Johane Wakusaanguna
4 Nibayandwa, mutasyomi makani woonse aakazulwidwa aamuuya,* pesi amwaalange-lange* kuchitila kuti mubone kuti azwa kuli Leza na, nkaambo munyika kwavula bapolofita bakubeja.
2 Eezi nzizyo zimugwasya kuti muzibe kuti makani aakazulwidwa aamuuya azwa kuli Leza: Makani woonse aakazulwidwa aamuuya, aazumina kuti Jesu Kkristu wakaza kali aamubili wanyama, azwa kuli Leza. 3 Pesi makani woonse aakazulwidwa aamuuya aatamuzumini Jesu, taazwi kuli Leza pe. Mukuyungizya, aaya ngiimakani aakazulwidwa aamuuya aasikukazya Kkristu ngimwakamvwa kuti azoosika, alubo asika kale munyika.
4 Nibana, inywe muzwa kuli Leza, alubo mwabazunda, nkaambo ooyo uulaamwi andinywe mupati kwiinda ooyo uulaamwi anyika. 5 Bazwa munyika, nzizyo zipa kuti baambuule zintu zizwa munyika alubo nyika ilabaswiilila. 6 Iswe tuzwa kuli Leza. Kufumbwa muntu uuziba Leza ulatuswiilila. Kufumbwa muntu uutazwi kuli Leza tatuswiilili pe. Eezi zitugwasya kusiyanisya makani aakazulwidwa aamuuya aakasimpe, amakani aakazulwidwa aamuuya aakubeja.
7 Nibayandwa, atwiinkilile kunembo kuyandana, nkaambo luyando luzwa kuli Leza, alubo muntu woonse ulaaluyando, wakazyalwa kuli Leza alubo ulimuzi Leza. 8 Kufumbwa muntu uutakwe luyando, tanamuziba pe Leza, nkaambo Leza nduyando. 9 Leza wakatutondeezya luyando lwakwe mukuti wakatuma Mwanaakwe uuzyedwe aalikke munyika kuti tujane buumi kwiinda mulinguwe. 10 Luyando oolu taluli lwakuti ndiswe twakayanda Leza pe, pesi we nguwe wakatuyanda mpawo wakatuma Mwanaakwe kuti abe chipayizyo chakumvwanana chazibi zyesu.*
11 Nibayandwa, kuti kakuli kuti Leza wakatuyanda munzila iili boobu, nkukwaamba kuti andiswe tweelede kuyandana. 12 Taakwe muntu wakabwene Leza pe. Kuti twayinkilila kunembo kuyandana, Leza unooli aandiswe alubo luyando lwakwe lulachitwa kuti lumaninine mulindiswe. 13 Kwiinda mumakani aaya, tulizi kuti tulayinkilila kunembo katulaamwi anguwe, anguwe unoolaamwi andiswe nkaambo wakatupa muuya wakwe. 14 Mukuyungizya, andiswe twalibonena alubo tulikupa bukamboni bwakuti, Taata wakatuma Mwanaakwe kuti abe mufutuli wanyika. 15 Kufumbwa muntu uuzumina kuti Jesu Mwana waLeza, Leza ulayinkilila kunembo kubaamwi amuntu ooyo, amuntu ooyo unoolaamwi aLeza. 16 Lino twaziba akusyoma kuti Leza ulatuyanda.
Leza nduyando alubo muntu uukkala kali muluyando, unoolaamwi aLeza, anguwe Leza unoolaamwi amuntu ooyo. 17 Munzila eeyi, luyando lwachitwa kuti lumaninine mulindiswe, kuchitila kuti tube aalwaangunuko lwakwaambuula* mubuzuba bwakubetekwa, nkaambo mbuli mbabede, andiswe mbutubede munyika eeyi. 18 Taakwe kuyoowa pe muluyando, pesi luyando lumaninide lutanda* kuyoowa, nkaambo kuyoowa kulatukasya. Kwaamba choonzyo, muntu uuyoowa tanachitwa kuti amaninine pe muluyando. 19 Tuli aaluyando, nkaambo we wakasaanguna kutuyanda.
20 Kuti muntu waamba kuti, “Ndilamuyanda Leza,” pesi kazonda mukombinyina, mubeji. Nkaambo muntu uutayandi mukombinyina ngwabwene, takonzyi pe kuyanda Leza ngwatanabona. 21 Alubo tuli aamulawu ooyu kuzwa kulinguwe wakuti, kufumbwa muntu uuyanda Leza, weelede kuyanda mukombinyina.