Baami Wakusaanguna

6 Mumunyaka wachi 480 kuzwa ma-Israyeli* nibakazwa munyika ya-Ijipita, mumunyaka wachine kuzwa Solomoni naakaba mwaami wa-Israyeli, mumweezi waZivi* (nkukwaamba mweezi wachibili), Solomoni wakasaanguna kuyaka ng’anda yaJehova.* 2 Ng’anda eeyo Mwaami Solomoni njaakayakila Jehova yakali kulampa makkiyubbiti* aali 60, makkiyubbiti aali 20 mubusasa, amakkiyubbiti aali 30 kuya mujulu. 3 Wakayaka vulandi lyatempele lyakali kulampa makkiyubbiti aali 20, bulamfu* bwalyo bwakaleelene abusasa bwang’anda. Busasa bwalyo bwakali makkiyubbiti aali kkumi kuzwa mpulyakali kujatana aang’anda.

4 Wakapanga mawindo aang’anda, mapati mukati, pesi kaayabucheya aanze. 5 Mukuyungizya, wakayaka umwi muduli wakali kumbali aamuduli wang’anda. Muduli ooyo wakali kuzyunguluka muduli wang’anda, nkukwaamba muduli watempele* awakaanda kamukati, alubo aakati kamuduli ooyo amuduli wang’anda, wakapanga twaanda twamumbali mumabazu woonse. 6 Twaanda twamunsi, twakali makkiyubbiti aali musanu mubusasa, twaanda twaakati twakali makkiyubbiti aali musanu alimwi mubusasa, alubo twaanda twaajulu twakali makkiyubbiti aali musanu aabili mubusasa, nkaambo wakayaka zyakutaba zyakali kuzyunguluka ng’anda yoonse, kuchitila kuti kutabi chintu chinjizigwa kumiduli yang’anda.

7 Ng’anda yakayakwa aamabwe aakasyigwa alubo aakanengedwe kale, zyakuti taakwe musindo wansando nuuba wakaleba* nuuba wachibelesyo chansimbi wakamvwika mung’anda chiindi niyakali kuyakwa. 8 Mulyango watwaanda twamumbali twamunsi wakali kubbazu lyakumusanza* kwang’anda, alubo kwakali matantilo aazyunguluka aakali kutanta kaaya kutwaanda twaakati, alubo akali kwiinda aatwaanda twaakati kaaya kutwaanda twaajulu. 9 Wakayinkilila kunembo kuyaka ng’anda kusikila yamana, alubo wakavumba ng’anda kabelesya zisamu zyamukkedari amapulanga aamukkedari. 10 Wakayaka twaanda twamumbali twakali kuzyunguluka ng’anda yoonse, kaanda kamwi akamwi kakali makkiyubbiti aali musanu kuya mujulu, alubo twakajatanizigwa aang’anda kakubelesegwa masamu aamukkedari.

11 Aachiindi nchicheecho, ijwi lyaJehova lyakasikila Solomoni kaliti: 12 “Kuti weenda kutobela malayilile aangu, wabamba mbeta zyangu akuswiilila milawu yangu yoonse kwiinda mukweenda mulinjiyo, andime ndizoozuzikizya chisyomezyo changu kulinduwe nchindakaamba kuli Davida wuso atala ang’anda eeyi njulikuyaka. 13 Ndizookkala aakati kama-Israyeli, alubo tandizoobasiyi pe bantu bangu ma-Israyeli.”

14 Solomoni wakayinkilila kunembo kuyaka ng’anda kusikila wayimaninsya. 15 Miduli yamukati kang’anda wakayibikka mapulanga aamukkedari. Wakabikka mapulanga aamiduli yamukati kuzwa aansi aang’anda kusika kumapulanga aasiling’i, alubo aansi wakayala mapulanga aamujunipa. 16 Alubo wakagaanuna ng’anda aakati kabelesya mapulanga aamukkedari mpawo chipanzi chakusule chang’anda mwiili mukati chakali makkiyubbiti aali 20, kuzwa aansi kusika kumapulanga aakuchiluli. Mukati kang’anda wakapanga kaanda kamukati, nkukwaamba Ndawu Iisalalisya. 17 Mpawo tempele*—chipanzi chang’anda chilikunembo kwayo—chakali makkiyubbiti aali 40. 18 Mapulanga aamukkedari aamukati kang’anda akabezedwe* zifanikisyo zyatutanga twamusokwe* amaluba aakafulula. Koonse yakazwide mapulanga aamukkedari. Taakwe bbwe lyakali kuboneka pe.

19 Alubo wakabamba kaanda kamukati, mutempele, kuchitila kuti abikke bbokesi lyachizuminano chaJehova. 20 Kaanda kamukati kakali kulampa makkiyubbiti aali 20, makkiyubbiti aali 20 mubusasa, amakkiyubbiti aali 20 kuya mujulu. Wakakazilulula aangolida iisalalisya. Mpawo wakanamatika chipayililo amapulanga aamukkedari. 21 Solomoni wakazilulula mukati kang’anda angolida iisalalisya, alubo wakabikka ncheni zyangolida kunembo aakaanda kamukati kakazilulwidwe aangolida. 22 Wakazilulula ng’anda yoonse angolida kusikila yoonse yamana. Alubo wakazilulula chipayililo choonse angolida chakali aafwiifwi akaanda kamukati.

23 Mukaanda kamukati wakapanga makkerubbi aabili kabelesya munsamu wamupayini,* kkerubbi limwi alimwi lyakali kulampa makkiyubbiti aali kkumi. 24 Bbaba limwi lyakkerubbi lyakali makkiyubbiti aali musanu, mpawo limwi bbaba lyakali makkiyubbiti aali musanu. Kuzwa kumpela aalimwi bbaba kusika kumpela aalimwi bbaba, akali makkiyubbiti aali kkumi. 25 Andilyo kkerubbi lyachibili lyakali makkiyubbiti aali kkumi. Makkerubbi aaya kaali aabili akaleelene, kaakozyenie. 26 Kkerubbi limwi lyakali kulampa makkiyubbiti aali kkumi mbuli mbulyakabede limwi kkerubbi. 27 Mpawo wakabikka makkerubbi aayo mukaanda kamukati.* Mababa aamakkerubbi akalijulikide zyakuti bbaba limwi lyakkerubbi lyakali kuguma kumuduli, abbaba lyakkerubbi limbi lyakali kuguma kuluumwi muduli. Mpawo amwi mababa aawo akalijulikide kaasika aakati kang’anda, zyakuti mababa aayo akaligumeene. 28 Alubo wakazilulula makkerubbi angolida.

29 Kumiduli yoonse yang’anda, nkukwaamba mukaanda kamukati akaanze,* wakabeza* zifanikisyo zyamakkerubbi, zyatukunka amaluba aakafulula. 30 Wakazilulula aansi mung’anda angolida, nkukwaamba mukaanda kamukati amukaanda kaanze. 31 Mpawo aamulyango wakaanda kamukati wakapanga makoma aamupayini, mapila aamumbali aminsende,* kaali chipanzi chasanu.* 32 Makoma aabili akapangidwe aamupayini, mpawo aalingawo wakabeza* zifanikisyo zyamakkerubbi, zyatukunka amaluba aakafulula, alubo wakaazilulula aangolida. Mpawo wakawuminina ngolida aamakkerubbi kuswaanizya aatukunka. 33 Mbuboobu mbaakapanga minsende* yamupayini yamulyango waatempele,* yachipanzi chane.* 34 Mpawo wakapanga makoma aamujunipa aabili. Kkoma limwi lyakali aazipanzi zibili zyakali kuzyunguluka aamahinji, mpawo limbi kalili aazipanzi zibili zyakali kuzyunguluka aamahinji. 35 Aalingawo wakabeza* zifanikisyo zyamakkerubbi, zyatukunka amaluba aakafulula, mpawo wakazizilulula aangolida.

36 Wakayaka muduli wakali kuzyunguluka lubuwa lwamukati. Muduli ooyo wakali aaminchali iitatu yiilikene yamabwe aakanengedwe, amunchali uumwi wamapulanga aamukkedari.

37 Mumunyaka wachi 4, mumweezi waZivi,* ntalisyo yang’anda yaJehova yakali yabikkwa. 38 Mpawo mumunyaka wachi 11 mumweezi waBbuli* (nkukwaamba mweezi wamusanu ayitatu), ng’anda yakamana azyoonse zyakali kulangililwa aalinjiyo kweendelana apulani yayo. Wakayiyaka kwaminyaka iili musanu ayibili.