Babetesi

17 Kwakali umwi mwaalumi uutegwa Mikka, wakali kukkala muchilawu chili aazilundu cha-Efremu. 2 Wakabuzya banyina kuti: “Nsiliva eeziya zili 1 100 nzimwakali kuyanduula mane mwatuka kandimvwide, zili kulindime. Ndime ndakazibweza.” Mpawo banyina bakaamba kuti: “Jehova akulongezye* mwanaangu.” 3 Nkinkaako, wakabweedezya banyina nsiliva zili 1 100, pesi banyina bakaamba kuti: “Nsiliva eeyi iili mukuboko kwangu ndilayipa* kuli Jehova kuchitila kuti mwanaangu ayibelesye kupanga chikozyano chibezedwe achifanikisyo chansimbi.* Mpawo ndilayibweedezya kulinduwe.”

4 Naakabweedezya nsiliva eeyo kuli banyina, bakabweza nsiliva zili 200 bazipa sikufula. Mpawo wakapanga chikozyano chibezedwe achifanikisyo chansimbi* mpawo zyakabikkwa mung’anda yaMikka. 5 Mikka wakali aang’anda yabaleza. Wakapanga kabaki kabupayizi, azibumbwa* mpawo wakabikka mwanaakwe umwi kuti abe mupayizi wakwe. 6 Mumazuba aayo, mu-Israyeli teemwakalikwe mwaami pe. Umwi awumwi wakali kuchita nzyaakali kubona kuti nzizyo ziluleme mumeso aakwe.

7 Kwakali mulombe wakuBbetelehema iili muJuda iwakali wamumpuli yaJuda. Wakali muLevi ooyo wakali waba aachiindi kakkala nkukooko. 8 Mulombe ooyo wakazwa mumuunzi waBbetelehema iili muJuda kuti akayanduule ndawu yakukkala. Kachili munzila, wakasika muchilawu chili aazilundu cha-Efremu kung’anda yaMikka. 9 Mpawo Mikka wakamubuzya kuti: “Uzwa kuli?” Mulombe ooyo wakasandula kuti: “Ndili muLevi wakuBbetelehema iili muJuda, ndiyabuyanduula ndawu yakukkala.” 10 Mikka wakamubuzya kuti: “Kkala aandime ube ndeende* amupayizi wangu. Ndinookupa nsiliva zili kkumi amunyaka azigogo achakulya.” Mpawo muLevi wakanjila. 11 Nkinkaako, muLevi wakazumina kukkala aamwaalumi ooyo, mpawo wakaba mbuli umwi wabana bakwe. 12 Kuzwa waawo, Mikka wakabikka muLevi ooyo kuti abe mupayizi wakwe, mpawo wakakkala mung’anda yaMikka. 13 Mpawo Mikka wakati: “Lino ndaziba kuti Jehova unoondichitila zibotu, nkaambo muLevi waba mupayizi wangu.”