Milimu yaBaapostoli
5 Nikuba oobo, umwi mwaalumi uutegwa Ananiya amwanakazi wakwe Safira, bakawuzya zimwi zintu nzibakalaazyo. 2 Pesi wakasisa imwi mali alubo mwanakazi wakwe wakalizi mpawo imwi yoonse wakayitola kubaapostoli. 3 Pesi Petro wakati: “Ananiya, nkamboonzi Saatani naapa kuti ube aachibindi chakubejela muuya uusalala, kwiinda mukusisa imwi mali njwaakajana nwaakawuzya muunda? 4 Teewakali wako kale na kutanawuwuzya? Alubo, nwaakawuwuzya, teewakali kunoochita nzuyanda na amali njwaakajana? Nkamboonzi nwaayeeya kuchita chintu chili boobu mumoyo wako? Teewabejela bantu pe, pesi wabejela Leza.” 5 Ananiya naakamvwa majwi aaya, wakawidaansi mpawo wafwa. Alubo bantu boonse bakamvwa zintu eezi bakayoowa loko. 6 Mpawo balombe bakanyampuka, bamulambila malembo, bamugwisizya aanze, baakumuzikka.
7 Kakuli kwayinda ma-awa aakasisike kuli aatatu, mwanakazi wakwe wakanjila katazi pe kuti niinzi zyakali zyachitika. 8 Mpawo Petro wakati kulinguwe: “Ndibuzye, eeyi njimali njimwajana na nimwakawuzya muunda?” Mpawo wakati: “Iiyi, njiyo.” 9 Mpawo Petro wakati: “Nkamboonzi inywe kamuli babili, nimwakazuminana kusunka muuya waJehova?* Bona! Mawulu aabantu bazikka mulumaako alaamulyaango, anduwe balakugwisizya aanze.” 10 Aachiindi nchicheecho, wakawidaansi kunembo aaPetro, wafwa. Balombe aabo nibakanjila, bakamujana kafwide alubo bakamugwisizya aanze, baakumuzikka kumbali aamulumaakwe. 11 Mbungano yoonse yakayoowa loko kuswaanizya abantu boonse bakamvwa zintu eezi.
12 Mukuyungizya, baapostoli bakayinkilila kunembo kuchita zitondeezyo azigambyo zyiingi aakati kabantu alubo boonse bakali kubunganaamwi muKazila kaSolomoni kavumbidwe. 13 Kwaamba choonzyo, taakwe naaba uumwi wakaba aachibindi chakuliswaanizya aambabo, pesi bantu bakali kwaambuula zintu zibotu atala ambabo. 14 Alubo, baalumi abanakazi biingi bakali kusyoma muMwaami, bakali kuyungizya. 15 Alubo bakatola bantu bakali kuchiswa mumigwagwa mipati mpawo bakabalazika aatulo kuchitila kuti Petro aayinda biyo, munzinzimwa wakwe wiinde aali bamwi babo. 16 Nkamu yabantu bakali kuzwa mumyuunzi yakali aafwiifwi aaJerusalema yakaliswini kusika kayinyampwide bantu bakali kuchiswa abakali kukataazigwa aamadimoni mpawo boonse bakasilikwa.
17 Pesi mupayizi mupati wakanyampuka abamwi boonse mbaakalaabo bamukabunga kabaSadusi, nkaambo bakaba aabbivwe. 18 Bakajata* baapostoli mpawo bakababikka mujele lyabantu boonse. 19 Pesi mansiku, ngilozi yaJehova* yakajula milyango yajele, yabagwisya aanze mpawo yakati: 20 “Amwiinke kutempele alubo mwiinkilile kunembo kubuzya bantu zintu zyoonse zili atala abuumi oobu.” 21 Baapostoli nibakamvwa oobo, bakanjila mutempele nibwakacha mpawo bakasaanguna kuyiisya.
Mupayizi mupati abaabo mbaakalaabo nibakasika, bakabungania bantu boonse bamuNkuta Mpati yamaJuda abaalu boonse babana ba-Israyeli mpawo bakatuma bantu kujele kuti bakeete baapostoli. 22 Pesi balindi batempele nibakasika kujele, teebakabajana pe mpawo bakabweeda kuyoobabuzya nzibakajana. 23 Bakati: “Twajana kujele kakujalidwe, kakukkiidwe alubo balindi baliimvwi aamilyango, pesi nitwajula taakwe ngutwajana pe mukati.” 24 Mupati wabalindi batempele abapati babapayizi nibakamvwa majwi aaya, bakakataazikana loko, kabali kuyeeya kuti niinzi chitachitike akaambo kazintu eezi. 25 Pesi umwi muntu wakasika mpawo wakati kulimbabo: “Amubone, baalumi aabaya mbimwakabikka mujele baliimvwi mutempele kabali kuyiisya bantu.” 26 Mpawo mupati wabalindi wakayinkaamwi abalindi mpawo bakaakubeeta pesi kakutakwe musindo pe nkaambo bakali kuyoowa kuti bantu balabatulula mabwe.
27 Nkinkaako, bakabeeta babayimikizya kunembo aaNkuta Mpati yamaJuda. Mpawo mupayizi mupati wakababuzya 28 kuti: “Twakamulayilila akumulayilila kuti mutachinooyiisyi atala azina eeli pe, pesi amubone, mwazuzya njiisyo yanu muJerusalema alubo muyanda kuti mulandu waganzi lyamuntu ooyu uze aalindiswe.” 29 Mpawo Petro abamwi baapostoli bakasandula kuti: “Tweelede kuswiilila Leza mbuli mweendelezi kutali bantu. 30 Leza wamasianene, wakabusya Jesu ngumwakajaya kwiinda mukumwaanzika aachisamu. 31 Leza wakamusumpula akumubikka kukuboko kwakwe kwachilisyo kuti abe Muzulwidi Mupati aMufutuli, kuchitila kuti ma-Israyeli basanduke akuti balekelelwe zibi. 32 Iswe tuli bakamboni bamakani aaya, kuswaanizya amuuya uusalala, ooyo Leza ngwaakapa aabo bamuswiilila mbukunga mweendelezi.”
33 Nibakamvwa zintu eezi, bakanyema loko* alubo bakayanda kubajaya. 34 Pesi umwi muFarisi uutegwa Gamaliyeli wakanyampuka muNkuta Mpati yamaJuda. Mwaalumi ooyu wakali muyiisi waMulawu uulemekwa loko abantu boonse mpawo wakalayilila kuti baalumi aaba bajane buzwa aanze kwachiindi chifwiifwi. 35 Mpawo wakati kulimbabo: “Nibaalumi bamu-Israyeli, amuchenjelele nzimuyanda kuchita kubaalumi aaba. 36 Muchikozyano, mumazuba aakayinda, kwakabuka Tewuda, ooyo wakali kulibona kuti ulayandikana kwiinda bamwi alubo baalumi bakasisike ku 400 bakaliswaanizya aakabunga kakwe. Pesi wakajayigwa, alubo boonse bakali kumutobela bakamwayika mpawo bakaloba. 37 Mpawo kwakazoobuka Judasi wakuGalili mumazuba aakulilembya alubo wakakwelelezya bantu kuti bamutobele. Mwaalumi ooyu anguwe wakaloba mpawo boonse bakali kumutobela bakamwayikizyania. 38 Nkinkaako, kuzintu eezi nzitulangenaazyo, ndimubuzya kuti, mutabachiti chintu pe baalumi aaba, amubasiye biyo. Nkaambo kuti makanze aaya naakuti mulimu ooyu kawuli wabantu, tukoozwidilila pe, 39 pesi kuti kawuzwa kuli Leza, tamukoobakonzya pe. Kuti teemwachenjela, muzoolibona kamuli kulwana aaLeza.” 40 Bakaaswiilila majwi aakwe, mpawo bakayita baapostoli, babawuma loko, akubabuzya kuti baleke kwaambuula atala azina lyaJesu. Mpawo bakabaleka beenda.
41 Nkinkaako, bakazwa muNkuta Mpati yamaJuda kabali kubotelwa nkaambo bakali babonwa kuti baleelela kutalemekwa akaambo kazina lyakwe. 42 Mazuba woonse bakayinkilila kunembo kabataleki pe kuyiisya akwaambilizya makani mabotu aali atala aKkristu Jesu mutempele akung’anda ang’anda.