Johane Wakusaanguna
2 Bana bangu, ndilikumulembela zintu eezi kuchitila kuti mutachiti chibi. Pesi kuti umwi wachita chibi, tuli aamugwasilizi* kuli Taata, Jesu Kkristu ooyo uululeme. 2 Ngunguwe chipayizyo chakumvwanana chazibi zyesu,* kutali zibi zyesu kupela, pesi azyanyika yoonse. 3 Alubo kwiinda mulizeezi, nga twaziba kuti tumuzi kabotu, kuti twayinkilila kunembo kubamba milawu yakwe. 4 Ooyo waamba kuti, “Ndilimuzi,” pesi katabambi milawu yakwe, mubeji alubo kasimpe takamo pe mulinguwe. 5 Pesi kufumbwa muntu uuswiilila jwi lyakwe, luyando ndwalaalo kuli Leza lwachitwa kuti lumaninine mulinguwe. Kwiinda mulizeezi, nga twaziba kuti tulaamwi anguwe. 6 Ooyo waamba kuti ulayinkilila kunembo kalaamwi anguwe, weelede kwiinkilila kunembo kweenda mbuli mbaakeenda nguyooyo.
7 Nibayandwa, ndilikumulembela, kutali mulawu mupya pe, pesi mulawu wachiindi ngumwakalaawo kuzwa kumatalikilo. Mulawu ooyu wachiindi, ndijwi ndimwakamvwa. 8 Alubo, ndilikumulembela mulawu mupya, wakali wakasimpe kulinguwe awakasimpe akulindinywe, nkaambo mudima ulikwiinda alubo mumuni wachoonzyo ulikumweka.
9 Ooyo waamba kuti uli mumumuni pesi kazonda mukombinyina, uchili mumudima. 10 Ooyo uuyanda mukombinyina, ukkala kali mumumuni alubo taakwe kaambo kapa kuti alebwe pe mulinguwe. 11 Pesi ooyo uuzonda mukombinyina, uli mumudima alubo ulikweenda mumudima alubo takuzi pe nkwalikwiinka nkaambo mudima woofwaazya meso aakwe.
12 Ndilikumulembela nibana, nkaambo zibi zyanu zyalekelelwa akaambo kazina lyakwe. 13 Ndilikumulembela nimatata, nkaambo mwamuziba ooyo wakaliwo kuzwa kumatalikilo. Ndilikumulembela nibaalumi bachiinini, nkaambo mwamuzunda mubi. Ndamulembela nibana, nkaambo mwamuziba Taata. 14 Ndamulembela nimatata, nkaambo mwamuziba ooyo wakaliwo kuzwa kumatalikilo. Ndamulembela nibaalumi bachiinini, nkaambo mulisimide alubo jwi lyaLeza lilakkalilila mulindinywe alubo mwamuzunda mubi.
15 Mutayandi nyika niziba zintu zili mulinjiyo. Muntu uuyanda nyika, tamuyandi pe Taata, 16 nkaambo zintu zyoonse zili munyika, nkukwaamba zintu ziyandwa aamubili, zintu ziyandwa aameso akuyanda kubonwa akaambo kazintu nzyalaazyo muntu mubuumi,* tazizwi kuli Taata pe, pesi zizwa munyika. 17 Mukuyungizya, nyika ilayinda kuswaanizya azintu nziiyanda, pesi ooyo uuchita kuyanda kwaLeza, unooliwo kukabe kutamani.
18 Nibana, eeyi ni-awa yamamanino alubo mbuli mbumwakamvwa kuti sikukazya Kkristu ulikuza, nikuba lino, basikukazya Kkristu biingi baboneka, eezi zipa kuti tuzibe kuti, eeyi ni-awa yamamanino. 19 Bakazwa kulindiswe, pesi teebakali kubbazu lyesu* pe nkaambo kaansinga bakali kubbazu lyesu, nikuli bakakkala aandiswe. Pesi bakazwa kulindiswe kuchitila kuti kuboneke kuti teeboonse pe bali kubbazu lyesu. 20 Mwakananikwa ayooyo uusalala, alubo moonse muli aaluzibo. 21 Ndamulembela, kutali kuti tamukazi pe kasimpe, pesi akaambo kakuti mulikazi akuti taakwe kubeja pe kuzwa kukasimpe.
22 Ngwani mubeji kunze kwayooyo uukaka kuti Jesu nguKkristu? Ooyu nguusikukazya Kkristu, uukaka Taata aMwana. 23 Muntu woonse uukaka Mwana, talaamwi pe aTaata. Pesi kufumbwa muntu uuzumina Mwana, ulaamwi aTaata. 24 Pesi inywe, zintu nzimwakamvwa kumatalikilo, zyeelede kukkalilila mulindinywe. Kuti eezyo nzimwakamvwa kumatalikilo zyakkalilila mulindinywe, andinywe mulayinkilila kunembo kubaamwi aMwana akubaamwi aTaata. 25 Mukuyungizya, nzezi nzyaakatusyomezya we lwakwe, buumi butamani.
26 Ndilikumulembela zintu eezi atala abaabo balikweezya kumweena. 27 Pesi inywe, kunanikwa nkumwakatambula kuzwa kulinguwe, kulakkalilila mulindinywe alubo tamuyandikani muntu kuti amuyiisye pe. Pesi kunanikwa kuzwa kulinguwe kulikumuyiisya atala azintu zyoonse alubo nkwachoonzyo, teekwakubeja pe. Mbuli mbukwakamuyiisya, amwiinkilile kunembo kamulaamwi anguwe. 28 Lino bana bangu, amwiinkilile kunembo kamulaamwi anguwe, kuchitila kuti aazooyubununwa, tuzoobe aalwaangunuko lwakwaambuula akuti tutazoolitantamuni kuzwa kulinguwe katuli aabweeme kuchiindi chakubawo kwakwe. 29 Kuti kamuzi kuti uliluleme, nkukwaamba kuti mulizi kuti muntu woonse uukkala kachita bululami, wakazyalwa kuzwa kulinguwe.