Babetesi
10 Abbimelekki naakafwa, kwakatobela Tola mwana waPuwa mwana waDodo, wamusyobo wa-Isakkara kuti avune ma-Israyeli. Wakali kukkala muShamiri muchilawu chili aazilundu cha-Efremu. 2 Wakabeteka Israyeli kwaminyaka iili 23. Mpawo wakafwa wazikkwa muShamiri.
3 Musule lyakwe, wakatobelwa aaJayiri muGiliyadi, ooyo wakabeteka Israyeli kwaminyaka iili 22. 4 Wakali aabana balombe bali 30 bakali kutanta madonki aali 30, ibakali aamyuunzi iili 30 iichiitwa kuti Havoti-jayiri kusikila sunu; iili munyika yaGiliyadi. 5 Mpawo Jayiri wakafwa wazikkwa muKkamoni.
6 Ma-Israyeli bakachita lubo zintu zibi mumeso aaJehova, bakasaanguna kubelekela baBbaala, zikozyano zya-Ashitoreti, baleza ba-Aramu,* baleza baSidoni, baleza baMowabbu, baleza bama-Amoni, abaleza bamaFilisiti. Bakasiya Jehova akuleka kumubelekela. 7 Mpawo bukali bwaJehova bwakabavutukila ma-Israyeli alubo wakababikka mumaboko aabaFilisiti ama-Amoni. 8 Nkinkaako, mumunyaka ooyo bakabapenzya loko akubadyaaminina ma-Israyeli—kwaminyaka iili 18, bakapenzya ma-Israyeli boonse bakali kukkala mutala aaJodani munyika yakali yama-Amori muGiliyadi. 9 Ma-Amoni bakali kuzubuka Jodani kuti bakalwane aaJuda aBbenjamini ang’anda ya-Efremu; ma-Israyeli bakoomba loko. 10 Mpawo ma-Israyeli bakayita Jehova kuti abagwasye, kabati: “Twakakubisizya, nkaambo twakakusiya Leza wesu kuti tukakombe baBbaala.”
11 Pesi Jehova wakati kuma-Israyeli: “Teendakamuvuna na ku-Ijipita akuma-Amori, kuma-Amoni, kumaFilisiti, 12 kumaSidoni, kuma-Amalekki, akumaMidiyani chiindi nibakali kumudyaaminina? Chiindi nimwakandililila, ndakamuvuna mukuboko kwabo. 13 Pesi mwakandisiya mwaakubelekela bamwi baleza. Aaka nkikaambo kapa kuti nditamuvuni lubo pe. 14 Amwiinke mukayite baleza mbimwakasala kuti bamugwasye. Abamuvune kumapenzi aanu.” 15 Pesi ma-Israyeli bakati kuli Jehova: “Twakabisya. Chita nzubona kuti nzibotu mumeso aako. Twakombelela, tuvune buzuba oobuno.” 16 Bakagwisya baleza beenzu bakali aakati kabo mpawo bakakomba Jehova, nkaambo Leza taakachili kukonzya pe kwaalanga biyo mapenzi aabo.
17 Nikwakayinda chiindi, ma-Amoni bakabungana bakkempa kuGiliyadi ambabo ma-Israyeli bakabungana bakkempa kuMizipa. 18 Bantu abasilutwe baGiliyadi bakabuzyania kuti: “Ngwani uutatuzulwide kuti tukalwane aama-Amoni? Muntu ooyo abe silutwe wabantu boonse bamuGiliyadi.”