Johane Wakusaanguna
3 Amubone mbululi lupati luyando Taata ndwaakatutondeezya, kuti twiitwe kuti tuli bana baLeza! Alino, tuli bana bakwe. Nzizyo zipede kuti nyika itatuzibi pe nkaambo tayimuzi pe. 2 Nibayandwa, lino twaba bana baLeza pesi takunayubununwa pe kuti tuzooba biyeni. Tulizi kuti aakuyubununwa, tuzooba mbuli nguwe nkaambo tuzoomubona mbuli mbabede choonzyo. 3 Alubo muntu woonse uuli aabulangilizi oobu mulinguwe, ulalisalazya mbuli mbasalala anguwe ooyo.
4 Muntu woonse uuli aachiimbo chakuchita chibi, ulikutyola mulawu alubo chibi nkutyola mulawu. 5 Andinywe mulizi kuti wakayubununwa kuti agwisye zibi zyesu, alubo mulinguwe tamukwe chibi pe. 6 Muntu woonse wiinkilila kunembo kubaamwi anguwe, takwe chiimbo chakuchita chibi pe, taakwe muntu uuli aachiimbo chakuchita chibi wakamubwene naakuti uumuzi. 7 Nibana, kutabi muntu uumweena pe, muntu uukkala kachita zintu ziluleme, uliluleme mbuli mbaluleme anguwe ooyo. 8 Muntu uuli aachiimbo chakuchita chibi, uzwa kuli Dyabbulosi nkaambo Dyabbulosi wakali kubisya kuzwa kumatalikilo.* Mwana waLeza wakayubununwa kuchitila kuti anyonyoone milimu yaDyabbulosi.
9 Muntu woonse wakazyalwa kuli Leza, takwe chiimbo chakuchita chibi pe, nkaambo mbuto* yaLeza ilakkalilila mulinguwe, alubo takwe chiimbo chakuchita chibi pe, nkaambo wakazyalwa kuli Leza. 10 Bana baLeza abana baDyabbulosi baboneka oobu: Muntu woonse uutachiti ziluleme, tazwi kuli Leza pe, naaba ooyo uutayandi mukombinyina. 11 Nkaambo ooyu nguumulumbe ngumwakamvwa kuzwa kumatalikilo, kuti tweelede kuyandana, 12 tutachiti mbuli Kkayini, ooyo wakazwa kumubi mpawo wakajaya mwanikaakwe. Nkamboonzi naakamujaya? Nkaambo milimu yakwe yakali mibi pesi yamwanikaakwe yakaliluleme.
13 Bakombima, mutagambi pe kuti nyika ilamuzonda. 14 Tulizi kuti twakazwa kulufu mpawo twaya kubuumi, nkaambo tulabayanda bakombima. Muntu uutakwe luyando, ulakkalilila mulufu. 15 Muntu woonse uuzonda mukombinyina, mujayi alubo mulizi kuti taakwe mujayi uuli aabuumi butamani mulinguwe. 16 Kwiinda mumakani aaya, twaluziba luyando, nkaambo ooyo wakapa buumi bwakwe akaambo kandiswe, andiswe tweelede kupa buumi bwesu akaambo kabakombima. 17 Pesi kufumbwa muntu uuli aazintu zyakuponaazyo zyamunyika eeyi mpawo wabona mukombinyina katakwe nchalaacho, mpawo waleka kumufwida luzyalo, kuyanda Leza nkwachita kulaali biya? 18 Nibana, luyando lwesu talweelede kuba lwamajwi naakuti lwaamulomo, pesi alube lwamichito alwakasimpe.
19 Kwiinda mumakani aaya, tuzooziba kuti tuli aakasimpe, alubo tuzoopa kuti myoyo yesu ibe aachoonzyo kunembo lyakwe 20 muzintu zyoonse myoyo yesu mwiikonzya kutupa mulandu, nkaambo Leza mupati kwiinda myoyo yesu alubo ulizizi zintu zyoonse. 21 Nibayandwa, kuti myoyo yesu kayitatupi mulandu, tuli aalwaangunuko lwakwaambuula kuli Leza, 22 alubo kufumbwa zintu nzitukumbila, tulazitambula kuzwa kulinguwe, nkaambo tulikubamba milawu yakwe alubo tulikuchita zintu zibotu mumeso aakwe. 23 Kwaamba choonzyo, ooyu ngumulawu wakwe: wakuti tube aalusyomo muzina lyaMwanaakwe Jesu Kkristu, akuti tuyandane mbuli mbaakatupa mulawu. 24 Mukuyungizya, muntu uubamba milawu yakwe, uliinkilila kunembo kubaamwi anguwe, anguwe unoolaamwi amuntu ooyo. Alubo kwiinda mumuuya ngwaakatupa, tulizi kuti uliinkilila kunembo kubaamwi andiswe.