Baami Wachibili
14 Mumunyaka wachibili wabweendelezi bwaJehowashi mwana waJehowahazi mwaami wa-Israyeli, Amaziya mwana waMwaami Jehowashi waJuda wakaba mwaami. 2 Wakali aaminyaka iili 25 naakaba mwaami alubo wakeendelezya kwaminyaka iili 29 muJerusalema. Banyina bakali bakuJerusalema alubo bakali kutegwa Jehoyadini. 3 Amaziya wakali kuchita ziluleme mumeso aaJehova, pesi taakachita mbuli Davida sianyinakulu. Wakachita zintu zyoonse zyakachitwa aaJehowashi wisi. 4 Nikuba oobo, ndawu zyakukombela teezyakagwisigwa pe, alubo bantu bakachili kupa zipayizyo akuuntumuna busi bwazipayizyo mundawu zyakukombela. 5 Bwaami bwakwe mbubwakasima biyo, wakajaya babelesi bakwe aabo bakajaya wisi chiindi naakali mwaami. 6 Pesi taakabajaya pe bana babajayi aabo, kweendelana amulawu waJehova uulembedwe mubbuku lyaMulawu waMozesi wakuti: “Mawisi tabeelede kujayigwa akaambo kazibi zyabana babo, ambabo bana tabeelede kujayigwa akaambo kazibi zyamawisi. Pesi umwi awumwi weelede kufwida chibi chakwe.” 7 Wakajaya ma-Edomu, baalumi bali 10 000 muKkuti lyaMunyo,* alubo wakazunda Sela munkondo, mpawo wakayiwuzika kuti Jokkiteli, mbiichiitwa kusika sunu.
8 Mpawo Amaziya wakatuma batumwa kuli Jehowashi mwana waJehowahazi mwana waJehu mwaami wa-Israyeli kuti bakaambe kuti: “Kuza tulwane.” 9 Mwaami Jehowashi wa-Israyeli wakatumizya mulumbe ooyu kuMwaami Amaziya waJuda wakuti: “Masokwe aayasa aamuLebbanoni akatumizya mulumbe kumukkedari wakuLebbanoni wakuti, ‘Ndipe mwanaako musimbi kuchitila kuti mwanaangu mulombe amukwate.’ Nikuba oobo, munyama wamusokwe wakuLebbanoni wayinda mpawo walyatuuka masokwe aayo aayasa. 10 Ndizizi loko kuti wayizunda Edomu, lino moyo wako walidunda. Botelwa abulemu bwako, pesi kkala mung’anda yako.* Nkamboonzi nuyanda kulyeetela mapenzi, kuti unyonyooke iwe aJuda?” 11 Pesi Amaziya taakaswiilila pe.
Nkinkaako, Mwaami Jehowashi wa-Israyeli wakayinka, mpawo wakalwana aaMwaami Amaziya waJuda kuBbeti-shemeshi, iili muJuda. 12 Juda wakazundwa aa-Israyeli, nkinkaako, umwi awumwi wakachijila kumuunzi wakwe.* 13 Mwaami Jehowashi wa-Israyeli wakajata Mwaami Amaziya waJuda mwana waJehowashi mwana wa-Ahaziya kuBbeti-shemeshi. Bakayinka kuJerusalema mpawo wakadilisya muduli waJerusalema kuzwa kuGeedi lya-Efremu kusika kuGeedi lyakuKkona, makkiyubbiti aali 400.* 14 Wakabweza ngolida yoonse ansiliva azintu zyoonse zyakali mung’anda yaJehova amuzibikkilo zyamung’anda yamwaami,* kuswaanizya abasungwa. Mpawo wakabweeda kuSamariya.
15 Makani aachiindi woonse aali atala aJehowashi, azintu nzyaakachita amilimu yakwe yanguzu ambaakalwana aaMwaami Amaziya waJuda, taalembedwe na mubbuku lyamakani aachiindi aaziindi zyabaami ba-Israyeli? 16 Mpawo Jehowashi wakalazikwaamwi amasianyinakulu alubo wakazikkwaamwi abaami ba-Israyeli muSamariya. Mwanaakwe Jerobbowamu* wakaba mwaami mundawu yakwe.
17 Amaziya mwana waJehowashi mwaami waJuda wakapona minyaka iili 15 kuzwa naakafwa Jehowashi mwana waJehowahazi mwaami wa-Israyeli. 18 Makani aachiindi woonse aali atala a-Amaziya, taalembedwe na mubbuku lyamakani aachiindi aaziindi zyabaami baJuda? 19 Nikwakayinda chiindi, bantu bakamubukila kuJerusalema, mpawo wakachijila kuLakkishi, pesi bakatuma bantu kuti bamutobele kuLakkishi mpawo bakamujayila nkukooko. 20 Bakamuboozya kabamunyampwide aamabbiza, mpawo wakazikkwaamwi amasianyinakulu muJerusalema muMuunzi waDavida. 21 Mpawo bantu boonse bamuJuda bakabweza Azariya,* ooyo wakali aaminyaka iili 16 bamubikka kuti abe mwaami mundawu ya-Amaziya wisi. 22 Wakayakulula muunzi wa-Elati, mpawo wakawubweedezya Juda chiindi mwaami* kali walazikwaamwi kale amasianyinakulu.
23 Mumunyaka wachi 15 wabweendelezi bwa-Amaziya mwana waJehowashi mwaami waJuda, Jerobbowamu mwana waJehowashi mwaami wa-Israyeli wakaba mwaami muSamariya, alubo wakeendelezya kwaminyaka iili 41. 24 Wakaliswini kuchita zibi mumeso aaJehova. Taakazisiya pe zibi zyoonse Jerobbowamu mwana waNebbati nzyaakali wapa kuti Israyeli achite. 25 Wakabweedezya mugaano wa-Israyeli kuzwa kuLebbo-hamati* kusika kuLwizi lwa-Arabba,* kweendelana ajwi lyaJehova Leza wa-Israyeli ndyaakaamba kwiinda mumubelesi wakwe Jona mwana wa-Amitayi, mupolofita wakuGati-heferi. 26 Nkaambo Jehova wakali waabona mapenzi mapati aa-Israyeli. Taakwe muntu wakasyaala kuti agwasye Israyeli, nibaba aabo batagwasyi abatakwe manguzu. 27 Pesi Jehova wakali wasyomezya kuti tazoolizimi pe zina lya-Israyeli aanyika. Nkinkaako, wakabavuna kabelesya kuboko kwaJerobbowamu mwana waJehowashi.
28 Makani aachiindi woonse aali atala aJerobbowamu, azintu zyoonse nzyaakachita amilimu yakwe yanguzu, mbaakalwana ambaakabweedezya Damasikko aHamati kuli Juda mu-Israyeli, taalembedwe na mubbuku lyamakani aachiindi aaziindi zyabaami ba-Israyeli? 29 Mpawo Jerobbowamu wakalazikwaamwi amasianyinakulu, nkukwaamba baami ba-Israyeli. Mwanaakwe Zakkariya wakaba mwaami mundawu yakwe.