Myeelwe
20 Mumweezi wakusaanguna, mbungano yoonse yama-Israyeli yakasika munkanda yaZini alubo bantu bakasaanguna kukkala kuKkadeshi. Ooku nkuko Miriyemu nkwaakafwida akuzikkwa.
2 Kundawu eeyo, teekwakalikwe maanzi pe aakuti mbungano inywe, nkinkaako, mbungano yakabungana kuti ikazyanie aaMozesi a-Aroni. 3 Bantu bakasaanguna kukazyania aaMozesi kabati: “Kaansinga andiswe twakafwa babbululu besu nibakafwa kunembo lyaJehova! 4 Nkamboonzi nimwakeeta mbungano yaJehova munkanda oomuno kuti iswe azivuubwa zyesu tufwe? 5 Nkamboonzi nimwakatugwisya ku-Ijipita kuti mutweete munyika eeyi mbi? Tatukonzyi pe kubyala mbuto, masaansa, mikuyu amapomegraneti, naaba maanzi aakunywa taawo pe.” 6 Mpawo Mozesi a-Aroni bakazwa kunembo lyambungano baya kumanjililo aatente lyakuswaanganina, bavuntama aansi mpawo bulemu bwaJehova bwakasaanguna kulibonia aalimbabo.
7 Mpawo Jehova wakati kuli Mozesi: 8 “Bweza mufunko, iwe a-Aroni mukulanaako mwiite mbungano mpawo mwaambuule aabbwe kunembo lyabo kuchitila kuti ligwisye maanzi aalyo. Mpawo ulabagwisizya maanzi kuzwa mubbwe eelyo alubo ulapa mbungano yama-Israyeli azivuubwa zyabo maanzi aakunywa.”
9 Nkinkaako, Mozesi wakabweza mufunko kunembo lyaJehova mbuli mbaakamulayilila. 10 Mozesi a-Aroni bakayita mbungano yoonse kunembo lyabbwe alubo wakati kulinjiyo: “Mumvwe inywe nibasikubukila! Tumugwisizye maanzi na mubbwe eeli?” 11 Kuzwa waawo, Mozesi wakatambika kuboko kwakwe kujulu, wawuma bbwe amufunko wakwe tubili. Mpawo maanzi miingi akasaanguna kuzwa alubo mbungano yama-Israyeli azivuubwa zyabo bakasaanguna kunywa.
12 Mpawo Jehova wakabuzya Mozesi a-Aroni kuti: “Akaambo kakuti teemwandisyoma akupa kuti ndisalale kunembo lyama-Israyeli, tamukayinjizyi pe mbungano eeyi munyika njindiyanda kwiipa.” 13 Aaya ngiimaanzi aakuMeribba,* ooko ma-Israyeli nkwaakakazyania aaJehova, zyakuti wakalisalazya aakati kabo.
14 Mpawo Mozesi wakatuma batumwa kuzwa kuKkadeshi kabaya kumwaami waku-Edomu kati: “Nzezi nzyaamba bbululu wako Israyeli, ‘Ulibuzi kabotu buyumu-yumu mbutwakaswaananaabo. 15 Mataateesu akaya ku-Ijipita alubo twakaakukkala nkuko kwaminyaka myiingi.* Mukuyungizya, ma-Ijipita bakatupenzya iswe amataateesu. 16 Kumamanino, twakakwiilila Jehova mpawo wakatumvwa alubo wakatuma ngilozi akutugwisya mu-Ijipita. Lino tuli aaKkadeshi, muunzi uuli kumugaano wachilawu chako. 17 Inche kaka tuzumizye twiinde munyika yako. Tatukooleya mumyuunda njimulima naakuti mumyuunda yamisaansa alubo tatukoonywa maanzi aamuzikala zyanu. Tulabelesya Mugwagwa waMwaami katutaleyi kuchilisyo naakuti kuchimweensi kusikila twiinde muchilawu chako.’”
18 Nikuba oobo, Edomu wakati kulinguwe: “Utayindi pe muchilawu changu. Kuti wachita oobo, ndilaza kuti ndizookulwane aapanga.” 19 Mpawo ma-Israyeli bakati kulinguwe: “Tuleenda aamugwagwa alubo kuti iswe azivuubwa zyesu twanywa maanzi aako, tulaabbadala. Nchituyanda kupela, nkwiinda muchilawu chako.” 20 Nikuba oobo, wakati: “Tamukooyinda pe.” Kuzwa waawo, Edomu wakazwa kuti akabaswaane kali aabantu biingi amasooja aali aamanguzu.* 21 Nkinkaako, Edomu wakakaka kuti Israyeli ayinde muchilawu chakwe mpawo Israyeli wakasiyanaawe, wayinda kumbi.
22 Ma-Israyeli, nkukwaamba mbungano yoonse, bakazwa kuKkadeshi mpawo bakasika kuChilundu chaHori. 23 Mpawo Jehova wakabuzya Mozesi a-Aroni kuChilundu chaHori kumugaano wanyika ya-Edomu kuti: 24 “Aroni uzoozikkwa mbuli mbubakazikkwa masianyinakulu.* Tazoonjili pe munyika njindiyanda kuzoopa ma-Israyeli nkaambo inywe kamuli babili teemwakawuswiilila pe mulawu wangu atala amaanzi aakuMeribba. 25 Bweza Aroni amwanaakwe Eliyezari, wiinkaabo kuChilundu chaHori. 26 Ukagwisye Aroni zigogo, uzizwaatike mwanaakwe Eliyezari alubo Aroni uyoofwida nkukooko.”
27 Nkinkaako, Mozesi wakachita mbuli mbaakamulayilila Jehova mpawo bakatanta Chilundu chaHori, mbungano yoonse kayilangide. 28 Kuzwa waawo, Mozesi wakagwisya Aroni zigogo, wazizwaatika mwanaakwe Eliyezari. Aroni wakafwa nkukooko aajulu aachilundu. Mpawo Mozesi a-Eliyezari bakakunuka kuzwa aajulu aachilundu. 29 Mbungano yoonse niyakabona kuti Aroni wafwa, ma-Israyeli boonse bakamulila kwamazuba aali 30.