Babetesi
16 Aali chimwi chiindi, Samisoni wakaya kuGaza, waakubona wuule nkukooko mpawo wakanjila mung’anda yawuule eelyo. 2 Bantu bamuGaza bakabuzigwa kuti: “Samisoni uli ookuno.” Nkinkaako, bakamuzyunguluka bamuyubilila busiku boonse mumuunzi. Bakaluumwide busiku boonse mumyoyo kabalibuzya kuti: “Nibwacha kupela, tuyanda kumujaya.”
3 Pesi Samisoni wakoona kusika aakati kamansiku. Mpawo wakabuka aakati kamansiku wajata milyango yageedi lyamuunzi aminsende* yalyo, wayinyukulaamwi achikwidizyo chageedi. Mpawo wakayipikula waakuyisisya aajulu aachilundu chilangene aaHebburoni.
4 Kuzwa waawo, wakayandana aamwanakazi wamuKkuti lyakuSorekki* wakali kutegwa Delila. 5 Baami bamaFilisiti bakasika kuli Delila bamubuzya kuti: “Muyunge* uzibe chimupa manguzu aagambya ambutukonzya kumuzunda kuti tumusunge akumweendelezya. Umwi awumwi wesu ulakupa nsiliva zili 1 100.”
6 Mpawo Delila wakabuzya Samisoni kuti: “Ndibuzye kuti manguzu aako miingi azwa kuli akuti muntu nga ulakusunga aanzi kuti akuzunde.” 7 Mpawo Samisoni wakati: “Kuti bandisunga aantambo ntete zyadaantambwa* zili musanu azibili zitanayuma, manguzu aangu alamana mpawo ndilaba mbuli bantu boonse.” 8 Mpawo baami bamaFilisiti bakamweetela ntambo zyadaatambwa zili musanu azibili zyakatalinayuma mpawo wakamusunga aanzizyo. 9 Bakamuyubilila mukaanda kamukati mpawo mwanakazi ooyo wakamwiita wati: “Samisoni, maFilisiti bakuzida!” Mpawo Samisoni wakadunsuula ntambo eezyo mbuli katambo kabusumyo kapya mulilo. Teebakaziba pe kuti manguzu aakwe azwa kuli.
10 Mpawo Delila wakabuzya Samisoni kuti: “Bona! Wandeena, wandibuzya zyakubeja. Ndibuzye kuti muntu nga ulakusunga aanzi.” 11 Mpawo wakamubuzya kuti: “Kuti bandisunga aantambo mpya zitanabelesegwa pe, manguzu aangu alamana mpawo ndilaba mbuli bantu boonse.” 12 Mpawo Delila wakabeza ntambo mpya wamusunga aanzizyo akumwiita kati: “Samisoni, maFilisiti bakuzida!” (Aachiindi eecho, bakali mubwatilide mukaanda kamukati.) Ntambo nzyaakasungidwe mumaboko wakazidunsuula aanga mbusumyo.
13 Mpawo Delila wakabuzya Samisoni kuti: “Asunu uchindeena akundibejela. Ndibuzye kuti muntu nga ulakusunga aanzi.” Mpawo Samisoni wakati kulinguwe: “Kuti waluka ntambo zyamasusu aangu zilukidwe zili musanu azibili kubelesya busumyo, manguzu aangu alamana.” 14 Nkinkaako, masusu aayo wakaaluka kabelesya nkanka, mpawo wakamwiita kati: “Samisoni, maFilisiti bakuzida!” Nkinkaako, Samisoni wakapatamuka kung’onzi wasomona nkanka eeyo abusumyo.
15 Delila wakati kulinguwe: “Nga ulaamba kuti ulandiyanda kakuli moyo wako tawuli aalindime pe? Ziindi eezi zitatu wandeena, teewandibuzya pe kuzwa manguzu aako miingi.” 16 Akaambo kakuti buzuba abuzuba wakali kumukataazya akumusungilizya, wakakataazikana chakuyanda kufwa. 17 Kumamanino, wakamubuzya zyakali mumoyo wakwe, wakati: “Kuzwa nindakazyalwa* tandinagelwa pe nkaambo ndili muNaziri waLeza. Kuti ndagelwa, manguzu aangu alamana mpawo ndilaba mbuli bamwi bantu boonse.”
18 Delila naakabona kuti wamubuzya zili mumoyo wakwe, chakufwambaana wakayita baami bamaFilisiti wati: “Lino amuze, nkaambo wandibuzya zili mumoyo wakwe.” Nkinkaako, baami bamaFilisiti bakayinka kulinguwe amali. 19 Delila wakalazika Samisoni aamazwi aakwe; mpawo wakayita umwi mwaalumi kuti azoomugele ntambo zyamasusu zilukidwe zili musanu azibili. Delila wakasaanguna kumweendelezya nkaambo manguzu aakwe akali kumana. 20 Delila wakayita kati: “Samisoni, maFilisiti bakuzida!” Mpawo Samisoni wakabuka kung’onzi wati: “Ndilayinka mbuli lubbe ndikalilwanine.” Pesi taakazi pe kuti Jehova wakali wamusiya. 21 Nkinkaako, maFilisiti bakamujata bamudonkola meso. Bakakunuka aawe kuGaza kabamwaangide nsimbi zibili zyakkopa, mpawo wakaba sikuziya zilyo mujele. 22 Pesi masusu aakwe akasaanguna kulampa lubo kuzwa naakagelwa.
23 Baami bamaFilisiti bakabunganaamwi kuti bape chipayizyo chipati kuli Dagoni leza wabo akuti bapobole, nkaambo bakali kwaamba kuti: “Leza wesu wabikka Samisoni sinkondoma mukuboko kwesu!” 24 Bantu nibakamubona, bakatembawula leza wabo kabati: “Leza wesu wabikka sinkondoma mukuboko kwesu, ooyo wakanyonyoona nyika yesu akujaya bantu besu biingi loko.”
25 Mbukunga myoyo yabo yakali boteledwe, bakati: “Amukayite Samisoni azootuchitile zintu zisesya.” Nkinkaako, bakeeta Samisoni kuzwa mujele kuti azoobakondelezye; bakamwiimikizya aakati kamapila. 26 Mpawo Samisoni wakati kukalombe kakamujisi kuboko: “Ndigumye mapila aajisi ng’anda kuchitila kuti ndiyaame aalingawo.” 27 (Ng’anda eeyo yakazwide baalumi abanakazi. Baami boonse bamaFilisiti bakali mumo, alubo aachiluli chang’anda eeyo kwakali baalumi abanakazi bali 3 000 bakali kweebela chiindi Samisoni naakali kubachitila zintu zisesya.)
28 Samisoni wakayita Jehova kati: “O Mwaami Singuzuzyoonse Jehova, ndiyeeye kaka, undisimye kwachiindi eechino, O Leza wangu, kuchitila kuti ndibakkwichizye maFilisiti akaambo kaliso lyangu limwi.”
29 Mpawo Samisoni wakajata mapila aabili aakali aakati kang’anda. Kuboko kwachilisyo kwakajisi limwi pila mpawo kwachimweensi kwakajisi limbi pila. 30 Samisoni wakoompolola kati: “Andifwe aamwi amaFilisiti aaba!” Mpawo wakatonta mapila aayo amanguzu aakwe woonse mpawo ng’anda eeyo yakawida baami abantu boonse bakali mumo. Nkinkaako, bantu mbaakajaya mubuzuba mbwaakafwa bakali biingi loko kwiinda mbaakajaya kachipona.
31 Nikwakayinda chiindi, babbululu bakwe abamumpuli yawisi boonse bakakunuka kuti bakamubweze. Bakamubweza baakumuzikka aakati kaZora a-Eshitayoli mukabanda kaManowa wisi. Samisoni wakabeteka Israyeli kwaminyaka iili 20.