangene aankanda. Pesi taakazi pe kuti kuli bamwi bakamubwatilide kusule aamuunzi. 15 Baalumi bamu-Ayi nibakasika kuti bazoobalwane, Joshuwa ama-Israyeli boonse bakachija kababelesya mugwagwa wamunkanda. 16 Bantu boonse bamumuunzi bakabuzigwa kuti babaandilile, mpawo nibakaandilila Joshuwa, bakatolwa kule amuunzi. 17 Baalumi boonse bamu-Ayi akuBbeteli bakazwa kuti bakaandilile ma-Israyeli, taakwe wakasyaala pe. Bakawusiya bukwazi muunzi baandilila ma-Israyeli.
18 Mpawo Jehova wakati kuli Joshuwa: “Tondeka sumu ndujisi ku-Ayi, nkaambo muunzi ooyu ndilawubikka mukuboko kwako.” Nkinkaako, Joshuwa wakatondeka sumu kumuunzi ooyo. 19 Mbaakatandabika biyo kuboko kwakwe, baalumi bakabwatide bakabbutunuka mpubakabede bachijaanina mumuunzi mpawo bakawubweza. Bakawutenta muunzi ooyo mpawaawo.
20 Baalumi baku-Ayi nibakacheba, bakabona busi bwamuunzi kabuli kuuntumuka kuya mujulu. Teebakachilikwe manguzu aakuchija pe. Bantu bakali kubachija kabatozya kunkanda, bakasaanguna kubaandilila. 21 Joshuwa ama-Israyeli boonse nibakabona kuti baalumi bakabwatilide muunzi bawubweza, anibakabona busi kabuli kuuntumuka mumuunzi, bakachengunuka akusaanguna kulwana baalumi baku-Ayi. 22 Baalumi bakali mumuunzi bakazwa kuti bazooswaanane aabo, zyakuti baalumi baku-Ayi bakaba aakati. Bamwi ma-Israyeli bakali kubbazu limwi, bamwi kabali kubbazu limbi, mpawo bakabajaya zyakuti taakwe naaba uumwi wakafutuka naakuti wakachija. 23 Pesi mwaami wa-Ayi bakamujata kachili muumi mpawo bakamutola kuli Joshuwa.
24 Ma-Israyeli nibakamaninsya kujaya bantu boonse apanga bamu-Ayi mbibakali kwandilila munkanda, ma-Israyeli boonse bakabweeda ku-Ayi baakwiinyonyoona apanga. 25 Bantu boonse bamu-Ayi bakajayigwa mubuzuba oobo, baalumi abanakazi bakali kusika ku 12 000. 26 Joshuwa taakaleka pe kutondeka sumu lyakwe kusikila banyonyoonwa bantu boonse bamu-Ayi. 27 Nikuba oobo, ma-Israyeli bakabweza zivuubwa azintu zyamumuunzi kuti zibe zyabo, kweendelana amalayilile Jehova ngaakapa Joshuwa.
28 Joshuwa wakatenta muunzi wa-Ayi mpawo wakawusiya kalili tongo lichiliwo kusika sunu. 29 Joshuwa wakaanzika mwaami wa-Ayi aachisamu* kusika goko, zuba nilyakaamba kubbila, Joshuwa wakalayilila kuti mubili wamwaami ooyo waangulwe aachisamu. Bakamuwaalila kumanjililo aageedi lyamuunzi mpawo bakamulundika mulwi wamabwe mupati, uuchiliko kusikila sunu.
30 Mpawo Joshuwa wakayakila Jehova Leza wa-Israyeli chipayililo aaChilundu cha-Ebbali 31 mbuli Mozesi mubelesi waJehova mbaakalayilila ma-Israyeli kweendelana ambukulembedwe mubbuku lyaMulawu waMozesi kuti: “Nchipayililo chamabwe aakkwene, aatabezedwe aachibelesyo chansimbi. Bakapa Jehova zipo zitentwa azipayizyo zyalumvwanano aali nchicho.”
32 Mpawo aamabwe aayo, wakalemba Mulawu Mozesi ngwaakalemba kunembo lyama-Israyeli. 33 Ma-Israyeli boonse, baalu babo, basilutwe ababetesi babo bakaliimvwi mumabazu woonse aaBbokesi kunembo lyabapayizi maLevi bakanyampwide bbokesi lyachizuminano chaJehova. Beenzu ama-Israyeli boonse bakaliwo. Hafu yabantu yakayimvwi kunembo lyaChilundu chaGerizimu mpawo imwi yakayimvwi aaChilundu cha-Ebbali, kweendelana aMozesi mubelesi waJehova mbaakalayilila kuti alongezye* bantu. 34 Kuzwa waawo, wakaabalila aajulu majwi woonse aaMulawu, zilongezyo alutuko, kweendelana amajwi woonse alembedwe mubbuku lyaMulawu. 35 Kumajwi woonse Mozesi ngaakalayilila, taakwe jwi Joshuwa ndyaakaleka kubalila aajulu kunembo lyambungano yoonse yama-Israyeli, kuswaanizya abanakazi abana abeenzu bakakkede* aakati kabo.