Mukambawusi

7 Zina bbotu lilikabotu* kwiinda mafuta mabotu alubo buzuba bwakufwa bulikabotu kwiinda buzuba bwakuzyalwa. 2 Zilikabotu kuya kung’anda yamalila kwiinda kuya kung’anda yapobwe, nkaambo aaya ngimamanino aamuntu woonse alubo bawumi beelede kwaabamba mumoyo makani aaya. 3 Kukataazikana kulikabotu kwiinda kuseka, nkaambo busyu buuside bupa kuti moyo ube kabotu. 4 Moyo wamusongo uli mung’anda yakulila, pesi moyo wamufuba-fuba ulimung’anda yakukondwa.*

5 Kulikabotu kuswiilila lulayo lwamusongo kwiinda kuswiilila lwiimbo lwabafuba-fuba. 6 Kuseka kwamufuba-fuba kuli mbuli kubboloka kwamaamvwa aalikuyaka kunsi aampoto. Azeezi lubo tazigwasyi pe. 7 Pesi kudyaamininwa kulakonzya kupa kuti musongo apenge alubo chisinkamulomo chilawupambanisya moyo.

8 Mamanino aakaambo alikabotu kwiinda masaangunino aakaambo, pesi kuba aamoyo mulamfu kulikabotu kwiinda kulisumpula mumoyo. 9 Utanoofwambaani pe kunyema, nkaambo kufwambaana kunyema, kukkala mukaango kamufuba-fuba.*

10 Utanoowambi kuti, “Nkamboonzi mazuba aachiindi naakali mabotu kwiinda aaya?” nkaambo kubuzya oobo nkubula busongo.

11 Luzibo alukono zilikabotu alubo zilabagwasya aabo babona mumuni wazuba.* 12 Nkaambo busongo bulakwabilila mbuli mali mbiikwabilila, pesi bubotu bwakuba aaluzibo mbobu: Busongo bukwabilila munaabo.

13 Amubone milimu yaLeza wakasimpe, nkaambo ngwani uukonzya koolola nzyaakapa kuti zipilingane? 14 Mubuzuba bubotu, yeeyesesya atala abubotu oobo, pesi mubuzuba bwamapenzi, yeeyesesya kuti Leza wakalenga umwi mbuli mbaakalenga umwi, kuchitila kuti bantu batazizibi pe zikonzya kuchitika kulimbabo muchiindi chilikunembo.

15 Mumazuba aabuumi bwangu butagwasyi, ndakabona zintu zyoonse, kuzwa kumuntu uululeme uunyonyooka nikuba kuti kaluleme, kusika kuli sizibi uupona kwachiindi chilamfu nikuba kuti kachita zibi.

16 Utalichiti muntu uululeme zyiindilide, nikuba kulitondeezya zyiindilide kuti ulimusongo. Nkamboonzi nuyanda kulyeetela mapenzi? 17 Utayindilili kubisya, nikuba kuba mufuba-fuba. Nkamboonzi nuyanda kufwa chiindi chako kachitanasika? 18 Kulikabotu kuswiilila nchenjezyo iimwi kutasiide imwi pe, nkaambo ooyo uuyoowa Leza ulaziswiilila zyoonse kazili zibili.

19 Busongo bupa kuti musongo abe aamanguzu kwiinda baalumi bamumuunzi bali 10 bali aamanguzu. 20 Nkaambo taakwe muntu uululeme aanyika, uuchita zintu ziluleme chiindi choonse alubo uutabisyi pe.

21 Mukuyungizya, utaabikki mumoyo majwi woonse bantu ngibaamba, nkaambo ulakonzya kuzoomvwa mubelesi wako kali kwaambuula zintu zitali kabotu atala anduwe,* 22 nkaambo ulizi kabotu mumoyo wako kuti kwaziindi zyiingi anduwe wakaamba zintu zibi atala abamwi.

23 Zyoonse eezi ndakazilanga-langa kandibelesya busongo mpawo ndakati, “Ndilaba musongo.” Pesi ndakakachilwa. 24 Zintu zyabawo tazisikiliki pe alubo zibbide loko, ngwani uukonzya kuzimvwisisisya? 25 Ndakabikka moyo wangu kuti ndizibe, ndilange-lange akuti ndiyanduule busongo achipede kuti zintu zibe mbuli mbuzibede akuti ndibumvwisisisye bubi bwakubula maanu abufuba-fuba bwakupenga. 26 Mpawo ndakabona eezi: Mwanakazi uuli mbuli kansabwe kamuvwimi mubi loko kwiinda lufu, uli aamoyo uuli mbuli kansabwe mpawo maboko aakwe ali mbuli ncheni zyamujele. Ooyo uubotezya Leza wakasimpe uzoomuchija, pesi sizibi uzoojatwa aanguwe.

27 “Amubone, nzezi nzindakajana,” mbaamba sikubunganizya. “Ndakalanga-langa chintu chimwi achimwi kuti ndizibe mbuchibede, 28 pesi nchindakaswini kuyanduula teendakachijana pe. Aakati kabantu bali 1 000, ndakajana mwaalumi uumwi* biyo, pesi taakwe mwanakazi ngundakajana aakati kabo. 29 Nchechi kupela nchindakajana: Leza wakasimpe wakalenga bantu kabaluleme, pesi bakaliyandwiida nzila zyabo zyiingi zitaluleme.”