Nehemiya
2 Mumweezi waNisani mumunyaka wachi 20 wabweendelezi bwaMwaami Aritasasita, wayini yakabikkwa kunembo lyakwe, alubo mbuli chiindi choonse, ndakabweza wayini ndayipa mwaami. Pesi taakwe buzuba mbundakali ndawusa oobu pe kunembo lyakwe. 2 Nkinkaako, mwaami wakandibuzya kuti: “Nkamboonzi nuuside kakuli tuchisidwe pe? Taakwe chimbi pe, kweelede kuti kuli zili kukulya mumoyo.” Aachiindi eecho, ndakayoowa loko.
3 Mpawo ndakati kumwaami: “Awongole mwaami! Nga ndilalekelaanzi kuusa kakuli muunzi, ooko kwakazikkwa masianene wakaba matongo amilyango yawo yakapya mulilo?” 4 Mpawo mwaami wakandibuzya kuti: “Uyandaanzi?” Mpawo ndakakomba kuli Leza wakujulu mpawaawo. 5 Ndakabuzya mwaami kuti: “Kuti kazimubotezya mwaami alubo kuti kali wandifwida luzyalo ndimubelesi wakwe, andizumizye ndiinke kuJuda kumuunzi wakazikkwa masianene ndikawuyakulule.” 6 Mpawo mwaami amwanakazi* wakwe kakkede kumbali lyakwe, wakati kulindime: “Lweendo lwako lulatola chiindi chilamfu biyeni alubo uzooboola lili?” Nkinkaako, mwaami wakazibona kazili kabotu kuti andizumizye kuti ndiinke mpawo ndakamubuzya chiindi nindakali kuzooboola.
7 Ndakabuzya mwaami kuti: “Kuti kazibotezya mwaami, andipe magwalo ndikape beendelezi bachilawu chili Mutala aaMulonga* kuchitila kuti bandizumizye kuti ndiinde kabotu do ndikasike kuJuda, 8 alugwalo luya kuli Asafu sikubamba Lusaka lwaMwaami kuchitila kuti andipe masamu aakuyaka mageedi aaNg’anda Iisimide iili aafwiifwi atempele* amasamu aamiduli yamuunzi amasamu aang’anda nkundiya.” Nkinkaako, mwaami wakandipa nkaambo kuboko kubotu kwaLeza wangu kwakali aalindime.
9 Kumamanino, ndakasika kubeendelezi bachilawu chili Mutala aaMulonga mpawo ndakabapa magwalo aakazwa kumwaami. Mwaami wakapa kuti ndiinke aabapati bamasooja abasimabbiza. 10 Sanibbalati muHoroni, aTobbiya umwi wabalupati-pati* bama-Amoni nibakazimvwa, bakabijilwa loko akaambo kakuti kuli muntu wakali wasika kuzoogwasya ma-Israyeli.
11 Nikwakayinda chiindi, ndakasika kuJerusalema mpawo ndakakkala nkuko kwamazuba aatatu. 12 Ndakabuka mansiku kandilaamwi abaalumi bache mbindakali aabo, taakwe ngundakabuzya pe atala azintu Leza nzyaakali wabikka mumoyo wangu nzindakali kuyanda kuchita muJerusalema. Teendakalikwe munyama uumbi pe kunze kwawumwi biyo ngundakatantide. 13 Mubusiku oobo, ndakazwida kuGeedi lyamuKkuti,* ndayinda kunembo aaKasawu kaNzoka Mpati ndaakusika kuGeedi lyaMilwi yaDyota, ndakalanga-langa miduli yaJerusalema yakali yadilika amageedi aayo aakali apya mulilo. 14 Mpawo ndakayinda kuGeedi lyakuKasawu akuDambwa lyaMwaami, pesi teekwakalikwe mweenya wakuti munyama ngundakatantide ayinde. 15 Nikuba oobo, ndakayinkilila kunembo mubusiku mbuboobo kweenda mukkuti*, ndakali kulanga-langa muduli, kuzwa waawo, ndakakkona ndanjilila kuGeedi lyamuKkuti* mpawo ndabweeda.
16 Batobeli babeendelezi teebakazi pe nkundakali ndaya anzindakali kuchita nkaambo taakwe nzindakali ndababuzya pe maJuda, bapayizi, baalumi balemekwa, batobeli babeendelezi, ababelesi boonse. 17 Mpawo ndakati kulimbabo: “Mulilibwene mbulili pati penzi nditulangene aalyo, Jerusalema lichili tongo, mageedi aalyo achipyide aamulilo. Amuze tuyakulule miduli yaJerusalema kuchitila kuti masampu aaya atayinkilili kunembo.” 18 Mpawo ndakababuzya atala akuboko kubotu kwaLeza wangu mbukwakali aalindime, kuswaanizya amajwi mwaami ngaakandibuzya. Nibakamvwa oobo bakati: “Atunyampuke tuyake.” Nkinkaako, bakasimisyania kuti babeleke mulimu mubotu.
19 Sanibbalati muHoroni, Tobbiya umwi wabalupati-pati* mu-Amoni, aGeshemu mu-Arabbiya nibakamvwa oobo, bakasaanguna kutuseka akutufubaazya kabati: “Niinzi eezi nzimulikuchita? Muyanda kupapila mwaami na?” 20 Nikuba oobo, ndakasandula kuti: “Leza wakujulu nguwe uutape kuti tuzwidilile, iswe tubabelesi bakwe tulanyampuka tuyake, pesi inywe tamukwe chaabilo nichiba cheelelo nichiba chimwi chintu chipa kuti muyeeyegwe muJerusalema.”