Joshuwa
23 Nikwakayinda mazuba miingi kuzwa Jehova naakapumuzya ma-Israyeli kuli basinkondonyina ibakabazyungulukide, Joshuwa kali wachembaala akupona minyaka myiingi, 2 wakayita ma-Israyeli boonse, baalu babo, basilutwe babo, babetesi babo, abalupati-pati babo, mpawo wakati kulimbabo: “Ndakomena, minyaka yangu yavula. 3 Mwakalibonena zyoonse nzyaakachita Jehova Leza wanu kuzisi zyoonse eezi akaambo kandinywe, nkaambo Jehova Leza wanu nguwe wakali kumulwanina. 4 Amubone, ndakamwaabanisya nyika yazisi zyasyaala kuti ibe lukono lwamisyobo yanu kwiinda mukuuma chisale* kuswaanizya anyika yazisi zyoonse nzindakanyonyoona kuzwa kuJodani kuyoosika kuLwizi Lupati* luli kububbila. 5 Jehova Leza wanu nguwe wakali kubatatuula kunembo lyanu, akubatanda akaambo kandinywe. Mwakabweza nyika yabo kuti ibe yanu mbuli Jehova Leza wanu mbaakamusyomezya.
6 “Lino mweelede kuba aachibindi, mubambe akuchita zintu zyoonse zilembedwe mubbuku lyaMulawu waMozesi kutegwa mutaleyi kuzwa mulindilyo kamuya kuchilisyo naakuti kuchimweensi, 7 kwiinda mukutaliswaanizya azisi eezi zyasyaala aakati kanu. Tamweelede kwaamba mazina aabaleza bazyo naakuti kukonka aambabo, tamweelede kubabelekela naakuti kubakotamina. 8 Pesi mweelede kukakatila kuli Jehova Leza wanu mbuli mbumwali kuchita kusikila sunu. 9 Jehova uzoozitanda zisi zipati, zili aamanguzu kunembo lyanu, nkaambo taakwe muntu wakakonzya kumuzunda kusikila sunu. 10 Muntu uumwi aakati kanu uzoowandilila bantu bali chuulu, nkaambo Jehova Leza wanu ulikumulwanina mbuli mbaakasyomezya. 11 Nkinkaako, amukkale kamulilanga-langa kwiinda mukuyanda Jehova Leza wanu.
12 “Pesi kuti muleye kupela, mukakatile kuzisi eezi zyasyaala aakati kanu mpawo mukwatilane aambabo akumvwanana aambabo, 13 amuzibe kuti choonzyo Jehova Leza wanu ulaleka kumutandila zisi eezi. Zizoomubeda kakole achimboko chakumuumya kumusana amaamvwa mumeso aanu kusikila mumane munyika eeyi mbotu Jehova Leza wanu njaakamupa.
14 “Amubone, ndaba aafwiifwi kufwa,* muzizi kabotu amoyo wanu woonse abuumi bwanu boonse kuti taakwe jwi niliba limwi kuzwa kuzisyomezyo zyoonse zibotu nzyaakaamba Jehova Leza wanu, ilyakaleka kuzuzikizigwa. Zyoonse zyakazuzikizigwa kulindinywe. Taakwe jwi niliba limwi lyakaleka kuzuzikizigwa. 15 Mbuli mbuzyakazuzikizigwa zisyomezyo zyoonse zibotu nzyaakaamba Jehova Leza wanu kulindinywe, Jehova uzoomweetela zipenzyo zyoonse nzyaakasyomezya* alubo uzoomunyonyoona munyika eeyi mbotu njaakamupa Jehova Leza wanu. 16 Kuti mwatyola chizuminano chaJehova Leza wanu nchaakamulayilila kuti muchibambe, alubo kuti mwaya kuyoobelekela bamwi baleza akubakotamina, bukali bwaJehova buzoomuvutukila alubo muzoomana chakufwambaana munyika mbotu njaakamupa.”