Baami Wakusaanguna
5 Hiramu mwaami waTire naakamvwa kuti Solomoni wananikwa kuba mwaami mundawu yawisi, wakatuma babelesi bakwe kuli Solomoni, nkaambo Hiramu wakali mweenzinyina waDavida* kuzwa chiindi. 2 Anguwe Solomoni wakalayizya mulayizyo kuli Hiramu wakuti: 3 “Uzizi loko kuti ndeende Davida taakakonzya pe kuyaka ng’anda yiitwa aazina lyaJehova Leza wakwe, akaambo kakulwanwa nkwaakali kuchitwa mumabazu woonse kusikila Jehova naakabikka basinkondonyina kunsi aandyato zyamawulu aakwe. 4 Pesi lino Jehova Leza wangu wapa kuti ndipumune mumabazu woonse. Taakwe muntu uuli kundikazya pe, alubo taakwe zibi zilikuchitika pe. 5 Nkinkaako, ndayeeya kuyaka ng’anda yiitwa aazina lyaJehova Leza wangu mbuli Jehova mbaakasyomezya Davida ndeende naakati: ‘Mwanaako ngunditazoobikke aachuuno chabwaami mundawu yako, nguwe uutazooyake ng’anda yiitwa aazina lyangu.’ 6 Layilila bantu bako kuti bandigonkele masamu aamukkedari aakuLebbanoni. Babelesi bangu balabelekaamwi ababelesi bako. Alubo ndilabbadala babelesi bako kweendelana ambadalo njutaambe, nkaambo uzizi loko kuti aakati kesu taakwe muntu naba uumwi uuzi kugonka minsamu mbuli maSidoni.”
7 Hiramu naakamvwa majwi aaSolomoni wakabotelwa loko mpawo wakati: “Atembawulwe Jehova sunu, nkaambo wapa Davida mwana musongo kuti ayendelezye bantu aaba biingi loko!” 8 Nkinkaako, Hiramu wakatumizya mulayizyo kuli Solomoni wakuti: “Ndawumvwa mulumbe ngwaanditumizya. Ndilakuchitila zyoonse nzuyanda, ndilakupa zisamu zyamukkedari azyamujunipa. 9 Babelesi bangu balazikunusya kuzwa kuLebbanoni bazitole kulwizi mpawo ndilazyaangaamwi kuti zyiinde mulwizi ziye kundawu njutandibuzye. Ndiyoozipasuula nkukooko, mpawo iwe uzoozibweza. Iwe uzoondipa chakulya nchinditazookumbile chakupa bamung’anda yangu.”
10 Nkinkaako, Hiramu wakapa Solomoni zisamu zyoonse zyamukkedari azyamujunipa nzyaakali kuyanda. 11 Anguwe Solomoni wakapa Hiramu makkore* aawiiti aali 20 000 kuti chibe chakulya chabamung’anda yakwe, amakkore aali 20 aamafuta mabotu loko aama-olifa.* Eezi nzizyo Solomoni nzyaakali kupa Hiramu munyaka amunyaka. 12 Jehova wakapa Solomoni busongo mbuli mbaakali wamusyomezya. Kwakali luumuno aakati kaHiramu aSolomoni, alubo bakapangana chizuminano kabali babili.
13 Mwaami Solomoni wakayita baalumi aakati kama-Israyeli boonse kuti babeleke milimu iimizya. Kwakayitwa baalumi bali 30 000. 14 Wakali kubatuma kuLebbanoni kabali mutubunga twabantu bali 10 000 mweezi amweezi. Bakali kukkala mweezi uumwi kuLebbanoni mpawo myeezi iibili bakali kumyuunzi yabo. Adoniramu nguwe wakali kulanga aabo bakayitwa kuti babeleke milimu iimizya. 15 Solomoni wakali aababelesi* batakwe luzibo bali 70 000 abasikunenga mabwe muzilundu bali 80 000, 16 kuswaanizya abalangizi baSolomoni bali 3 300, aabo bakali kufolomya bantu bakali kubeleka. 17 Kwiinda mukulayililwa aamwaami, bakasya mabwe mapati, mabwe aadula, kuti babikke ntalisyo yang’anda kababelesya mabwe aanengedwe. 18 Nkinkaako, bayaki baSolomoni abayaki baHiramu amaGebbali bakanenga mabwe alubo bakachita zyoonse ziyandikana kuti masamu amabwe abelesegwe kuyaka ng’anda.