Baami Wachibili
4 Umwi mwanakazi wakakwetwe aawumwi wabana babapolofita wakakwiilila Elisha kati: “Mubelesi wako, mulumaangu wakafwa, iwe uzizi kabotu kuti mubelesi wako wakali kuyoowa Jehova chiindi choonse. Lino muntu ngutuli aachikwelete chakwe wasika kuti azoobweze bana bangu babili kuti babe bazike bakwe.” 2 Elisha wakati kulinguwe: “Uyanda kuti ndikuchitileenzi? Amba, ulaanzi mung’anda yako?” Wakasandula kuti: “Mubelesi wako taakwe nchalaacho pe mung’anda kunze kwanongo yamafuta kupela.” 3 Mpawo wakati: “Yinka kuli basimayakilane bako boonse ukakumbile nongo, ukakumbile nongo zitakwe chintu pe. Utakakumbili ziche. 4 Mpawo unjile mung’anda ulijalile iwe abana bako. Utile mafuta munongo zyoonse, eezyo zinga zyazula uzibikke kumbali.” 5 Mwanakazi ooyo wakeenda wamusiya.
Naakalijalila mung’anda abana bakwe, bana bakwe bakali kumutambikizya nongo, mpawo we wakali kutila mafuta munongo. 6 Nongo eezyo nizyakazula, mwanakazi ooyo wakabuzya umwi mwanaakwe kuti: “Nditambikizye iimbi nongo.” Pesi wakati kuli banyina: “Takuchikwe zimbi pe nongo.” Mpawo mafuta akaleka kuzwa. 7 Nkinkaako, mwanakazi ooyo wakayinka waakubuzya muntu waLeza wakasimpe, mpawo wakati: “Yinka ukawuzye mafuta ubbadale zikwelete zyako, mpawo iwe abana bako mulabelesya mali iitasyaale.”
8 Limwi zuba Elisha wakayinka kuShunemu, ooko kwakali mwanakazi wakazibinkene loko alubo mwanakazi ooyo wakamukombelezya kuti alye nkukooko. Kufumbwa naakali kwiinda, wakali kuleya nkukooko kuti alye. 9 Mwanakazi ooyo wakati kumulumaakwe: “Ndilizi kuti muntu uusalala waLeza nguwe uuvuzya kwiinda aano. 10 Ikaka, atumuyakile kaanda aajulu aachiluli mpawo tumubikkile bulo, atebbulu, achuuno, achibikkilo chalambe. Kufumbwa chiindi naanootuswaya, unookkala mumoomo.”
11 Limwi zuba wakasika nkukooko, mpawo wakayinka mukaanda kakali aajulu aachiluli kuti akoone. 12 Mpawo wakati kuli Gehazi mubelesi wakwe: “Yita mwanakazi ooyu muShunemu.” Nkinkaako, wakamwiita, mpawo mwanakazi ooyo wakayimikila kunembo lyakwe. 13 Elisha wakati kuli Gehazi: “Buzya mwanakazi ooyu kuti, ‘Wakataazikana loko akaambo kandiswe. Uyanda kuchitilwaanzi? Ndikwaambwiide aamwaami na naakuti asilutwe wankamu yamasooja?’” Pesi mwanakazi ooyo wakasandula kuti: “Ndikkede aakati kabantu bakulindiswe.” 14 Nkinkaako, wakati: “Achitilweenzi mwanakazi ooyu?” Gehazi wakati: “Mwanakazi ooyu takwe mwana pe alubo mulumaakwe wachembaala.” 15 Aachiindi nchicheecho, wakati: “Mwiite.” Nkinkaako, wakamwiita mpawo mwanakazi ooyo wakayimikila aamulyango. 16 Mpawo wakati: “Aachiindi eechino munyaka uuza, unooli aamwana mulombe.” Pesi mwanakazi ooyo wakati: “Peepe simalelaangu, O muntu waLeza wakasimpe! Utandeeni pe ndimubelesi wako.”
17 Nikuba oobo, mwanakazi ooyo wakaba aada mpawo wakatumbuka mwana mulombe aachiindi nchicheecho mumunyaka wakatobela, mbuli Elisha mbaakali wamubuzya. 18 Mwana ooyo wakakomena mpawo limwi zuba wakayinka kuli wisi, ooyo wakali aabasikutebula. 19 Wakaliswini kubuzya wisi kuti: “Ndafwa mutwe, ndafwa mutwe!” Mpawo wisi wakabuzya mubelesi wakwe kuti: “Mutole kuli banyina.” 20 Mubelesi wakamunyampula wamutola kuli banyina, mpawo banyina bakamulela kusika sikati mpawo wakafwa. 21 Mwanakazi ooyo wakatanta waakumulazika aabulo bwamuntu waLeza wakasimpe, mpawo wakajala mulyango, weenda. 22 Wakayita mulumaakwe wamubuzya kuti: “Ikaka, nditumine umwi mubelesi adonki limwi ndichijaane ndiye kumuntu waLeza wakasimpe, ndilaboola.” 23 Mulumaakwe wakati: “Uyanda kuyoomubonenaanzi sunu? Mweezi tuunakkala pe alubo teesabata pe.” Nikuba oobo, mwanakazi ooyo wakati: “Zyoonse zilikabotu.” 24 Nkinkaako, mwanakazi ooyo wakatanta aadonki mpawo wakabuzya mubelesi wakwe kuti: “Yendesya. Uteendi mbichaani-mbichaani pe akaambo kandime kunze kwakuti ndakubuzya kuti uchite oobo.”
25 Nkinkaako, wakayinka kumuntu waLeza wakasimpe kuChilundu chaKkameli. Muntu waLeza wakasimpe mbaakamubona biyo mwanakazi ooyu kachili kule, wakati kuli Gehazi mubelesi wakwe: “Bona! Nguulya mwanakazi muShunemu. 26 Chijaana ukamutambule, ubuzye kuti, ‘Ulikabotu na? Mulumaako ulikabotu na? Ani mwanaako ulikabotu na?’” Mpawo mwanakazi ooyo wakati: “Zyoonse zilikabotu.” 27 Naakasika kumuntu waLeza wakasimpe kuchilundu, wakamujata kumawulu. Gehazi wakasika kuti amusukumine kule, pesi muntu waLeza wakasimpe wakati: “Musiye, nkaambo ukataazikene loko alubo Jehova wandisisila, taakwe nchaandibuzya pe.” 28 Mpawo wakati: “Kuli nindakakumbila mwana na kuli simalelaangu? Teendakaamba na kuti, ‘Utandipi bulangilizi bwakubeja’?”
29 Aachiindi nchicheecho, wakabuzya Gehazi kuti: “Lyaange zigogo zyako muchibuno mpawo ubweze nkoli yangu weende. Kuti waswaana muntu utamujuzyi pe, kuti umwi muntu wakujuzya utamuvwiili pe. Yinka, ukabikke nkoli yangu kubusyu bwamwana.” 30 Banyina bamwana bakati: “AJehova muumi anduwe mbuli muumi, tandikookusiya pe.” Nkinkaako, wakanyampuka wayinkaamwi ambabo. 31 Gehazi wakeenda kali kunembo lyabo mpawo wakabikka nkoli kubusyu bwamwana, pesi taakwe jwi lyakamvwika nikuba kuputuuka. Wakabweeda kuti akaswaanane aa-Elisha mpawo wakamubuzya kuti: “Mwana taabuka pe.”
32 Elisha naakanjila mung’anda, mwana wakalilede aabulo bwa-Elisha kafwide. 33 Wakanjila walijalila amwana, mpawo wakasaanguna kukomba kuli Jehova. 34 Wakatanta aabulo walandabala aajulu aamwana, mpawo wakabikka mulomo wakwe aamulomo wamwana, meso aakwe aameso aamwana, maboko aakwe aamaboko aamwana, wakaliswini kulyoolola aajulu aamwana, mpawo mubili wamwana wakasaanguna kukasaala. 35 Wakeendeenda mung’anda kaya ooku akooku mpawo wakatanta aabulo walyoolola lubo aajulu aamwana. Mwana ooyo wakeetyemuka kwaziindi zili musanu azibili mpawo wakalanga. 36 Elisha wakayita Gehazi mpawo wakati: “Yita mwanakazi muShunemu.” Nkinkaako, wakamwiita mpawo mwanakazi ooyo wakanjila mwaakabede. Mpawo wakati: “Bweza mwanaako.” 37 Mwanakazi ooyo wakasika waliwaala kumawulu aakwe, wavuntama kunembo lyakwe mpawo wakabweza mwanaakwe wazwa aanze.
38 Elisha naakabweeda kuGiligali, munyika eeyo mwakali nzala. Bana babapolofita bakalikkede kunembo lyakwe, mpawo wakabuzya mubelesi wakwe kuti: “Simpika mpoto mpati, ubajikile musinza bana babapolofita.” 39 Nkinkaako, umwi wabo wakayinka musokwe kuti akayanduule chisyu chamusokwe, wakajana musaansa wamusokwe mpawo wakachela bana bawo wazuzya chigogo chakwe. Wakabweeda waakwaanenga waabikka mumpoto, katazi pe kuti niinzi. 40 Nikwakayinda chiindi, bakapa bantu kuti balye, pesi mbubakawulya biyo musinza ooyo, bakoompolola kabati: “O muntu waLeza wakasimpe, muli lufu mumpoto oomu.” Mpawo bakakachilwa kulya. 41 Nkinkaako, wakati: “Amweete fulawa.” Naakayinyunyiina mumpoto, wakati: “Amupe bantu balye.” Chakulya eecho chakali mumpoto teechakachili kukola pe.
42 Kwakasika umwi mwaalumi wakuBbaala-shalisha, wakeetela muntu waLeza wakasimpe zinkwa zyabbali zili 20 zyamichelo yakusaanguna kubizwa, kuswaanizya asaka lyazilyo zipya. Mpawo Elisha wakati: “Pa bantu balye.” 43 Nikuba oobo, mubelesi wakwe wakati: “Nga ndilabapa biyeni chakulya eechi bantu bali 100?” Mpawo wakati: “Bape chakulya nchicheecho bantu balye, nkaambo Jehova waamba kuti, ‘Balalya mpawo zimwi zilasyaala.’” 44 Kuzwa waawo, wakabapa balya basiya zimwi, kweendelana ajwi lyaJehova.