Baami Wachibili
8 Elisha wakati kumwanakazi uuli aamwana ngwaakali wabusya: “Nyampuka wiinke abamung’anda yako, mukakkale kamuli beenzu kufumbwa nkumukonzya kuya, nkaambo Jehova waambilizya kuti kuzooba nzala aanyika kwaminyaka iili musanu ayibili.” 2 Nkinkaako, mwanakazi ooyo wakanyampuka wachita nzyaakaamba muntu waLeza wakasimpe. Wakayinka abamung’anda yakwe waakukkala munyika yamaFilisiti kwaminyaka iili musanu ayibili.
3 Kumamanino aaminyaka iili musanu ayibili, mwanakazi ooyo wakaboola kazwa kunyika yamaFilisiti, mpawo wakayinka kumwaami kuti akakumbile ng’anda yakwe amuunda wakwe. 4 Mwaami wakali kwaambuula aaGehazi mubelesi wamuntu waLeza wakasimpe kati: “Ikaka, ndilungunwide zintu zyoonse zipati nzyaakachita Elisha.” 5 Kachilungunwida mwaami atala a-Elisha mbaakabusya mwana wakafwide, mwanakazi wakali aamwana wakabusigwa wakasika kumwaami kuti azookumbile ng’anda yakwe amuunda wakwe. Aachiindi nchicheecho, Gehazi wakati: “O mwaami simalelaangu, ooyu nguumwanakazi ngundalikwaamba, alubo ooyu nguumwanaakwe wakafwide Elisha ngwaakabusya.” 6 Mwaami wakabuzya kumwanakazi ooyo, mpawo wakamulungunwida mbuzyakachitika. Mpawo mwaami wakabuzya walupati-pati mung’anda yamwaami kuti: “Mubweedezye zintu zyakwe zyoonse abutebuzi bwamumuunda wakwe boonse kuzwa mubuzuba naakazwa munyika eeyi kusika sunu.”
7 Elisha wakasika kuDamasikko chiindi Bbeni-hadadi mwaami waSiriya naakali kuchiswa. Mwaami wakabuzigwa kuti: “Muntu waLeza wakasimpe wasika ookuno.” 8 Mpawo mwaami wakabuzya Hazayeli kuti: “Bweza chipo, wiinke ukaswaanane aamuntu waLeza wakasimpe. Ukabuzye makani kuli Jehova kwiinda mulinguwe, ukabuzye kuti: ‘Ndilapona na kubulwazi oobu?’” 9 Hazayeli wakayinka kuti akaswaanane aanguwe kali aachipo, nkukwaamba zintu zibotu zyamisyobo yoonse zyamuDamasikko, zyakanyampwidwe aankamela zili 40. Wakasika wayimikila kunembo lyakwe mpawo wakati: “Mwanaako Bbeni-hadadi mwaami waSiriya, wandituma kulinduwe kuzoobuzya kuti, ‘Ndilapona na kubulwazi oobu?’” 10 Elisha wakamusandula kuti: “Yinka ukamubuzye kuti, ‘Ulapona choonzyo,’ pesi Jehova wanditondeezya kuti uzoofwa kupela.” 11 Wakamulangisisya kusikila waba aabweeme. Mpawo muntu waLeza wakasimpe wakalila. 12 Hazayeli wakabuzya kuti: “Simalelaangu, ulilaanzi?” Wakasandula kuti: “Nkaambo ndilaazi mapenzi ngutazoobeetele ma-Israyeli. Uzootenta ndawu zyabo zikwabilidwe, baalumi babo basimide uzoobajaya aapanga, bana babo uzoobapwaya-pwaya, abanakazi babo bali aamala uzoobayawula.” 13 Hazayeli wakati: “Ime ndimubelesi wako munkala biyo, nga ndilachichita biyeni chintu chili boobu?” Pesi Elisha wakati: “Jehova wanditondeezya kuti iwe uzooba mwaami waSiriya.”
14 Hazayeli wakasiya Elisha wabweeda kuli simalelaakwe, mpawo mwaami wakamubuzya kuti: “Elisha wakubuzya kutyeni?” Wakasandula kuti: “Wandibuzya kuti ulapona choonzyo.” 15 Pesi mubuzuba bwakatobela, Hazayeli wakabweza mulembo wakuyala aabulo wawunika mumaanzi, mpawo wakamufundikizya* aanguwo kusikila wafwa. Mpawo Hazayeli wakaba mwaami mundawu yakwe.
16 Mumunyaka wamusanu wabweendelezi bwaJehoramu mwana wa-Ahabbu mwaami wa-Israyeli, chiindi Jehoshafati naakali mwaami waJuda, Jehoramu mwana waMwaami Jehoshafati waJuda wakaba mwaami. 17 Wakali aaminyaka iili 32 naakaba mwaami, alubo wakeendelezya kwaminyaka iili musanu ayitatu muJerusalema. 18 Wakeenda munzila yabaami ba-Israyeli, mbuli aabo bamung’anda ya-Ahabbu mbubakachita, nkaambo wakakwete mwana musimbi wa-Ahabbu. Wakaliswini kuchita zibi mumeso aaJehova. 19 Pesi Jehova taakayanda pe kunyonyoona Juda akaambo kaDavida mubelesi wakwe, mbukunga wakali wamusyomezya kuti ulamupa lambe abana bakwe balombe chiindi choonse.
20 Mumazuba aakwe, Edomu wakabukila Juda mpawo wakabikka mwaami wakwe. 21 Nkinkaako, Jehoramu wakazubuka waya kuZayiri angolo zyakwe zyoonse, wakanyampuka mansiku waakuzunda ma-Edomu bakamuzyungulukide abasilutwe bangolo. Mpawo masooja bakachijila kumatente aabo. 22 Pesi Edomu teeyakaleka pe kubukila Juda kusikila sunu. Anjiyo Libbina yakabukila Juda aachiindi nchicheecho.
23 Makani aachiindi woonse aali atala aJehoramu, azintu zyoonse nzyaakachita, taalembedwe na mubbuku lyamakani aachiindi aaziindi zyabaami baJuda? 24 Mpawo Jehoramu wakalazikwaamwi amasianyinakulu alubo wakazikkwaamwi amasianyinakulu muMuunzi waDavida. Mwanaakwe Ahaziya wakaba mwaami mundawu yakwe.
25 Mumunyaka wachi 12 wabweendelezi bwaJehoramu mwana wa-Ahabbu mwaami wa-Israyeli, Ahaziya mwana wamwaami Jehoramu waJuda wakaba mwaami. 26 Ahaziya wakali aaminyaka iili 22 naakaba mwaami, alubo wakeendelezya kwamunyaka uumwi muJerusalema. Banyina bakali kutegwa Ataliya muzukulu* waMwaami Omuri wa-Israyeli. 27 Wakeenda munzila yabamung’anda ya-Ahabbu alubo wakaliswini kuchita zibi mumeso aaJehova, mbuli bamung’anda ya-Ahabbu, nkaambo wakali aabubbululu abamung’anda ya-Ahabbu, mbukunga wisi wakakwete nkuko. 28 Nkinkaako, wakayinka aaJehoramu mwana wa-Ahabbu kuti akalwane aaMwaami Hazayeli waSiriya kuRamoti-giliyadi, pesi maSiriya bakamuchisa Jehoramu. 29 Nkinkaako, Mwaami Jehoramu wakabweeda kuJezriyeli kuti akapone zilonda nzibakamuchisa maSiriya kuRama* chiindi naakalwana aaMwaami Hazayeli waSiriya. Mpawo Ahaziya mwana waJehoramu mwaami waJuda wakakunuka waya kuJezriyeli kuti akabone Jehoramu mwana wa-Ahabbu, nkaambo bakali bamuchisa.*