Baami Wakusaanguna
13 Kalayililwa aaJehova, muntu waLeza wakazwa kuJuda waya kuBbeteli chiindi Jerobbowamu naakayimvwi aachipayililo kuti awuntumune busi bwazipayizyo. 2 Mpawo wakoompolola kuchipayililo kalayililwa aaJehova, kati: “Iwe chipayililo, chipayililo! Nzezi nzyaamba Jehova: ‘Bona! Mwana mulombe uutegwa Josiya uzoozyalwa mung’anda yaDavida! Uzootenta bapayizi bamundawu eezi zyakukombela aalinduwe kabali zipayizyo, aabo bawuntumuna busi bwazipayizyo aalinduwe alubo uzootenta mafuwa aabantu aalinduwe.’” 3 Mubuzuba oobo, wakapa chitondeezyo* kati: “Nchechi chitondeezyo* nchaamba Jehova: Bona! Chipayililo chilakwamuka mpawo dyota* lili aalinchicho lilatika.”
4 Mwaami mbaakalimvwa biyo jwi ndyaakaamba muntu waLeza wakasimpe kuchipayililo chakali kuBbeteli, Jerobbowamu wakatandabika kuboko kwakwe aachipayililo, mpawo wakati: “Amumujate!” Kuboko nkwaakatandabikide kamutondekede kwakayuma mpawaawo, taakachili kukonzya pe kukugonya. 5 Chipayililo chakakwamuka aakati mpawo dyota lyakali aachipayililo lyakatika kweendelana achitondeezyo* eecho muntu waLeza wakasimpe nchaakali wapa kweendelana ajwi lyaJehova.
6 Mpawo mwaami wakabuzya muntu waLeza wakasimpe kuti: “Ikaka ndikombelezezye kuli Jehova Leza wako kuti andifwide luzyalo, alubo ndikombele kuchitila kuti kuboko kwangu kube kabotu.” Muntu waLeza wakasimpe wakakombelezya Jehova kuti amufwide luzyalo, mpawo kuboko kwamwaami kwakaba mbuli mbukwakabede kumasaangunino. 7 Mwaami wakabuzya muntu waLeza wakasimpe kuti: “Tweende kumuunzi wangu ukalye alubo ndikakupe chipo.” 8 Pesi muntu waLeza wakasimpe wakabuzya mwaami kuti: “Nikuba kuti wali wandipa hafu yang’anda yako, teendayinooyinka kale pe anduwe, alubo teendayinoolya kale pe chakulya nikuba kunywa maanzi mundawu iino. 9 Nkaambo mbobu mbundakalayililwa aajwi lyaJehova: ‘Utakaakulyi chakulya nikuba kunywa maanzi, alubo utazooyindi aanzila njutazooyinke aayo.’” 10 Nkinkaako, wakeenda aayimwi nzila, taakabweeda aanzila njaakazaayo naakayinka kuBbeteli.
11 Kwakali umwi mupolofita munene wakali kukkala muBbeteli, bana bakwe bakaza bamulungunwida zyoonse muntu waLeza wakasimpe nzyaakachita mubuzuba oobo muBbeteli amajwi ngaakabuzya mwaami. Nibakamana kulungunwida wisi makani aaya, 12 wisi wakababuzya kuti: “Watozya kuli?” Nkinkaako, bana bakwe bakamutondeezya nzila njaakayinkaayo muntu waLeza wakasimpe wakuJuda. 13 Wakabuzya bana bakwe kuti: “Amundibikkile chakukkalila aadonki.” Bakamubikkila chakukkalila aadonki, mpawo wakatanta aalindilyo.
14 Wakatobela muntu waLeza wakasimpe mpawo wakamujana kakkede munsi aamunsamu mupati. Wakamubuzya kuti: “Ndunduwe muntu waLeza wakasimpe na wazwa kuJuda?” Wakavwiila kuti: “Iiyi ndime.” 15 Wakamubuzya kuti: “Tweende kumuunzi ukalye chakulya.” 16 Pesi wakamuvwiila kuti: “Tandikoobweeda aanduwe pe nikuba kuzumina kutambwa aanduwe, alubo tandikoolya chakulya anduwe nikuba kunywa maanzi mundawu iino. 17 Nkaambo jwi lyaJehova lyakandibuzya kuti, ‘Utakaakulyi chakulya nikuba kunywa maanzi nkukooko. Utazooyindi aanzila njutazooyinke aayo.’” 18 Mpawo wakamubuzya kuti: “Andime ndili mupolofita mbuli nduwe, ngilozi yandibuzya jwi lyaJehova kayiti, ‘Yinka ukamuboozye aze kung’anda yako kuchitila kuti azoolye chakulya akunywa maanzi.’” (Wakamweena.) 19 Nkinkaako, wakaboolaamwi anguwe kuti azoolye chakulya akunywa maanzi mung’anda yakwe.
20 Nibakakkede aatebbulu, ijwi lyaJehova lyakasikila mupolofita wakamuboozya, 21 mpawo wakabuzya muntu waLeza wakasimpe wakuJuda kuti, “Nzezi nzyaamba Jehova: ‘Akaambo kakuti wabukila Jehova alubo teewawubamba pe mulawu Jehova Leza wako ngwaakakupa, 22 pesi wabweeda kuti ukalye chakulya akunywa maanzi mundawu njwaakabuzigwa kuti, “Utakaakulyi chakulya pe nikuba kunywa maanzi,” chidumbu chako tachizoozikkwi mukabanda kamasianyookulu pe.’”
23 Muntu waLeza wakasimpe naakamaninsya kulya akunywa, mupolofita munene wakabikkila mupolofita ngwaakali waboozya chakukkalila aadonki. 24 Mpawo wakeenda, pesi wakaswaanana aamulavu, mpawo mulavu ooyo wakamujaya. Chidumbu chakwe chakali munzila alubo donki lyakaliimvwi kumbali aacho, anguwe mulavu wakaliimvwi kumbali aachidumbu eecho. 25 Kuli basimweenda nzila bakabona chidumbu munzila amulavu kayimvwi kumbali aachidumbu. Bakasika mumuunzi mwakali kukkala mupolofita munene baamba nzibakabona.
26 Mupolofita ooyo wakali wamuboozya munzila mbaakamvwa biyo makani aaya, wakati: “Nguulya muntu waLeza wakasimpe wakabukila Jehova. Jehova wakamutumina mulavu kuti umulume akumujaya kweendelana ajwi Jehova ndyaakamubuzya.” 27 Mpawo wakabuzya bana bakwe kuti: “Amundibikkile chakukkalila aadonki.” Mpawo bakamubikkila. 28 Wakeenda mpawo wakajana chidumbu kachili munzila, donki amulavu kaziimvwi kumbali aacho. Mulavu teewakachilya pe chidumbu nikuba kuluma donki. 29 Mupolofita ooyo wakabweza chidumbu chamuntu waLeza wakasimpe wachibikka aadonki, wakachiboozya mumuunzi mwaakali kukkala kuti azoomulile akumuzikka. 30 Nkinkaako, wakalazika chidumbu mukabanda kakwe alubo bakali kumulila kabati: “Kwabija loko mukwesu!” 31 Naakamaninsya kumuzikka, wakabuzya bana bakwe kuti: “Nindazoofwa, muzoondizikkile mundawu yazikkwa muntu waLeza wakasimpe. Mafuwa aangu, muzoowalazike aafwiifwi amafuwa aakwe. 32 Ijwi lyaJehova ndyaakaamba kuchipayililo chakali kuBbeteli akumaanda woonse aakukombela aakali mundawu zyakukombela mumyuunzi yaSamariya lizoozuzikizigwa choonzyo.”
33 Nikuba kuzwa chiindi zintu eezi nizyakachitika, Jerobbowamu taakasiya pe nzila zyakwe zibi, pesi wakaliswini kusala kufumbwa bantu kuti babe bapayizi bamundawu zyakukombela. Wakali kusala kupela kufumbwa muntu wakali kuyanda kuba mupayizi kati: “Abe umwi wabapayizi bamundawu zyakukombela.” 34 Chibi eechi nchibakachita bamung’anda yaJerobbowamu chakapa kuti banyonyoonwe akuloba aanyika.