Baami Wachibili
18 Mumunyaka wachitatu wabweendelezi bwaHosheya mwana wa-Ela mwaami wa-Israyeli, Hezekkiya mwana waMwaami Ahazi waJuda wakaba mwaami. 2 Wakali aaminyaka iili 25 naakaba mwaami alubo wakeendelezya kwaminyaka iili 29 muJerusalema. Banyina bakali kutegwa Abbi* mwana waZakkariya. 3 Wakali kuchita ziluleme mumeso aaJehova, mbuli Davida sianyinakulu mbaakali kuchita. 4 Nguwe wakagwisya ndawu zyakukombela akupwaya mapila aasalala akugonka chisamu chisalala.* Alubo wakapwaya nzoka yakkopa* Mozesi njaakapanga. Nkaambo kusika aachiindi eecho, ma-Israyeli bakali kuuntumuna busi bwazipayizyo kabachitila njiyo alubo yakali kwiitwa kuti chibumbwa chanzoka yakkopa.* 5 Wakali kusyoma Jehova Leza wa-Israyeli. Taakwe uumbi pe wakali mbuli nguwe aakati kabaami baJuda boonse bakamutobela, nibaba aabo bakamusaangunina. 6 Wakakakatila kuli Jehova. Taakaleka pe kumutobela. Wakali kubamba milawu Jehova njaakapa Mozesi. 7 Alubo Jehova wakali aanguwe. Kufumbwa nkwaakali kuya, wakali kusala munzila yabusongo. Wakabukila mwaami wa-Asiriya alubo wakakaka kumubelekela. 8 Wakazunda maFilisiti kusika kuGaza azilawu zyakayizyungulukide, kuzwa kungaziyakulinda kusika kumuunzi uukwabilidwe.*
9 Mumunyaka wachine wabweendelezi bwaMwaami Hezekkiya, nkukwaamba munyaka wamusanu ayibili wabweendelezi bwaHosheya mwana wa-Ela mwaami wa-Israyeli, Mwaami Shalumanesa wa-Asiriya wakasika kuti azoolwane Samariya mpawo wakasaanguna kwiisinkila. 10 Bakayizunda kumamanino aaminyaka iitatu. Mumunyaka wamusanu awumwi wabweendelezi bwaHezekkiya, nkukwaamba munyaka wamusanu ayine wabweendelezi bwaMwaami Hosheya wa-Israyeli, Samariya yakazundwa. 11 Mpawo mwaami wa-Asiriya wakabweza ma-Israyeli wabatola mubuzike ku-Asiriya, mpawo wakabakkazika muHala amuHabbori kumulonga waGozani amumyuunzi yamaMedi. 12 Eezi zyakachitika akaambo kakuti teebakaliswiilila pe jwi lyaJehova Leza wabo, pesi bakaliswini kutyola chizuminano chakwe, azintu zyoonse Mozesi mubelesi waJehova nzyaakalayilila. Taakwe nibakaziswiilila nikuba kuzichita.
13 Mumunyaka wachi 14 wabweendelezi bwaMwaami Hezekkiya, Senakkeribbi mwaami wa-Asiriya wakasika kuti azoolwane myuunzi yoonse yaJuda iikwabilidwe mpawo wakayizunda. 14 Nkinkaako, Mwaami Hezekkiya waJuda wakatumizya mulayizyo kumwaami wa-Asiriya kuLakkishi wakuti: “Ndabisya. Leka kundilwana, ndilakupa kufumbwa nchutaambe kuti ndikupe.” Mwaami wa-Asiriya wakabbadalisya Mwaami Hezekkiya waJuda matalenta* aansiliva aali 300 amatalenta aangolida aali 30. 15 Nkinkaako, Hezekkiya wakamupa nsiliva yoonse yakali mung’anda yaJehova amuzibikkilo zyamung’anda yamwaami.* 16 Aachiindi nchicheecho, Hezekkiya wakagwisya makoma aatempele lyaJehova aminsende,* eeyo Mwaami Hezekkiya waJuda njaakali wazilulula aangolida, mpawo wakapa mwaami wa-Asiriya.
17 Mpawo mwaami wa-Asiriya wakatuma Taritani,* aRabbisarisi* aRabbishakke* kabalaamwi ankamu mpati yamasooja kuti baye kuMwaami Hezekkiya kuJerusalema kabazwa kuLakkishi. Bakayinka kuJerusalema mpawo bakayimikila aamugelo wadambwa lyaajulu, eelyo lili mumugwagwa uuya kumuunda wasikuwacha. 18 Chiindi nibakayita mwaami kuti azwe aanze, Eliyakkimu mwana waHilikkiya, ooyo wakali kuzulwida bamung’anda yamwaami,* aShebbina mulembi, aJowa mwana wa-Asafu sikulemba makani, bakazwa bayinka nkubakabede.
19 Nkinkaako, Rabbishakke wakati kulimbabo: “Amukabuzye Hezekkiya kuti, ‘Nzezi nzyaamba mwaami mupati, mwaami wa-Asiriya: “Uchijana kuli chibindi? 20 Ulibuzya kuti, ‘Ndili aanzila njindilwanaayo amanguzu aakulwana nkondo,’ pesi majwi aaya ngabuyo. Ngwani ngusyoma zyakuti ube aachibindi chakundibukila? 21 Bona! Usyoma tete eeli lityokede, Ijipita, zyakuti kuti muntu wayaama aalindilyo lilamuyasa mukuboko kwakwe libbile. Mbumbubo mbachita Faro mwaami wa-Ijipita kuli aabo boonse bamusyoma. 22 Alubo kuti mwandibuzya kuti, ‘Tusyoma Jehova Leza wesu,’ teenguwe na uuli aandawu zyakukombela azipayililo eezyo Hezekkiya nzyaakagwisya, kumwi kalikubuzya Juda aJerusalema kuti, ‘Mweelede kukotama kunembo aachipayililo eechi chili muJerusalema’?”’ 23 Lino bbejelana aasimalelaangu mwaami wa-Asiriya: Ndilakupa mabbiza aali 2 000 ndibone kuti nga ulabajana na basikwaayenzya. 24 Nga ulamutanda biyeni naba mweendelezi uumwi muniini aakati kababelesi basimalelaangu, kakuli iwe usyoma Ijipita kuti ikupe ngolo abasimabbiza? 25 Teendazumizigwa aaJehova na kuti ndize ndizoolwane ndawu eeyi ndiinyonyoone? Jehova lwakwe nguwe wandibuzya kuti, ‘Yinka ukalwane nyika eeyi wiinyonyoone.’”
26 Eliyakkimu mwana waHilikkiya, aShebbina, aJowa bakati kuli Rabbishakke: “Ikaka, ambuula aababelesi bako mumulaka wachi-Aramu,* nkaambo tulawumvwa. Utaambuuli aababelesi bako mumulaka wamaJuda kabamvwide bantu aaba bali aamuduli.” 27 Pesi Rabbishakke wakati kulimbabo: “Ubonaanga simalelaangu wandituma kuzoowamba majwi aaya kuli simalelaako akulinduwe kupela na? Taandituma na akubaalumi aaba bakkede aamuduli, aabo batalye doti lyabo akunywa minsyu yabo kuswaanizya andinywe?”
28 Mpawo Rabbishakke wakayimikila woompolola mumulaka wamaJuda kati: “Amumvwe jwi lyamwaami mupati, mwaami wa-Asiriya. 29 Nzezi nzyaamba mwaami, ‘Mutalekeli Hezekkiya kuti amweene, nkaambo takonzyi pe kumuvuna mukuboko kwangu. 30 Alubo mutalekeli Hezekkiya kuti ape kuti musyome Jehova kamuti: “Kwaamba choonzyo, Jehova ulatuvuna, alubo muunzi ooyu tukoobikkwa pe mukuboko kwamwaami wa-Asiriya.” 31 Mutamuswiilili pe Hezekkiya, nkaambo nzezi nzyaamba mwaami wa-Asiriya: “Amubambe luumuno andime mulibombye, mpawo umwi awumwi wanu unoolya kuzwa kumusaansa wakwe akumukuyu wakwe alubo unoonywa maanzi aazwa muchikala chakwe, 32 kusikila ndisike ndimubweze ndimutole kunyika iili mbuli nyika yanu, nyika iili aazilyo awayini mpya, nyika iili aachinkwa amyuunda yamisaansa, nyika iili aami-olifa abuchi. Mpawo munooli bawumi, tamuzoofwi pe. Mutamuswiilili pe Hezekkiya, nkaambo ulikumweena kati, ‘Jehova ulatuvuna.’ 33 Mpali na leza aakati kabaleza bazisi wakavuna nyika yakwe mukuboko kwamwaami wa-Asiriya? 34 Balikuli baleza baHamati a-Apadi? Balikuli baleza baSefavayimu, Hena a-Iva? Bakayivuna na Samariya mukuboko kwangu? 35 Ngwani leza aakati kabaleza boonse bazisi eezi wakavuna nyika yakwe mukuboko kwangu, zyakuti Jehova nga ulavuna Jerusalema mukuboko kwangu?”’”
36 Pesi bantu bakaluumwine alubo taakwe jwi pe niliba limwi ndibakamusandula, nkaambo mwaami wakali wababuzya kuti, “Mutamusanduli pe.” 37 Pesi Eliyakkimu mwana waHilikkiya, ooyo wakali kuzulwida bamung’anda yamwaami,* aShebbina mulembi, aJowa mwana wa-Asafu sikulemba makani, bakasika kuli Hezekkiya kabadelwide zigogo zyabo mpawo bakamubuzya majwi ngaakaamba Rabbishakke.