KuBaroma
5 Mbukunga lino twaambwa kuti tuliluleme akaambo kalusyomo, atube aaluumuno* aLeza kwiinda muMwaami wesu Jesu Kkristu. 2 Kuba aalusyomo muli Jesu, kupa kuti tukonzye kusika kuli Leza, kuchitila kuti tunjile muluzyalo lupati, oomo mutwiimvwi. Nkinkaako, atubotelwe* akaambo kabulangilizi bwabulemu bwaLeza. 3 Kutali kuli zeezi kupela, pesi atubotelwe* chiindi nituli mumapenzi, mbukunga tulizi kuti mapenzi apa kuti tulisimye, 4 mpawo kulisimya kupa kuti tuyandwe aaLeza, mpawo kuyandwa aaLeza kupa kuti tube aabulangilizi, 5 alubo bulangilizi tabupi kuti tumane manguzu, nkaambo luyando lwaLeza lwakatilwa mumyoyo yesu kwiinda mumuuya uusalala ngutwakapegwa.
6 Kwaamba choonzyo, katutanaba aamanguzu, Kkristu wakafwida basizibi aachiindi chibikkidwe. 7 Nkuyumu kuti muntu afwide muntu uululeme nikuba kuti umwi muntu ulakonzya kulipeda kufwida muntu mubotu. 8 Pesi Leza wakatutondeezya luyando lwakwe, mukuti nitwakachili basizibi, Kkristu wakatufwida. 9 Mukuyungizya, mbukunga lino twaambwa kuti tuliluleme akaambo kaganzi lyakwe, nkukwaamba kuti, tuzoofutuka kubukali bwaLeza kwiinda mulinguwe. 10 Kuti kakuli kuti twakamvwanana lubo aLeza kwiinda mulufu lwaMwanaakwe chiindi nitwakachili basinkondonyina, nkukwaamba kuti tuli aachoonzyo chakuti tuzoofutuka akaambo kabuumi bwakwe, mbukunga lino twaabumvwanana lubo aLeza. 11 Kutali zeezi kupela, pesi tulabotelwa muli Leza kwiinda muMwaami wesu Jesu Kkristu, ooyo wakapa kuti tukonzye kumvwanana lubo aLeza.
12 Mbukunga chibi chakanjila munyika kwiinda mumuntu uumwi alubo lufu lwakanjila kwiinda muchibi, nkinkaako, lufu lwakasikila bantu boonse nkaambo boonse bakabisya—. 13 Nkaambo chibi chakaliwo munyika Mulawu kawutanabawo pe, pesi taakwe muntu waambwa kuti ulaachibi kuti kakutakwe mulawu. 14 Nikuba oobo, lufu lwakeendelezya mbuli mwaami kuzwa kuli Adamu kusikila kuli Mozesi, alubo lwakeendelezya aabo bakatabisya mbuli Adamu wakasotoka mulawu, wakali kwiiminina ooyo wakali kuza.
15 Pesi chipo tachikozyenie pe achibi. Nkaambo kuti kubisya kwamuntu uumwi kakuli kwakapa kuti bantu biingi bafwe, nkukwaamba kuti, luzyalo lupati lwaLeza achipo chakwe chitabbadalwi nchaakapa kwiinda muluzyalo lupati lwamuntu uumwi Jesu Kkristu, zilikugwasya* bantu biingi. 16 Alubo, eezyo zyakeetwa aachipo chaLeza chitabbadalwi, zilisiyene azyakeetwa aamuntu uumwi wakabisya. Nkaambo kubetekwa nikwakachitwa akaambo kachibi chimwi, bantu boonse bakajanika kabali aamulandu, pesi chipo chakapegwa kakuli kwachitwa zibi zyiingi, chakapa kuti bantu baambwe kuti baliluleme. 17 Nkaambo kuti kubisya kwamuntu uumwi kakuli kwakapa kuti lufu lweendelezye mbuli mwaami kwiinda mumuntu ooyo, nkukwaamba kuti tuli aachoonzyo chakuti, aabo batazoojane luzyalo lupati kaluli lwiingi achipo chitabbadalwi kwiinda mubululami, bazoopona akweendelezya kabali baami akaambo kamuntu uumwi Jesu Kkristu!
18 Nkinkaako, mbukunga kubisya kamwi kwakapa kuti bantu bamisyobo yoonse baambwe kuti bali aamulandu, ankuko kuchita chintu chiluleme kamwi, kupa kuti bantu bamisyobo yoonse baambwe kuti baliluleme mpawo bakajane buumi. 19 Mbukunga kutaswiilila kwamuntu uumwi kwakapa kuti biingi babe basizibi, nkinkaako, kwiinda mukuswiilila kwamuntu uumwi, biingi bazooba balulami. 20 Mulawu wakasika kuchitila kuti zibi zivule pesi chibi nichakavula, andulo luzyalo lupati lwakavula loko. 21 Akaambo kanzi? Kuchitila kuti, mbuli chibi mbuchakeendelezya mbuli mwaami aamwi alufu, andulo luzyalo lupati lweendelezye mbuli mwaami kwiinda mubululami butola kubuumi butamani, kwiinda muli Jesu Kkristu Mwaami wesu.