Baami Wachibili
9 Mpawo Elisha mupolofita wakayita umwi wabana babapolofita wamubuzya kuti: “Lyaange zigogo zyako muchibuno mpawo ufwambaane ubweze chakubikkila mafuta, wiinke kuRamoti-giliyadi. 2 Nwaasika nkukooko, uyanduule Jehu mwana waJehoshafati mwana waNimushi. Unjile umwiite azwe aakati kabeenzinyina, unjilaawe mukaanda kamukati. 3 Mpawo ubweze chakubikkila mafuta waatile mumutwe wakwe, waambe kuti, ‘Nzezi nzyaamba Jehova: “Ndakunanika kuti ube mwaami wa-Israyeli.”’ Kuzwa waawo, ujule mulyango uchije mpawaawo.”
4 Nkinkaako, mubelesi wamupolofita wakeenda waya kuRamoti-giliyadi. 5 Naakasika, basilutwe bankamu zyamasooja bakalikkede nkukooko. Mpawo wakati: “Ndili aamulumbe wako, O silutwe.” Jehu wakati: “Nguwani mulumbe ooyo aakati kesu?” Wakati: “Nguwako, O silutwe.” 6 Nkinkaako, Jehu wakanyampuka wanjila mung’anda. Mubelesi wakamutila mafuta mumutwe mpawo wakati kulinguwe, “Nzezi nzyaamba Jehova Leza wa-Israyeli: ‘Ndakunanika kuti ube mwaami wabantu baJehova, ma-Israyeli. 7 Ujaye bamung’anda ya-Ahabbu simalelaako, alubo ndizoobweedezya ganzi lyababelesi bangu bapolofita alyababelesi baJehova boonse, aabo bakafwida mumaboko aaJezebbeli. 8 Bamung’anda ya-Ahabbu boonse bazooloba. Ndizoonyonyoona baalumi* boonse bamung’anda ya-Ahabbu, kuswaanizya abatagwasyi abatakwe manguzu mu-Israyeli. 9 Ndizoopa kuti ng’anda ya-Ahabbu ibe mbuli ng’anda yaJerobbowamu mwana waNebbati akuti ibe mbuli ng’anda yaBbaasha mwana wa-Ahija. 10 Pesi Jezebbeli, bankala bazoomulya mumuunda wakuJezriyeli, alubo taakwe muntu uutazoomuzikke pe.’” Mpawo mubelesi ooyo wakajula mulyango wachija.
11 Jehu naakaboola kubabelesi basimalelaakwe, bakamubuzya kuti: “Zyoonse zilikabotu na? Mwaalumi ooyu uupengede walikuyandaanzi kulinduwe?” Wakabasandula kuti: “Mulimuzi biya mbabede mwaalumi ooyu anzyaambuula.” 12 Pesi bakamubuzya kuti: “Ulabeja! Tubuzye kaka.” Mpawo wakati: “Nzezi nzyaandibuzya, mpawo wazooti, ‘Nzezi nzyaamba Jehova: “Ndakunanika kuti ube mwaami wa-Israyeli.”’” 13 Aachiindi nchicheecho, umwi awumwi wabo wakabweza chigogo chakwe wachiyala kumawulu aakwe aamatantilo aakatalikwe chintu, mpawo bakalizya mweembo kumwi kabati: “Jehu waba mwaami!” 14 Mpawo Jehu mwana waJehoshafati mwana waNimushi wakabukila Jehoramu.
Jehoramu ama-Israyeli boonse bakali kulinda kuRamoti-giliyadi kuchitila kuti batalwanwi aaMwaami Hazayeli waSiriya. 15 Nikwakayinda chiindi, Mwaami Jehoramu wakabweeda kuJezriyeli kuti akapone zilonda nzibakamuchisa maSiriya chiindi naakalwana Hazayeli Mwaami waSiriya.
Jehu wakati: “Kuti mwazumina, mutalekeli muntu naba uumwi kuti achije mumuunzi ayinke kuJezriyeli kuti akaambe makani aaya.” 16 Mpawo Jehu wakatanta mungolo yakwe waya kuJezriyeli, nkaambo Jehoramu wakalilede nkukooko kalichiside, alubo Mwaami Ahaziya waJuda wakali wayinka nkuko kuti akabone Jehoramu. 17 Mulindi naakayimvwi aangazi muJezriyeli, wakabona nkamu mpati yabantu baJehu kabalikuza. Mpawo wakati: “Ndibwene nkamu mpati yabantu.” Jehoramu wakati: “Bweza simabbiza umutume akaswaanane aambabo, mpawo umubuzye akaambe kuti, ‘Mwaza muluumuno na?’” 18 Nkinkaako, simabbiza wakayinka kuti akaswaanane aanguwe mpawo wakamubuzya kuti: “Nzezi nzyaamba mwaami, ‘Mwaza muluumuno na?’” Jehu wakati: “Luumuno lwanzi? Yinka kusule lyangu!”
Mpawo mulindi wakati: “Mutumwa wasika kulimbabo, pesi taaboola pe.” 19 Nkinkaako, wakatuma simabbiza wachibili, ooyo wakasika kulimbabo wababuzya kuti: “Nzezi nzyaamba mwaami: ‘Mwaza muluumuno na?’” Pesi Jehu wakati: “Luumuno lwanzi? Yinka kusule lyangu!”
20 Mpawo mulindi wakaamba kuti: “Wasika kulimbabo, pesi taaboola pe, alubo muntu uulikweenzya ngolo, weenzya mbuli mbayenzya Jehu muzukulu* waNimushi, nkaambo weenzya mbuli muntu uupengede.” 21 Jehoramu wakati: “Amusunge ngolo!” Nkinkaako, bakasunga ngolo yakwe yankondo, mpawo Mwaami Jehoramu wa-Israyeli aMwaami Ahaziya waJuda bakayinka umwi awumwi kali mungolo yakwe yankondo kuti bakaswaanane aaJehu. Bakamuswaana mumuunda waNabboti wakuJezriyeli.
22 Jehoramu mbaakamubona biyo Jehu, wakati: “Waza muluumuno na Jehu?” Pesi wakati: “Nga kulaba luumuno biyeni kakuli kuli bwaamu bwaJezebbeli banyoko abulozi bwabo bwiingi?” 23 Aachiindi nchicheecho, Jehoramu wakachengunusya ngolo yakwe kuti achije, mpawo wakabuzya Ahaziya kuti: “Twajatwa, Ahaziya!” 24 Jehu wakabweza daantambwa lyakwe wayasa Jehoramu aakati kamagwezyo mpawo kaanta kakazwida aamoyo, mpawo wakawida mungolo yakwe yankondo. 25 Mpawo wakabuzya Bbidikkari mugwasilizi wakwe kuti: “Mubweze umusowele mumuunda waNabboti wakuJezriyeli. Utalubi kuti, ime anduwe twakali kweenzyaamwi ngolo musule lya-Ahabbu wisi, chiindi Jehova lwakwe naakaambilizya makani aaya atala anguwe kuti: 26 ‘“Kwaamba choonzyo, mbuli mbundakabona ganzi lyaNabboti aganzi lyabana bakwe jilo,” mbaamba Jehova, “Ndizookukkwichizizya mumuunda nguyooyu,” mbaamba Jehova.’ Lino, mubweze umusowele mumuunda ooyu kweendelana ajwi lyaJehova.”
27 Mwaami Ahaziya waJuda naakabona zyakali kuchitika, wakachija kabelesya nzila yiinda kung’anda iili mumuunda. (Nikwakayinda chiindi, Jehu wakamwaandilila mpawo wakati: “Amumuyase anguwe!” Nkinkaako, bakamuyasa mungolo naakali kutanta kaya kuGuri aafwiifwi aku-Ibbiliyamu. Pesi wakaliswini kuchija kusikila waakusika kuMegido, mpawo wakafwida nkukooko. 28 Mpawo babelesi bakwe bakamunyampula mungolo bamutola kuJerusalema, bakamuzikka mukabanda kakwe amasianyinakulu muMuunzi waDavida. 29 Ahaziya wakaba mwaami waJuda mumunyaka wachi 11 wabweendelezi bwaJehoramu mwana wa-Ahabbu.)
30 Jehu naakasika kuJezriyeli, Jezebbeli wakazimvwa. Mpawo wakanana musila uusiya muzikoye, alubo wakalibamba masusu mumutwe mpawo wakalangaansi kali aawindo. 31 Jehu naakanjila aageedi, Jezebbeli wakati: “Zyamweendela kabotu na Zimuri, sikujaya simalelaakwe?” 32 Jehu naakalanga kuwindo lyamujulu wakati: “Ngwani uulikubbazu lyangu? Ngwani?” Aachiindi nchicheecho, balupati-pati mung’anda yamwaami babili naakuti batatu bakalangaansi kulinguwe. 33 Jehu wakati: “Amumuwaalile aansi!” Nkinkaako, bakamuwaalila aansi. Limwi ganzi lyakwe lyakatapukila kumuduli akumabbiza mpawo mabbiza aaJehu akamulyatuuka. 34 Kuzwa waawo, wakanjila walya akunywa. Mpawo wakati: “Amubweze mwanakazi ooyu uutukidwe mukamuzikke. Kabi mwana wamwaami.” 35 Pesi nibakayinka kuti bakamuzikke, taakwe nchibakajana pe kunze kwachipompo chamutwe wakwe azituta zyakwe amaboko aakwe. 36 Nibakaboola kuzoomubuzya, wakati: “Eezi zyazuzikizya jwi lyaJehova ndyaakaamba kwiinda mumubelesi wakwe Elija muTishibbi naakati, ‘Bankala bazoolya mubili waJezebbeli mumuunda wakuJezriyeli. 37 Alubo chidumbu chaJezebbeli chizooba manyuwa mumuunda wakuJezriyeli, kuchitila kuti batazoowambi kuti: “Ooyu nguJezebbeli.”’”