Baami Wakusaanguna
17 Lino Elija* muTishibbi, ooyo wakali kukkala muGiliyadi, wakabuzya Ahabbu kuti: “AJehova Leza wa-Israyeli muumi, ooyo ngundibelekela, muminyaka eeyi takuzoobi lume* niiba mvula kunze kwakuti ndizoowambe!”
2 Ijwi lyaJehova lyakasika kulinguwe kaliti: 3 “Zwa ookuno, wiinke kubuzwezuba ukayube kuKalonga kaKkeriti, kubuzwezuba kwaJodani. 4 Unoonywa maanzi mukalonga aako, alubo ndizoolayilila bachikwangala kuti kabakupa chakulya nkukooko.” 5 Wakeenda mpawaawo alubo wakachita kweendelana ajwi lyaJehova. Wakayinka waakukkala kuKalonga kaKkeriti, kubuzwezuba kwaJodani. 6 Mpawo bachikwangala bakali kumweetela chinkwa anyama kuseeni, goko bakali kumweetela chinkwa anyama, alubo wakali kunywa maanzi mukalonga aako. 7 Pesi nikwakayinda mazuba, kalonga aako kakayuminina, nkaambo mvula teeyakali kuwa pe munyika eeyo.
8 Mpawo jwi lyaJehova lyakamusikila kaliti: 9 “Nyampuka, yinka kuZarefati kuSidoni ukakkale nkukooko. Ndilalayilila mukamufu wankukooko kuti kanookupa chakulya.” 10 Nkinkaako, wakanyampuka waya kuZarefati. Naakasika kumulyango wamuunzi, wakabona mukamufu wakali kutebba nkuni. Wakamwiita wamubuzya kuti: “Ndikumbila undeetele twaanzi munkomeki ndinywe.” 11 Mukamufu ooyo naakeenda kuti akamweetele maanzi, wakamwiita wamubuzya kuti: “Ndikumbila undeetele akankwa.” 12 Mpawo mukamufu ooyo wakati: “AJehova Leza wako muumi, tandikwe chinkwa pe, ndili aatufulawa tuche kupela munongo mpati, atufuta tuche munongo niini. Lino ndili kubwezelela tukuni, mpawo ndilayinka ndikajike chakulya nchinditalye amwanaangu. Nitwamana kulya tulafwa.”
13 Mpawo Elija wakamubuzya kuti: “Utayoowi pe. Yinka uchite mbuli mbwaamba. Pesi saanguna kundijikila kankwa kalawundi kubelesya eezyo ziliwo, undeetele. Nwaamana, ujike chakulya nchutalye amwanaako. 14 Nkaambo nzezi nzyaamba Jehova Leza wa-Israyeli: ‘Fulawa iili munongo mpati tayizoomani pe, amafuta aali munongo niini taazoomani pe kusikila mubuzuba Jehova natazoowisye mvula aanyika.’” 15 Nkinkaako, mwanakazi ooyo wakayinka waakuchita mbuli mbaakaamba Elija, alubo mwanakazi ooyo abamung’anda yakwe a-Elija bakalya kwamazuba miingi. 16 Fulawa yakali munongo mpati teeyakamana pe amafuta aakali mukanongo kaniini taakamana pe, kweendelana ajwi lyaJehova ndyaakali waamba kwiinda muli Elija.
17 Nizyakayinda zintu eezi, mwana wamwanakazi ooyo wakali aang’anda wakachiswa, malwazi aakwe akalema zyakuti wakafwa. 18 Mpawo mwanakazi ooyo wakabuzya Elija kuti: “Ulaakaamboonzi andime,* O muntu waLeza wakasimpe? Wazida kuzoondiyeezya mulandu wangu na akujaya mwanaangu?” 19 Pesi wakati kulinguwe: “Ndipe mwanaako.” Mpawo wakamubweza mumaboko aamwanakazi ooyo wayinkaawe mung’anda yamujulu nkwaakali kukkala, mpawo wakamulazika aabulo bwakwe. 20 Wakayita Jehova ajwi pati kati: “O Jehova Leza wangu, uyanda kumweetela mapenzi na anguwe mukamufu ooyu ngundikkalaawe kwiinda mukujaya mwanaakwe?” 21 Mpawo wakalyoolola aajulu aamwana kwaziindi zitatu, alubo wakayita Jehova kati: “O Jehova Leza wangu, ikaka busya mwana ooyu.” 22 Jehova wakaswiilila nzyaakakumbila Elija, mpawo mwana ooyo wakabuka, waba muumi. 23 Elija wakabweza mwana wamuselusya mung’anda yamujulu wamweeta mung’anda mpawo wakamupa banyina. Elija wakati: “Bona, mwanaako muumi.” 24 Mpawo mwanakazi ooyo wakabuzya Elija kuti: “Lino ndaziba kuti choonzyo uli muntu waLeza akuti jwi lyaJehova ndwaamba ndyakasimpe.”