Samiyele Wakusaanguna
10 Kuzwa waawo, Samiyele wakabweza chakubikkila mafuta mpawo wakatila mafuta mumutwe waSawulu. Wakamumyonta mpawo wakati: “Jehova taakunanika na kuti ube muzulwidi walukono lwakwe? 2 Nwaandisiya sunu, uyoojana baalumi babili aafwiifwi akabanda kaRakkeli muchilawu chaBbenjamini kuZeliza mpawo bazookubuzya kuti, ‘Madonki ngwaakayinkide kuyooyanduula akaboneka, pesi lino wuso waluba atala amadonki, waabukataazikana atala anduwe. Ulikuti: “Ndilachita biyeni atala amwanaangu?”’ 3 Nwaazwa aandawu eeyo, weende kusika ukaakusike kumunsamu mupati uuli kuTabbori, ooko nkutakaswaane baalumi batatu kabalikuya kuli Leza wakasimpe kuBbeteli. Umwi unoonyampwide tupongo tutatu, umwi unoonyampwide zinkwa zitatu alubo umwi unoonyampwide nongo mpati yawayini. 4 Bazookujuzya mpawo bakupe zinkwa zibili alubo weelede kuzitambula zinkwa eezyo. 5 Kuzwa waawo, uyoosika kukalundu kaLeza wakasimpe, ooko kunooli nkamu yamasooja aamaFilisiti. Nwaanjila mumuunzi, uyooswaanana aankamu yabapolofita kabakunuka kuzwa kundawu iili aajulu alubo chibelesyo chantambo, kantimbwa, nsakalala anyeele zinoolizigwa kunembo lyabo chiindi nibanoopolofita. 6 Muuya waJehova uzookupa manguzu alubo uzoopolofitaamwi ambabo mpawo uzoochincha ube muntu uumbi. 7 Zitondeezyo eezi niziyoochitika, ukachite kufumbwa kuboko kwako nzikunookonzya kuchita, nkaambo Leza wakasimpe uli aanduwe. 8 Kuzwa waawo, uzoondisaangunine kuya kuGiligali mpawo ndizootobela kandiza kulinduwe kuti ndizoope zipayizyo zitentwa azipayizyo zyalumvwanano. Weelede kulinda kwamazuba aali musanu aabili kusika ndizoosike. Mpawo ndizookubuzya nzweelede kuchita.”
9 Sawulu mbaakachengunuka biyo kuti azwe aali Samiyele, Leza wakasaanguna kuchincha moyo wakwe kuti ube mbuli wawumwi muntu mpawo zitondeezyo zyoonse eezi zyakazuzikizigwa mubuzuba mbuboobo. 10 Nkinkaako, bakazwa mpawaawo, baya kuchilundu mpawo kabunga kabapolofita kakamuswaana. Aachiindi nchicheecho, muuya waLeza wakamupa manguzu alubo wakasaanguna kupolofita aakati kabo. 11 Bantu boonse bakamwizi chiindi nibakamubona kalikupolofitaamwi abapolofita, bakaambuula chabo-chabo kabati: “Niinzi chachitika kumwana waKkishi? Sawulu anguwe waba mupolofita na?” 12 Umwi mwaalumi wankukooko wakati: “Pesi wisi wabamwi aaba ngwani?” Nkinkaako, kwakaba kaambyo* kati: “Sawulu anguwe waba mupolofita na?”
13 Naakamaninsya kupolofita, wakayinka kundawu iili aajulu. 14 Mukuya kwachiindi, bbululu wawisi wakabuzya Sawulu amubelesi wakwe kuti: “Mwakali mwaya kuli?” Mpawo wakati: “Twakali kukuyanduula madonki, pesi teetwakaajana pe, nkinkaako, twakazooyinka kuli Samiyele.” 15 Bbululu wawisi waSawulu wakati: “Ndikumbila mundibuzye kuti Samiyele wakatyeni kulindinywe?” 16 Sawulu wakamusandula kuti: “Wakatubuzya kuti madonki akaboneka.” Pesi Sawulu taakamubuzya pe nzyaakaamba Samiyele atala ankani yabwaami.
17 Samiyele wakayita bantu kuti babunganaamwi kuli Jehova kuMizipa 18 mpawo wakati kuma-Israyeli: “Mbobu mbaamba Jehova Leza wa-Israyeli: ‘Ndime ndakagwisya Israyeli kuzwa mu-Ijipita akumuvuna kuzwa mukuboko kwama-Ijipita amukuboko kwabwaami boonse bwakali kumudyaaminina. 19 Pesi sunu mwamukaka Leza wanu, ooyo wakali Muvuni wanu kumapenzi aanu woonse akumakataazyo alubo mwaamba kuti: “Peepe, iwe weelede kutusalila mwaami kuti atweendelezye.” Lino amwiimikile kunembo lyaJehova kweendelana amisyobo yanu alubo kweendelana azyuulu zyanu.’”
20 Nkinkaako, Samiyele wakapa kuti misyobo yoonse ya-Israyeli iswene aafwiifwi alubo musyobo waBbenjamini wakasalwa. 21 Mpawo wakapa kuti musyobo waBbenjamini uswene aafwiifwi kweendelana ampuli zyawo alubo mpuli yamaMatiri yakasalwa. Kumamanino, Sawulu mwana waKkishi wakasalwa. Pesi nibakamuyanduula taakajanika pe. 22 Nkinkaako, bakabuzya Jehova kuti: “Mwaalumi ooyo wasika na?” Jehova wakasandula kuti: “Nguulya uliyubide muzibbudu.” 23 Nkinkaako, bakachijaana baakumweeta kuzwa nkukooko. Naakayimikila aakati kabantu, wakali mulamfu kwiinda bantu boonse zyakuti taakwe muntu wakali kwiinda aamagwezyo aakwe pe. 24 Samiyele wakabuzya bantu boonse kuti: “Mwamubona na muntu Jehova ngwaasala kuti taakwe uuli mbuli nguwe aakati kabantu boonse?” Mpawo bantu bakasaanguna koompolola kabati: “Awongole mwaami!”
25 Samiyele wakabuzya bantu atala azyeelelo nzibalaazyo baami mpawo wakazilemba mubbuku, walibikka kunembo lyaJehova. Kuzwa waawo, Samiyele wakabuzya bantu boonse kuti beende, umwi awumwi kung’anda yakwe. 26 Anguwe Sawulu wakaya kumuunzi wakwe kuGibbeya kalikusindikilwa aamasooja bakali basungwaazigwa aaJehova kuti bachite oobo. 27 Pesi bamwi bantu batagwasyi bakati: “Nga ulatuvuna biyeni ooyu?” Nkinkaako, bakamufubaazya alubo teebakamweetela chipo nichiba chimwi. Nikuba oobo, taakwe nzyaakaamba pe.*