Samiyele Wakusaanguna
11 Mpawo Nahashi mu-Amoni wakasika wakkempa kuti alwane Jabbeshi iili muGiliyadi. Baalumi boonse bamuJabbeshi bakati kuli Nahashi: “Pangana aandiswe chizuminano mpawo tulakubelekela.” 2 Nahashi mu-Amoni wakati kulimbabo: “Ndilapangana aandinywe chizuminano kuti meso aanu aakuchilisyo woonse agwisigwa. Ndilachita oobo kuchitila kuti ma-Israyeli boonse bafwe bweeme.” 3 Baalu bamuJabbeshi bakamusandula kuti: “Tupe mazuba aali musanu aabili kuchitila kuti tutume batumwa muchilawu choonse cha-Israyeli. Kuti kakutakwe muntu uutatuvune, tulalipeda kulinduwe.” 4 Nikwakayinda chiindi, batumwa bakasika kuGibbeya nkwaakali kukkala Sawulu alubo bakaamba majwi aaya bantu kabamvwide mpawo bantu boonse bakasaanguna kulila loko.
5 Pesi Sawulu wakasika kazwa musokwe kalikubinga ng’ombe mpawo wakati: “Niinzi chachitika kubantu? Nkamboonzi nibalikulila?” Bakamubuzya majwi aabaalumi bakuJabbeshi. 6 Sawulu naakamvwa majwi aayo, muuya waLeza wakamupa manguzu alubo wakayaka biya akunyema. 7 Nkinkaako, wakabweza chipani chabapule bang’ombe wabanenga muzipanzi mpawo wakazitumizya muchilawu choonse cha-Israyeli mumaboko aabatumwa aabo. Batumwa aabo bakaamba kuti: “Kufumbwa muntu uutatobeli Sawulu aSamiyele, weelede kulangilila kuti eezi zichitike kung’ombe zyakwe!” Bantu bakasaanguna kuyoowa Jehova zyakuti bakazwa kuti baye kunkondo kabali aamuzeezo uumwi. 8 Mpawo wakabala bantu muBbezekki. Kwakali ma-Israyeli bali 300 000 abaalumi bamusyobo waJuda bali 30 000. 9 Mpawo bakabuzya batumwa bakali basika kuti: “Nzezi nzimweelede kubuzya baalumi bakuJabbeshi yamuGiliyadi, ‘Juunza zuba nilyabala, muzoofutulwa.’” Kuzwa waawo, batumwa bakabweeda mpawo bakaakubuzya baalumi bakuJabbeshi alubo bakabotelwa loko. 10 Nkinkaako, baalumi bakuJabbeshi bakati: “Juunza tulalipeda kulindinywe alubo mulakonzya kutuchitila kufumbwa nzimubona kuti zilikabotu.”
11 Mubuzuba bwakatobela, Sawulu wakaanzaanisya bantu kuti babe nkamu zitatu alubo bakeenda kusikila baakusika aakati kakkeempu aachiindi chakulinda kwakuseeni* mpawo bakajaya ma-Amoni kusika zuba nilyakabala. Aabo bakafutuka, bakasansaana zyakuti taakwe bantu babili bakasyaalaamwi. 12 Mpawo bantu bakati kuli Samiyele: “Mbaani bakali kwaamba kuti, ‘Sawulu nga ulaba mwaami wesu na?’ Amubeete ookuno bantu aabo tubajaye.” 13 Nikuba oobo, Sawulu wakati: “Taakwe muntu weelede kujayigwa pe buzuba oobuno, nkaambo sunu Jehova wafutula Israyeli.”
14 Nikwakayinda chiindi, Samiyele wakati kubantu: “Amuze tuye kuGiligali tukakwaambilizye lubo kuti Sawulu waba mwaami.” 15 Nkinkaako, bantu boonse bakayinka kuGiligali alubo bakabikka Sawulu kuti abe mwaami kunembo lyaJehova kuGiligali. Kuzwa waawo, bakapa zipayizyo zyalumvwanano kunembo lyaJehova nkukooko alubo Sawulu abaalumi boonse ba-Israyeli bakasekelela kabali kukondwa loko.