Baami Wakusaanguna
19 Ahabbu wakabuzya Jezebbeli zintu zyoonse Elija nzyaakali wachita ambaakajaya bapolofita boonse apanga. 2 Mpawo Jezebbeli wakatuma mutumwa kuli Elija kuti akamubuzye kuti: “Baleza abandipe chisubulo chipati kuti juunza aachiindi eechino teendakuchita mbuli umwi awumwi wabo!” 3 Elija naakamvwa oobo, wakayoowa mpawo wakanyampuka wachija kuti atajayigwi. Wakasika kuBberi-shebba kuJuda, mpawo wakasiya mubelesi wakwe nkukooko. 4 Wakeenda musinzo weendwa buzuba bumwi kaya munkanda, wakasika wakkala munsi aakasamu, mpawo wakakumbila kuti afwe. Wakati: “Kwakkwana lino! O Jehova, ndijaye, nkaambo tandili mubotu pe kwiinda masianene.”
5 Mpawo wakalandabala woona munsi aakasamu. Pesi kalyiibide, ngilozi yakasika yamuguma, yamubuzya kuti: “Buka ulye.” 6 Naakalanga, wakabona chinkwa chalawundi kumutwe wakwe chakali aajulu aamabwe aapya akankuli kamaanzi. Wakalya akunywa, mpawo wakoona lubo. 7 Nikwakayinda chiindi, ngilozi yaJehova yakasika lubo kachibili yamuguma, mpawo yakamubuzya kuti: “Buka ulye, nkaambo lweendo lulakulampila loko.” 8 Nkinkaako, wakabuka walya akunywa wajana manguzu, mpawo wakeenda mazuba aali 40 amansiku aali 40 kusikila waakusika kuHorebbu, chilundu chaLeza wakasimpe.
9 Naakasika nkukooko, wakanjila mumpako yabbwe woona mumoomo mansiku. Ijwi lyaJehova lyakamusikila lyamubuzya kuti: “Ulikuchitaanzi ookuno Elija?” 10 Mpawo wakati: “Ndali kumusungwaalila amoyo woonse Jehova Leza wamakamu, nkaambo ma-Israyeli basiya chizuminano chako, badilisya zipayililo zyako alubo bajaya bapolofita bako apanga, ndime andikke ndasyaala. Lino bali kuyanda kundijaya.” 11 Pesi Leza wakati: “Zwa aanze ukayimikile aachilundu kunembo lyaJehova.” Jehova wakali kwiinda, mpawo kwakaba guwo pati lilaanguzu lyakali kwaanzaanisya zilundu akupanduula mabwe mapati kunembo lyaJehova, pesi Jehova taakali muguwo pe. Nilyakayinda guwo, kwakaba muzuzumo wanyika, pesi Jehova taakali mumuzuzumo wanyika pe. 12 Nwaakamana muzuzumo wanyika, kwakaba mulilo, pesi Jehova taakali mumulilo pe. Nwaakayinda mulilo, kwakamvwika jwi libateme lyaansaansi. 13 Elija mbaakalimvwa biyo jwi eelyo, wakalivumba kumeso achigogo chakwe chabupolofita mpawo wakazwa waakwiimikila aamulyango wampako yabbwe. Mpawo jwi eelyo lyakamubuzya kuti: “Ulikuchitaanzi ookuno Elija?” 14 Mpawo wakati: “Ndali kumusungwaalila amoyo woonse Jehova Leza wamakamu, nkaambo ma-Israyeli basiya chizuminano chako, badilisya zipayililo zyako alubo bajaya bapolofita bako apanga, ndime andikke ndasyaala. Lino bali kuyanda kundijaya.”
15 Jehova wakati kulinguwe: “Bweeda, wiinke kunkanda yaDamasikko. Nwaasika nkukooko, unanike Hazayeli kuti abe mwaami waSiriya. 16 Alubo unanike Jehu muzukulu waNimushi kuti abe mwaami wa-Israyeli, mpawo unanike Elisha* mwana waShafati waku-Abbeli-mehola kuti abe mupolofita mundawu yako. 17 Kufumbwa muntu wachija panga lyaHazayeli, Jehu uzoomujaya. Kufumbwa muntu wachija panga lyaJehu, Elisha uzoomujaya. 18 Alubo ndichili aabantu bali 7 000 mu-Israyeli, boonse aaba tabanamufugamina pe Bbaala amazwi aabo, alubo tabanamumyonta pe amilomo yabo.”
19 Nkinkaako, wakazwa ooko mpawo wakajana Elisha mwana waShafati kali kulima aazipani zyabapule bangombe zili 12 zyakali kunembo lyakwe, mpawo we wakali aachipani chachi 12. Nkinkaako, Elija wakayinka kulinguwe mpawo wakawaala chigogo chakwe chabupolofita aalinguwe. 20 Kuzwa waawo, wakasiya bapule bang’ombe aabo wachijaanina Elija waakumubuzya kuti: “Ikaka, ndileke ndikalaye* ndeende abaama. Mpawo ndilakutobela.” Elija wakamusandula kuti: “Yinka, teendakukasya pe.” 21 Nkinkaako, wakabweeda waakubweza chipani chimwi chabapule bang’ombe wabapayizya, alubo wakabelesya zibelesyo zyakulimya kuti ajike nyama yang’ombe eezyo, mpawo wakayipa bantu balya. Kuzwa waawo, wakanyampuka watobela Elija mpawo wakasaanguna kumubelekela.