Baami Wakusaanguna

7 Solomoni wakayaka ng’anda yakwe* kwaminyaka iili 13 kusikila ng’anda yoonse yamana.

2 Alubo wakayaka Ng’anda yaLusaka lwakuLebbanoni yakali kulampa makkiyubbiti* aali 100, makkiyubbiti aali 50 mubusasa, amakkiyubbiti aali 30 kuya mujulu. Wakayiyaka aajulu aaminchali iine yamapila aamukkedari. Alubo kwakali zisamu zyamukkedari aajulu aamapila aayo. 3 Ng’anda eeyo yakagankaminidwe mapulanga aamukkedari. Mapulanga aayo akali aajulu aazisamu zyakali kwiinga zyakakkede aamapila. Zyakali* 45, mumunchali umwi awumwi zyakali 15. 4 Kwakali minchali iitatu yamawindo, alubo minchali eeyo yakaliilikene. Windo limwi alimwi lyakalangene aalimwi windo lyakali kuli limwi bbazu. 5 Milyango yoonse aminsende* yakaleelene mumabazu woonse aane, mbuli mbukwakabede kunembo aamawindo aakalangene, aayo aakali muminchali iitatu yiilikene.

6 Alubo wakayaka Ng’anda yaMapila* yakali kulampa makkiyubbiti aali 50 amakkiyubbiti aali 30 mubusasa, mpawo kunembo kwayo kwakali vulandi lyamapila akaluli.

7 Wakayaka Ng’anda yaChuuno chaBwaami, oomo mwaakali kubetekela—Ng’anda yaKubetekela—alubo bakayiyaka kababelesya masamu aamukkedari kuzwa aansi kusika kumapulanga aakuchiluli.

8 Ng’anda* njaakali kuzookkala yakuli lumwi lubuwa, yakali kusule aaNg’anda yaKubetekela. Yakayakidwe munzila iikozyenie aaNg’anda yaKubetekela. Alubo wakayaka ng’anda yakakozyenie aaNg’anda yaKubetekela kuti ibe yamwana musimbi waFaro ngwaakakwata.

9 Mayake woonse aaya akayakidwe aamabwe aakanengedwe aadula loko kweendelana akupimwa kwawo, akanengululwa kakubelesegwa saha yamabwe, mukati akunze, kuzwa aantalisyo kusika aajulu aamuduli, akuzwa aanze kusika kulubuwa lupati. 10 Ntalisyo yakayakwa aamabwe mapati aadula. Amwi mabwe akali makkiyubbiti aali kkumi, mpawo amwi akali makkiyubbiti aali musanu aatatu. 11 Aajulu aawo, kwakali mabwe aadula aakanengedwe kweendelana akupimwa kwawo kuswaanizya amasamu aamukkedari. 12 Muduli wakazyungulukide lubuwa lupati wakali minchali iitatu yiilikene yamabwe aanengedwe amunchali uumwi wazisamu zyamukkedari, mbuli mbwaakabede muduli walubuwa lwamukati lwang’anda yaJehova avulandi lyang’anda.

13 Mwaami Solomoni wakatuma bantu kuti bakayite Hiramu kuTire, mpawo Hiramu wakasika. 14 Wakali mwana wamukamufu wamusyobo waNafutali, alubo wisi wakali sikupanga zintu zyakkopa* wakuTire. Wakali aaluzibo lwiingi lwakupanga zintu, wakali aamaanu alubo wakali kukonzya kupanga zintu zyoonse zyakkopa.* Hiramu wakasika kuMwaami Solomoni mpawo wakamubelekela milimu yakwe yoonse.

15 Wakapanga mapila aabili aakkopa. Pila limwi alimwi lyakali kulampa makkiyubbiti aali 18 kuya mujulu, alubo ntambo iilampa makkiyubbiti aali 12 njiyo yakali kukonzya kuzyunguluka pila limwi alimwi. 16 Mpawo wakapanga mitwe yakkopa iibili yakubikka aajulu aamapila. Umwi mutwe wakali kulampa makkiyubbiti aali musanu kuya mujulu mpawo umwi mutwe, makkiyubbiti aali musanu kuya mujulu. 17 Mutwe umwi awumwi wakali aajulu aapila wakali aansefa yakali aancheni zyakali kuuzyunguluka. Umwi mutwe wakali aazili musanu azibili mpawo umwi zili musanu azibili. 18 Wakapanga mapomegraneti muminchali iibili waabikka aajulu aansefa imwi ayimwi kuti avumbe mitwe yakali aajulu aamapila. Wakachita mbuboobo kumitwe yoonse. 19 Mitwe yakali aajulu aamapila aayo aakali aavulandi lyatempele yakapangidwe mbuli maluba yakali makkiyubbiti aane kuya mujulu. 20 Mitwe eeyi yakali aajulu aamapila aabili, aajulu aachipanzi chalawundi chamapila chakajisini aansefa. Alubo kwakali mapomegraneti aali 200 muminchali aakali kuzyunguluka mutwe umwi awumwi.

21 Wakayimikizya mapila aavulandi lyatempele.* Wakayimikizya pila lyakuchilisyo* walyuuzika kuti Jakkini,* alubo wakayimikizya lyakuchimweensi* walyuuzika kuti Bbowazi.* 22 Kujulu kwamapila kwakali mbuli maluba. Nkinkaako, mulimu wakupanga mapila wakamana.

23 Mpawo wakapanga Lwizi lwansimbi.* Lwakali lwalawundi, aamulomo walo kuti lwayingwa aakati lwakali kulampa makkiyubbiti aali 10, amakkiyubbiti aali 5 kuya mujulu, alubo kwakali kuyandikana ntambo yakupimya yakali kulampa makkiyubbiti aali 30 kuti iluzyunguluke. 24 Kwakali tutanga twamusokwe* twakubotya munsi aamulomo walyo, twakali kulizyunguluka lyoonse. Kkiyubbiti iimwi yakali aatutanga tuli kkumi twakali kuzyunguluka Lwizi loonse, ooto twakapangilwa aalindulo katuli muminchali iibili. 25 Lwakakkede aajulu aabapule bang’ombe bali 12, bali 3 bakalangide kubbazu lyakunyika, bali 3 kabalangide kububbila, bali 3 kabalangide kubbazu lyakumusanza alubo bali 3 kabalangide kubuzwezuba. Lwizi lwakakkede aajulu aabapule aaba, alubo zibuno zyabo zyakalifutatilene. 26 Ntuli yaLwizi yakaleelene ajaanza.* Mulomo walo wakali mbuli wankomeki, mbuli duba lyafulula. Lwakali kukkwana mabbati* aali 2 000.

27 Mpawo wakapanga tungolo* twakkopa tuli kkumi. Kangolo kamwi akamwi kakali kulampa makkiyubbiti aane, makkiyubbiti aane mubusasa amakkiyubbiti aatatu kuya mujulu. 28 Mboobu mbutwakapangidwe tungolo: Twakali aatuzeng’e twamumbali alubo tuzeng’e ootu twakali aakati aansimbi zyiingene. 29 Mutuzeng’e twamumbali twakali aakati kansimbi zyiingene, kwakali zifanikisyo zyabalavu, zyabapule bang’ombe, azyamakkerubbi, mbuzyakabede anzizyo nsimbi zyiingene. Aajulu amunsi aabalavu abapule bang’ombe, kwakali zifanikisyo zyakubotya. 30 Kangolo kamwi akamwi kakali aamavili aakkopa aane ama-ekiseli aakkopa, alubo nsimbi zyako zine zyamumakkona nzizyo zyakali kwaajata. Munsi aabbavu, kwakali nsimbi zyakutaba zyakali aazifanikisyo zyakubotya kubbazu limwi alimwi. 31 Mulomo wabbavu wakali mukati aachipanzi chaajulu chakangolo. Kuzwa aansi aabbavu kusika aasaangunina chipanzi chaajulu chakangolo, lyakali kkiyubbiti iimwi. Mulomo wachipanzi chaajulu chakangolo wakali walawundi, alubo kuzwa aansi aabbavu kusika aamulomo wachipanzi chaajulu lyakali kkiyubbiti iimwi ahafu. Munsi aamulomo ooyo kwakali zifanikisyo zyakubotya. Mpawo mumbali mwakali tuzeng’e twakali aamabazu aane aayelene, kutali aalawundi pe. 32 Mavili aane akali munsi aatuzeng’e twamumbali ansimbi zine zyakutaba mavili, eezyo zyakajisini aakangolo. Vili limwi alimwi lyakali kulampa kkiyubbiti iimwi ahafu. 33 Mavili aato akapangidwe mbuli mavili aangolo. Nsimbi zyato zyakutaba, marimu, masipokisi amahabbu zyoonse zyakapangidwe aansimbi. 34 Kwakali nsimbi zine zyakutaba mumakkona aane aakangolo kamwi akamwi. Nsimbi zyakutaba zyakajisini* aakangolo. 35 Aajulu aakangolo kwakali chintu chalawundi chakali kuzyunguluka bbavu chilampa hafu yakkiyubbiti, alubo tusimbi twako twakutaba atuzeng’e twako twamumbali, ooto twakali aajulu aakangolo twakajisini* aankako. 36 Aatusimbi twakutaba kuswaanizya atuzeng’e twamumbali, wakapanga zifanikisyo zyamakkerubbi, zyabalavu azyatukunka, kweendelana ampuzyakali kukkwana, mumabazu woonse kamuli zifanikisyo zyakubotya. 37 Oobu mbumbubo mbaakapanga tungolo tuli kkumi. Toonse twakapangidwe munzila iikozyenie, katweelene alubo katukozyenie.

38 Wakapanga mabbavu aakkopa* aali kkumi. Bbavu limwi alimwi lyakali kunjila mabbati aali 40. Bbavu limwi alimwi lyakali makkiyubbiti aane.* Tungolo toonse katuli kkumi, kamwi akamwi kakali aabbavu lyako. 39 Mpawo wakabikka tungolo tuli musanu kubbazu lyakuchilisyo kwang’anda atumbi tuli musanu kubbazu lyakuchimweensi kwang’anda, alubo wakabikka Lwizi kubbazu lyakuchilisyo kwang’anda, kubbazu lili aakati kamusanza akubuzwezuba.

40 Alubo Hiramu wakapanga mabbavu, mafosholo, andido zyanindi.*

Nkinkaako, Hiramu wakamaninsya mulimu woonse ngwaakali kuchitila Mwaami Solomoni aang’anda yaJehova. Nzezi nzyaakapanga: 41 mapila aabili amitwe iili mbuli ndido zyanindi* yakali aajulu aamapila aabili, nsefa zibili zyakubotya mitwe iibili iili mbuli ndido zyanindi* yakali aajulu aamapila, 42 mapomegraneti aakubotya aali 400 aakali aansefa zibili, nsefa imwi ayimwi yakali aaminchali iibili yamapomegraneti aakubotya mitwe iibili iili mbuli ndido zyanindi* yakali aamapila aabili, 43 tungolo tuli kkumi amabbavu aali kkumi aakali aatungolo, 44 Lwizi abapule bang’ombe bali 12 bakali munsi aaLwizi, 45 atugomo, mafosholo, ndido zyanindi,* azibelesyo zyoonse Hiramu nzyaakapanga kabelesya kkopa iing’ayima nzyaakapangila Mwaami Solomoni kuti zibe zyang’anda yaJehova. 46 Mwaami Solomoni wakazipangila mumfoloma* zyabulongo mubbooma lyaJodani, aakati kaSukkoti aZaretani.

47 Solomoni taakazipima pe zibelesyo zyoonse, nkaambo zyakali zyiingi loko. Kulema kwakkopa teekwakazibinkana pe. 48 Solomoni wakapanga zibelesyo zyoonse zyang’anda yaJehova: chipayililo changolida, tebbulu lyangolida lyakubikkila chinkwa chachitondeezyo, 49 zibikkilo zyamalambe zyangolida iisalalisya zili musanu kuchilisyo mpawo zimwi zili musanu kuchimweensi kunembo aakaanda kamukati, maluba aakafulula, malambe, alumano,* zyoonse eezi zyakapangidwe aangolida, 50 tudishi, zyakuzimya mulilo, ndido zyanindi,* nkomeki, azyakubikkila makala, zyoonse eezi zyakali zyangolida iisalalisya, mahinji aamakoma aamukaanda kamukati, nkukwaamba Ndawu Iisalalisya, amahinji aamakoma aang’anda yatempele, woonse aakali aangolida.

51 Nkinkaako, Mwaami Solomoni wakamaninsya mulimu woonse ngwaakeelede kubeleka aang’anda yaJehova. Mpawo Solomoni wakeeta zintu eezyo Davida wisi nzyaakali wasalazya, alubo wakabikka nsiliva, ngolida azimwi zibelesyo muzibikkilo zyamung’anda yaJehova.