Myeelwe
19 Jehova wakaambuula lubo aMozesi a-Aroni kati: 2 “Ooyu nguumulawu Jehova ngwaalayilila, ‘Buzya ma-Israyeli kuti beelede kubweza ng’ombe iili aamubala uusalala, iilikabotu, iitakwe nchiisolwaacho pe alubo iitanabikkwa jokwe pe. 3 Weelede kwiipa Eliyezari mupayizi, ayitole aanze aakkeempu alubo ilajayigwa kunembo lyakwe. 4 Mpawo Eliyezari mupayizi ulatompa kanwe kakwe muganzi lyayo mpawo ulalilosya kwaziindi zili musanu azibili kunembo lyatente lyakuswaanganina. 5 Ng’ombe eeyo ilawumpwa kunembo lyakwe. Chikumba chayo, nyama yayo, ganzi lyayo aamwi alufusi zilatentwa. 6 Alubo mupayizi ulabweza chisamu chamukkedari, hisopu amulembo uusalala mpawo ulaziwaalila mumulilo mwiili kutentelwa ng’ombe eeyo. 7 Mupayizi ulawacha zigogo zyakwe mpawo asambe aamubili. Naamaninsya kuchita oobo, ulakonzya kunjila mukkeempu, pesi tanoosalali pe kusika goko.
8 “‘Ooyo watenta ng’ombe eeyo, weelede kuwacha zigogo zyakwe, asambe aamubili alubo tanoosalali pe kusika goko.
9 “‘Umwi muntu uusalala ulayola dyota lyang’ombe akulisowela aanze aakkeempu kundawu iitakwe doti alubo lyeelede kubambwa aambungano yama-Israyeli, kuchitila kuti bazoolibelesye kubamba maanzi aakulisalazya. Nchipayizyo chachibi. 10 Ooyo wayola dyota lyang’ombe weelede kuwacha zigogo zyakwe alubo tanoosalali pe kusika goko.
“‘Ooyu unooli mulawu wama-Israyeli amweenzu uukkede aakati kabo kukabe kutamani. 11 Kufumbwa muntu uuguma muntu uufwide,* tanoosalali pe kwamazuba aali musanu aabili. 12 Muntu ooyo weelede kulisalazya aamaanzi mubuzuba bwachitatu mpawo mubuzuba bwamusanu aabili unooli wasalala. Pesi kuti taalisalazya mubuzuba bwachitatu, nkukwaamba kuti mubuzuba bwamusanu aabili, unooli katasalali. 13 Muntu woonse uuguma chidumbu chamuntu mpawo waleka kulisalazya, unooli wasofwaazya tente lyaJehova lyakukombela alubo weelede kujayigwa aakati kama-Israyeli. Unoosofweede akaambo kakuti maanzi aakulisalazya taakasansiilwa pe aalinguwe. Ulayinkilila kunembo kasofweede.
14 “‘Ngoyu mulawu uutabeleke kuti muntu wafwida mutente: Muntu woonse uutanjile mutente eelyo amuntu woonse walimutente eelyo balasofwaala kwamazuba aali musanu aabili. 15 Nichiba chibikkilo chitakwe chivunisyo chisungilidwe aali nchicho, chilisofweede. 16 Kufumbwa muntu uuli musokwe uuguma muntu wajayigwa aapanga naakuti chidumbu chamuntu naakuti chifuwa chamuntu naakuti ndawu yakuzikkila, unoosofweede kwamazuba aali musanu aabili. 17 Beelede kubwezela muntu ooyo uusofweede limwi dyota lyachipayizyo chachibi chakatentwa akutila maanzi aazwa mukasawu aalindilyo muchibikkilo. 18 Kuzwa waawo, muntu uusalala ulabweza hisopu akwiinika mumaanzi mpawo asansiile maanzi aayo aatente, aazibikkilo zyoonse, aabantu bakaliwo, aali yooyo wakaguma chifuwa naakuti wakaguma muntu wakajayigwa naakuti chidumbu naakuti ndawu yakuzikkila. 19 Muntu uusalala ulasansiila maanzi aayo aamuntu uutasalali mubuzuba bwachitatu amubuzuba bwamusanu aabili mpawo ulamusalazya kuzwa kuchibi chakwe mubuzuba bwamusanu aabili. Kuzwa waawo, ulawacha zigogo zyakwe akusamba aamubili mpawo ulasalala goko.
20 “‘Pesi muntu uusofweede uutalisalazyi weelede kujayigwa aakati kambungano akaambo kakuti wasofwaazya ndawu iisalala yaJehova. Ulisofweede akaambo kakuti maanzi aakulisalazya taakasansiilwa pe aalinguwe.
21 “‘Ooyu mulawu wabo kukabe kutamani wakuti: Muntu uulikusansiila maanzi aakulisalazya, weelede kuwacha zigogo zyakwe alubo muntu uuguma maanzi aakulisalazya, ulasofwaala kusika goko. 22 Kufumbwa chintu chigumwa aamuntu uusofweede, chilasofwaala alubo muntu uuchiguma ulasofwaala kusika goko.’”