Ezra
9 Mbuzyakamana biyo kuchitwa zintu eezi, basilutwe bakasika kulindime bandibuzya kuti: “Ma-Israyeli, bapayizi, amaLevi teebalipambula pe kubantu bamunyika akumichito yabo iisesemya yamaKkenani, yamaHeti, yamaPerezi, yamaJebbusi, yama-Amoni, yamaMowabbu, yama-Ijipita, ayama-Amori. 2 Baalumi aaba abana babo balombe bakakwata bamwi bana basimbi bazisi eezi. Lino musyobo ooyu uusalala wavwelengana aabantu bamunyika eezi. Basilutwe abeendelezi mbabo bali kunembo biya mukuchita muchito ooyu wakutasyomeka.”
3 Mbundakaamvwa biyo makani aaya, ndakadelula chigogo changu ajansi lyangu litakwe maboko alubo ndakanonkola amwi masusu aamumutwe wangu amalezu mpawo ndakakkala aansi kandigambide. 4 Mpawo bantu boonse ibakali kuyoowa* majwi aaLeza wa-Israyeli, bakabungana munsi aangu akaambo kakutasyomeka kwabantu bakazwa mubuzike, chiindi nindakakkede kandigambide kusikila kuchiindi nikupegwa chipo chazilyo chagoko.
5 Kuchiindi chakupa chipo chazilyo chagoko, ndakanyampuka mpundakakkede kanduuside, chigogo changu ajansi lyangu litakwe maboko kazidelukide. Ndakafugama ndatambika maboko kuli Jehova Leza wangu. 6 Ndakati: “O Leza wangu, ndaba aabweeme kuti ndilange kulinduwe, O Leza wangu, nkaambo kubisya kwesu kwavula loko amilandu yesu yayilikana kusika kujulu. 7 Kuzwa mumazuba aamasianene kusika sunu, mulandu wesu waba mupati loko; alubo akaambo kakubisya kwesu, iswe, baami besu, abapayizi besu twakabikkwa mukuboko kwabaami bazisi, twakajayigwa, twakatolwa mubuzike, twakabwezegwa, twakafwisigwa bweeme mbuli mbukuchibede asunu. 8 Pesi kwachiindi eechino chifwiifwi, Jehova Leza wesu watufwida luzyalo kwiinda mukupa kuti basyeede bafutuke, mukutupa lukwabililo mundawu yakwe iisalala, mukupa kuti meso eesu amweke, O Leza wesu, alubo amukutubusilizya aaniini kuzwa mubuzike bwesu. 9 Nkaambo nikuba kuti tuli bazike, Leza wesu taatusiya pe mubuzike bwesu, pesi watutondeezya luyando lutamani kunembo lyabaami baPesiya kuti atubusilizye kuchitila kuti tuyake ng’anda yaLeza wesu, tuyakulule matongo aayo akuti atupe muduli wamabwe* muJuda amuJerusalema.
10 “Pesi lino, twaambeenzi biya musule aakuchitika kwazintu eezi, O Leza wesu? Nkaambo twasiya milawu yako 11 njwaakatupa kwiinda mubabelesi bako bapolofita nwaakati: ‘Nyika njimuyaakubweza ninyika iitasalali pe akaambo kakutasalala kwabantu bamunyika eezyo akaambo kamichito yabo iisesemya akutasalala kwabo nkubayizuzya kuzwa kumagolelo amwi kusikila kumagolelo aambi. 12 Nkinkaako, mutakwatyi bana banu basimbi kubana babo balombe nikuba kuzumizya bana banu balombe kuti bakwate bana babo basimbi. Tamweelede kubagwasya kuti babe aaluumuno akuti bazwidilile kuchitila kuti mube aamanguzu akuti mulye zintu zibotu zyamunyika eeyo akuti mubweze nyika eeyi ibe yabana banu kukabe kutamani.’ 13 Musule aazintu zyoonse eezi zyakatuchitikila akaambo kamilimu yesu mibi amulandu wesu mupati—nkaambo iwe O Leza wesu, teewakatuchitila kweendelana akubisya kwesu pe alubo wakazumizya kuti bamwi besu bali aano bafutuke— 14 ani mpo twiityole lubo na milawu yako akukwatilana* aabantu bachita michito eeyi iisesemya? Tukootunyemena loko na utunyonyoone chakumaninina zyakuti kubulike naba uumwi uusyaala naakuti uufutuka? 15 O Jehova Leza wa-Israyeli, uliluleme, nkaambo twasyaala katuli bantu bafutuka kusika mubuzuba oobuno. Lino tuli kunembo lyako amulandu wesu nikuba kuti tazichiti pe kwiimikila kunembo lyako akaambo kamulandu ooyu.”