Babetesi
2 Mpawo ngilozi yaJehova yakazwa kuGiligali yaya kuBbokkimu, mpawo yakati: “Ndakamugwisya mu-Ijipita ndamweeta munyika njindakakonkezya kumasianyookulu. Alubo ndakati, ‘Tandizoochityoli pe chizuminano nchindakapangana aandinywe. 2 Inywe tamweelede kupanga chizuminano abantu bakkala munyika eeyo, mweelede kudilisya zipayililo zyabo.’ Pesi teemwakaliswiilila pe jwi lyangu. Mwakazichitilaanzi eezi? 3 Nchindakaamba kuti: ‘Tandizoobatandi pe kunembo lyanu, bazooba kakole kulindinywe, baleza babo bazoomoongelezya.’”
4 Ngilozi yaJehova niyakaamba majwi aaya kuma-Israyeli boonse, bantu bakasaanguna kubobola. 5 Nkinkaako, ndawu eeyo bakayuuzika kuti Bbokkimu,* mpawo bakapa zipayizyo kuli Jehova kundawu eeyo.
6 Joshuwa naakalekela bantu kuti beende, mu-Israyeli umwi awumwi wakayinka kulukono lwakwe kuti akabweze nyika. 7 Bantu bakali kubelekela Jehova mumazuba woonse aaJoshuwa amumazuba woonse aabaalu bakasyaala kabali bawumi Joshuwa naakafwa, ibakabona milimu yaJehova yoonse mipati njaakachitila ma-Israyeli. 8 Mpawo Joshuwa mwana waNuni mubelesi waJehova wakafwa kali aaminyaka iili 110. 9 Nkinkaako, bakamuzikka muchilawu chalukono lwakwe muTiminati-heresi, muchilawu chili aazilundu cha-Efremu, kubbazu lyakunyika lyaChilundu chaGaashi. 10 Zyalani lyoonse eelyo lyakafwa lyazikkwa mbuli mbukwakazikkwa masianyinakulu mpawo kwakaba limbi zyalani lyakatamuzi pe Jehova, niziba zintu nzyaakachitila ma-Israyeli.
11 Nkinkaako, ma-Israyeli bakachita zintu zibi mumeso aaJehova alubo bakabelekela* baBbaala. 12 Bakasiya Jehova Leza wamawisi ooyo wakabagwisya munyika ya-Ijipita mpawo bakatobela bamwi baleza, baleza babantu boonse bakabazyungulukide alubo bakabakotamina akunyemya Jehova. 13 Bakasiya Jehova mpawo bakabelekela Bbaala azikozyano zya-Ashitoreti. 14 Mpawo bukali bwaJehova bwakavutukila ma-Israyeli, nkinkaako, wakababikka mumaboko aabasinkondonyina, ibakabanyanga zintu zyabo. Wakabawuzya kuli basinkondonyina bakabazyungulukide alubo teebakachili kukonzya pe kuzunda basinkondonyina. 15 Kufumbwa nkubakali kuya, kuboko kwaJehova kwakali kubalwana akubeetela mapenzi mbuli mbaakali waamba Jehova ambuli mbaakali wakonka Jehova kulimbabo, bakaba mumapenzi mapati. 16 Jehova wakali kubapa babetesi bakali kubavuna mukuboko kwabasinkondonyina bakali kubanyanga zintu.
17 Pesi bakakaka kuswiilila nikuba kubabetesi mpawo bakachita bwaamu abamwi baleza akubakotamina. Bakafwambaana kuzwa munzila masianyinakulu njibakeendaayo, aabo bakali kuswiilila milawu yaJehova. Bakakachilwa kuchita oobo. 18 Kufumbwa chiindi Jehova naakali kubapa babetesi, Jehova wakali kuba aamubetesi ooyo kabavuna mukuboko kwabasinkondonyina mazuba woonse aamubetesi ooyo; nkaambo Jehova wakali kubeetelela* akaambo kakusinta kwabo kwakali kweetwa aabaabo bakali kubadyaaminina abaabo bakali kubajata chalunya.
19 Pesi kuti mubetesi wafwa, bakali kubisya kwiinda mawisi kabali kutobela bamwi baleza, kubabelekela akubakotamina. Teebakayileka pe milimu yabo akuyumya mitwe. 20 Mpawo bukali bwaJehova bwakavutukila ma-Israyeli mpawo wakati: “Akaambo kakuti chisi eechi chatyola chizuminano changu nchindakalayilila masianyinakulu akuleka kundiswiilila, 21 andime taakwe chisi nichiba chimwi nchindizootanda kuzisi nzyaakasiya Joshuwa naakafwa. 22 Eezi zizoosunka ma-Israyeli kuti kuboneke kuti bazooyibamba na nzila yaJehova kwiinda mukweenda mulinjiyo mbuli mbaakachita mawisi.” 23 Nkinkaako, Jehova wakazileka zisi eezi kuti zisyaale. Taakazitanda pe mpawaawo alubo taakazibikka mukuboko kwaJoshuwa pe.