Baami Wakusaanguna
20 Lino Mwaami Bbeni-hadadi waSiriya wakabunganizya nkamu yakwe yoonse yamasooja abamwi baami bali 32 amabbiza aabo angolo zyabo. Wakayinka kuti akasinkile muunzi waSamariya mpawo wakawulwana. 2 Wakatuma batumwa kuMwaami Ahabbu wa-Israyeli mumuunzi, mpawo wakati kulinguwe: “Nzezi nzyaamba Bbeni-hadadi, 3 ‘Nsiliva yako angolida yako nzizyangu, kuswaanizya abanakazi bako babotu abana bako babotu.’” 4 Mpawo mwaami wa-Israyeli wakasandula kuti: “Kweendelana amajwi aako, mwaami simalelaangu, ime azintu zyangu zyoonse tulibako.”
5 Mukuya kwachiindi, batumwa bakaboola lubo, mpawo bakati: “Nzezi nzyaamba Bbeni-hadadi, ‘Ndakakutumina mulumbe ooyu wakuti: “Ndipe nsiliva yako, ngolida yako, banakazi bako, abana bako.” 6 Pesi aachiindi eechino juunza, ndizootuma babelesi bangu kulinduwe, bazooyanduulisisya mung’anda yako amumaanda aababelesi bako, mpawo bazoobweza zintu zyako zyoonse zibotu bayinkaazyo.’”
7 Mwaami wa-Israyeli wakayita baalu boonse bamunyika mpawo wakati: “Amubone mapenzi ngayanda kutweetela mwaalumi ooyu, nkaambo ulikuyanda kuti ndimupe banakazi bangu, bana bangu, nsiliva yangu, angolida yangu, ime teendamukakila pe.” 8 Mpawo baalu boonse abantu boonse bakamubuzya kuti: “Utaswiilili pe alubo utazumini pe.” 9 Nkinkaako, wakabuzya batumwa baBbeni-hadadi kuti: “Amukabuzye mwaami simalelaangu kuti, ‘Zintu zyoonse zyakusaanguna nzwaakandibuzya ndimubelesi wako ndilazichita, pesi eezi nzwaamba lino, tandikoozichita pe.’” Mpawo batumwa bakayinka baakumubuzya makani aaya.
10 Bbeni-hadadi wakatumizya mulumbe ooyu kulinguwe wakuti: “Baleza abandipe chisubulo chipati kuti muSamariya musyaale lusuko lukkwana kuti ndizuzye kuboko kwamuntu woonse uunditobela!” 11 Mwaami wa-Israyeli wakasandula kuti: “Amukamubuzye kuti, ‘Muntu uuli kuzwaata zigogo zyakwe zyakunkondo atalidundi mbuli muntu uuli kuzizuununa pe.’” 12 Bbeni-hadadi mbaakayimvwa biyo nsandulo eeyi, chiindi we abaami nibakali kunywa mumatente aabo,* wakabuzya babelesi bakwe kuti: “Amulibambile kulwana!” Nkinkaako, bakalibambila kulwana muunzi.
13 Pesi umwi mupolofita wakayinka kuMwaami Ahabbu wa-Israyeli mpawo wakati: “Nzezi nzyaamba Jehova, ‘Wayibona na nkamu mpati yoonse eeyi? Ndilayibikka mukuboko kwako sunu, mpawo iwe ulaziba kuti ndime Jehova.’” 14 Ahabbu wakabuzya kuti: “Ulabelesyaani?” mpawo wakati: “Nzezi nzyaamba Jehova, ‘Ndilabelesya babelesi babasilutwe bazilikiti.’” Nkinkaako, wakabuzya kuti: “Ngwani uutasaangune nkondo?” mpawo wakati: “Nduwe!”
15 Ahabbu wakabala babelesi babasilutwe bazilikiti, mpawo wakajana kuti bakali 232. Kuzwa waawo, wakabala baalumi boonse ba-Israyeli mpawo wakajana kuti bakali 7 000. 16 Bakanyampuka beenda sikati chiindi Bbeni-hadadi naakali kunywa akukolwa mumatente* kalaamwi abaami bali 32 bakali kumugwasya. 17 Babelesi babasilutwe bazilikiti nibakasaanguna kuzwa, aachiindi nchicheecho, Bbeni-hadadi wakatuma batumwa. Bakamubuzya kuti: “Kwasika baalumi bazwa muSamariya.” 18 Mpawo wakati: “Kuti kabali bazida kubamba luumuno, amubajate kabali bawumi. Kuti kabali bazida nkondo, amubajate kabali bawumi.” 19 Pesi baalumi aaba nibakazwa mumuunzi—babelesi babasilutwe bazilikiti ankamu zyamasooja zyakali kubatobela— 20 umwi awumwi wakajaya sinkondonyina. MaSiriya bakachija, mpawo ma-Israyeli bakabaandilila, pesi Mwaami Bbeni-hadadi waSiriya wakachija katantide aabbiza kalaamwi abamwi basimabbiza. 21 Pesi mwaami wa-Israyeli wakazwa alubo wakaliswini kujaya basimabbiza abasikweenzya ngolo, mpawo wakazunda* maSiriya miingi loko.
22 Nikwakayinda chiindi, mupolofita wakayinka kumwaami wa-Israyeli mpawo wakati kulinguwe: “Yinka, ukalisimye alubo ukabone kuti ulachita biyeni, nkaambo kumasaangunino aamunyaka uuza, mwaami waSiriya uzoosika kuzookulwana.”
23 Babelesi bamwaami waSiriya bakati kulinguwe: “Leza wabo nguLeza wazilundu. Nzizyo zyakapa kuti batuzunde. Pesi kuti twabalwanina muntandabale, tulabazunda. 24 Alubo chita eezi: Gwisya baami boonse mundawu zyabo, ubikke beendelezi mundawu yabo. 25 Ubunganizye* nkamu yamasooja aayelene aankamu yamasooja aakajayigwa, amabbiza aayelene aamabbiza aakaliwo angolo zyeelene aangolo zyakaliwo. Atukabalwanine muntandabale, tulabazunda choonzyo.” Nkinkaako, wakaswiilila lulayo lwabo mpawo wakachita mbuboobo.
26 Kumasaangunino aamunyaka, Bbeni-hadadi wakabunganizya maSiriya mpawo wakayinka ku-Afekki kuti akalwane ma-Israyeli. 27 Ambabo ma-Israyeli bakabunganaamwi bapegwa chakulya azimwi, mpawo bakazwa kuti bakaswaanane aambabo. Ma-Israyeli nibakakkempa kunembo lyabo, bakali kubonekaanga ntutanga tubili twampongo, kakuli maSiriya bakazwide ndawu yoonse. 28 Mpawo muntu waLeza wakasimpe wakayinka kumwaami wa-Israyeli waakumubuzya kuti: “Nzezi nzyaamba Jehova, ‘Akaambo kakuti maSiriya baamba kuti: “Jehova nguLeza wazilundu, teeLeza wantandabale pe,” ndilabikka nkamu mpati yoonse eeyi mukuboko kwako, mpawo inywe mulaziba choonzyo kuti ndime Jehova.’”
29 Bakakkempa, kabalangene kwamazuba aali musanu aabili mpawo mubuzuba bwamusanu aabili nkondo yakasaanguna. Ma-Israyeli bakajaya masooja aamaSiriya bali 100 000 beenda aamawulu mubuzuba bumwi. 30 Bamwi boonse bakasyaala bakachijila mumuunzi wa-Afekki. Pesi muduli wakalimba baalumi bali 27 000. Anguwe Bbeni-hadadi wakachijila mumuunzi, mpawo wakayuba mukaanda kamukati.
31 Nkinkaako, babelesi bakwe bakamubuzya kuti: “Twakamvwa kuti baami bang’anda ya-Israyeli mbaami bali aaluzyalo.* Ikaka leka tuzwaate zigogo zyamasaka muzibuno, tulyaange ntambo mumutwe mpawo twiinke kumwaami wa-Israyeli, amwi ulabona wakusiya kuli muumi.” 32 Nkinkaako, bakazwaata zigogo zyamasaka muzibuno, akulyaanga ntambo mumutwe mpawo bakasika kumwaami wa-Israyeli bamubuzya kuti: “Mubelesi wako Bbeni-hadadi wati, ‘Ikaka utandijayi pe.’” Mpawo Ahabbu wakati: “Uchili muumi? Uulya biya mweenzuma.” 33 Baalumi aaba bakabona kuti majwi ngaakaamba nchitondeezyo chibotu, alubo bakabona kuti wakali kwaambisya, nkinkaako bakati: “Bbeni-hadadi mweenzinyokwe.” Mpawo Ahabbu wakati: “Amwiinke mukamweete.” Mpawo Bbeni-hadadi wakazwa kaya kulinguwe, alubo Ahabbu wakalayilila kuti anjile mungolo.
34 Bbeni-hadadi wakati kulinguwe: “Myuunzi iilya ndeende njaakabweza kuli wuso ndilakuboozya, alubo ulakonzya kulipangila misika muDamasikko, mbuli ndeende mbaakachita muSamariya.”
Ahabbu wakasandula kuti: “Kuti twazuminana kuti tulachita oobo, ndilakuleka kuti wiinke.”
Kuzwa waawo, wakachita chizuminano anguwe mpawo wakamuleka wiinka.
35 Umwi wabana babapolofita* wakasikilwa aajwi lyaJehova mpawo wakabuzya mweenzinyina kuti: “Nduume.” Pesi mweenzinyina wakakaka kumuuma. 36 Nkinkaako, wakamubuzya kuti: “Akaambo kakuti teewaliswiilila pe jwi lyaJehova, mbutazwe biyo aalindime, mulavu ulakujaya.” Mbaakazwa biyo aalinguwe, mulavu wakamuzida wamujaya.
37 Wakajana umwi mwaalumi mpawo wakati: “Nduume.” Nkinkaako, mwaalumi ooyo wakamuuma wamuchisa.
38 Mpawo mupolofita ooyo wakeenda waakulinda mwaami kumbali aamugwagwa, kalivumbide kumeso amulembo kuti atamuzibi pe. 39 Mwaami naakali kwiinda, mupolofita wakoompolola kumwaami kati: “Ndimubelesi wako ndakayinka kunkondo mpuyakali kupya loko, mpawo umwi mwaalumi wakazwa munkondo kayeta muntu kulindime mpawo wakati: ‘Linda muntu ooyu. Kuti achije kupela, buumi bwako mbubo butabbadale buumi bwakwe, naakuti ulabbadala talenta* lyansiliva.’ 40 Ime ndimubelesi wako nindakajisikini aazimwi, muntu uulya wakachija.” Mpawo mwaami wa-Israyeli wakati kulinguwe: “Lubeta lwako lulaba mbuboobo, walibeteka awukke.” 41 Aachiindi nchicheecho, mupolofita wakagwisya mulembo ngwaakali walyaanga kumeso, mpawo mwaami wa-Israyeli wakaziba kuti wakali umwi wabapolofita. 42 Mpawo wakati kulinguwe: “Nzezi nzyaamba Jehova, ‘Akaambo kakuti wamuleka weenda muntu ngundakaamba kuti weelede kujayigwa, buumi bwako bulabbadala buumi bwakwe, alubo buumi bwabantu bako bulabbadala buumi bwabantu bakwe.’” 43 Mpawo mwaami wa-Israyeli wakayinka kumuunzi wakwe kuSamariya kanyemede alubo kawuside.