Baami Wachibili
3 Jehoramu mwana wa-Ahabbu wakaba mwaami wa-Israyeli muSamariya mumunyaka wachi 18 wabweendelezi bwaMwaami Jehoshafati waJuda, alubo wakeendelezya kwaminyaka iili 12. 2 Wakaliswini kuchita zibi mumeso aaJehova, pesi taakali mbuli wisi pe naakuti mbuli banyina, nkaambo wakagwisya pila lisalala lyaBbaala, eelyo wisi ndyaakali wapanga. 3 Nikuba oobo, wakakakatila kuzibi eezyo Jerobbowamu mwana waNebbati nzyaakali wapa kuti Israyeli achite. Taakazisiya pe.
4 Mesha mwaami waMowabbu wakali sikuvuba mbelele, alubo chiindi chiingi wakali kubbadala bana bambelele bali 100 000 abagutu batageledwe bali 100 000 kawuli mutelo kumwaami wa-Israyeli. 5 Ahabbu mbaakafwa biyo, mwaami waMowabbu wakabukila mwaami wa-Israyeli. 6 Nkinkaako, Mwaami Jehoramu wakazwa muSamariya mubuzuba oobo, waakubunganizya ma-Israyeli boonse. 7 Alubo wakatumizya mulumbe kuMwaami Jehoshafati waJuda wakuti: “Mwaami waMowabbu wandibukila. Ulandisindikila na kunkondo kuti ndikalwane Mowabbu?” Mpawo wakati: “Iiyi, ndilayinka. Ime anduwe tuli bantu bamwi. Bantu bangu abantu bako mbamwi. Mabbiza aangu amabbiza aako ngamwi.” 8 Mpawo wakabuzya kuti: “Tulayinda aanzila iili?” Wakasandula kuti: “Tulayinda aanzila yamunkanda ya-Edomu.”
9 Mpawo mwaami wa-Israyeli wakayinkaamwi amwaami waJuda amwaami wa-Edomu. Nibakeenda kwamazuba aali musanu aabili kababelesya nzila iizyunguluka, bakabula maanzi aakupa masooja abanyama bavubwa mbibakalaabo. 10 Mwaami wa-Israyeli wakati: “Zyatubijila zintu! Jehova watubunganizya iswe tubaami batatu, kuti atubikke mukuboko kwaMowabbu.” 11 Mpawo Jehoshafati wakati: “Taakwe mupolofita waJehova na ookuno ngutukonzya kubuzya, tumvwe kuti Jehova utyeni?” Umwi wababelesi bamwaami wa-Israyeli wakasandula kuti: “Mpali Elisha mwana waShafati, ooyo wakali kutililizya Elija maanzi aakusamba mumaboko.”* 12 Mpawo Jehoshafati wakati: “Ijwi lyaJehova lili aanguwe.” Nkinkaako, mwaami wa-Israyeli aJehoshafati amwaami wa-Edomu bakakunuka baya kulinguwe.
13 Elisha wakabuzya mwaami wa-Israyeli kuti: “Uyandaanzi kulindime? Yinka kubapolofita bawuso akubapolofita babanyoko.” Pesi mwaami wa-Israyeli wakati kulinguwe: “Utaambi oobo pe, nkaambo nguJehova watubunganizya iswe tubaami batatu kuti atubikke mukuboko kwaMowabbu.” 14 Mpawo Elisha wakati: “AJehova wamakamu muumi, ooyo ngundibelekela, kaansinga teendalemeka Mwaami Jehoshafati waJuda, teendayinookulanga biya pe iwe nikuba kukubona. 15 Amundeetele sikulizya chibelesyo chantambo chakwiimbya.”* Sikulizya chibelesyo chantambo chakwiimbya mbaakasaanguna biyo, kuboko kwaJehova kwakasika aalinguwe. 16 Wakati, “Nzezi nzyaamba Jehova: ‘Amusye migelo myiingi mukalonga aaka, 17 nkaambo Jehova waamba kuti: “Tamukoobona luuwo pe, alubo tamukoobona mvula pe. Pesi kalonga aaka kalazula maanzi, mpawo mulanywa mulinkako, inywe azivuubwa zyanu abamwi banyama banu.”’ 18 Pesi eechi nchintu chiniini loko mumeso aaJehova, nkaambo anjiyo Mowabbu ulayibikka mukuboko kwanu. 19 Mweelede kudilisya myuunzi yoonse iikwabilidwe, amyuunzi yoonse mibotu, mugonke minsamu yoonse mibotu, musinke tusawu toonse twamaanzi, alubo mulundike mabwe mumyuunda yoonse mibotu.”
20 Kuseeni, aachiindi nikupegwa chipo chazilyo, maanzi akazwa kaazwida kubbazu lyaku-Edomu, mpawo ndawu eeyo yakazula maanzi.
21 MaMowabbu boonse bakamvwa kuti baami aaba bakali basika kuti bazoobalwane. Nkinkaako, bakabunganizya baalumi boonse, aabo bakali kukonzya kunyampula zilwanisyo,* mpawo bakayimikila kumugaano. 22 Nibakabuka kuseeni, zuba lyakali kubala aajulu aamaanzi, alubo kumaMowabbu aabo bakali mutaleeliya, maanzi akali kuboneka kaasalala mbuli ganzi. 23 Bakati: “Ndiganzi eeli! Kwaamba choonzyo, baami aaba bajayana chabo-chabo apanga. Lino O Mowabbu! Yinka ukabweze zintu zyabo!” 24 Nibakasika mukkeempu yama-Israyeli, ma-Israyeli bakanyampuka basaanguna kujaya maMowabbu mpawo maMowabbu bakachija. Ma-Israyeli bakanjila muMowabbu kabayabujaya maMowabbu. 25 Bakadilisya myuunzi, alubo mwaalumi umwi awumwi wakawaala bbwe mumyuunda yoonse mibotu, bayizuzya mabwe. Bakasinka tusawu toonse twamaanzi, alubo bakagonka minsamu yoonse mibotu. Kumamanino, miduli yamabwe yaKkiri-hareseti njiyo ayilikke yakasyaala kayiimvwi, mpawo basinkwicho bakayizyunguluka bayikolomona.
26 Mwaami waMowabbu naakabona kuti wazundwa munkondo, wakabweza baalumi bali 700 mbaakalaabo, aabo bakali aamapanga, kuti bapole bayinke kumwaami wa-Edomu. Pesi bakakachilwa kuchita oobo. 27 Nkinkaako, wakabweza mwanaakwe wakusaanguna kuzyalwa, ooyo wakali kuzooba mwaami mundawu yakwe, wamupa kali chipayizyo chitentwa aajulu aamuduli. Bantu bakamunyemena loko Israyeli, nkinkaako, bakaleka kulwana mwaami waMowabbu mpawo bakabweeda kunyika yabo.