Ezra
8 Mbaba basilutwe bamaanda aamawisi amazyalani aabo, aabo bakazwaamwi andime kuBbabbiloni mubweendelezi bwaMwaami Aritasasita: 2 kuzwa kubana baFiniyasi, Geshomu; kuzwa kubana ba-Itamara, Daniyele; kuzwa kubana baDavida, Hatushi; 3 kuzwa kubana baShekkaniya, kuzwa kubana baParoshi, Zakkariya, abaalumi bali 150 bakalembedwe mbaakali aabo; 4 kuzwa kubana baPahati-mowabbu, Eliyeho-enayi mwana waZerahiya, abaalumi bali 200 mbaakali aabo; 5 kuzwa kubana baZatu, Shekkaniya mwana waJahaziyeli, abaalumi bali 300 mbaakali aabo; 6 kuzwa kubana ba-Adini, Ebbedi mwana waJonatani, abaalumi bali 50 mbaakali aabo; 7 kuzwa kubana ba-Elamu, Jeshaya mwana wa-Ataliya, abaalumi bali 70 mbaakali aabo; 8 kuzwa kubana baShefatiya, Zebbadiya mwana waMikkayeli, abaalumi bali 80 mbaakali aabo; 9 kuzwa kubana baJowabbu, Obbadiya mwana waJehiyeli, abaalumi bali 218 mbaakali aabo; 10 kuzwa kubana baBbani, Shelomiti mwana waJosifiya, abaalumi bali 160 mbaakali aabo; 11 kuzwa kubana baBbebbayi, Zakkariya mwana waBbebbayi, abaalumi bali 28 mbaakali aabo; 12 kuzwa kubana ba-Azigadi, Johanani mwana waHakkatani, abaalumi bali 110 mbaakali aabo; 13 kuzwa kubana ba-Adonikkamu, aabo bakali bamamanino, ngaya mazina aabo: Elifeleti, Jeyiyeli, aShemaya, abaalumi bali 60 mbibakali aabo; 14 kuzwa kubana baBbigivayi, Utayi aZabbudu, abaalumi bali 70 mbibakali aabo.
15 Ndakababunganizya kumulonga uuya ku-Ahava mpawo twakakkempa kwamazuba aatatu. Pesi nindakalanga-langa bantu abapayizi, taakwe muLevi ngundakajana pe. 16 Nkinkaako, ndakatuma bantu kuti bakayite Eliyeza, Ariyeli, Shemaya, Elinatani, Jaribbi, Elinatani, Natani, Zakkariya, aMeshulamu, aabo bakali kuzulwida, alubo aJoyiyaribbu a-Elinatani aabo bakali bayiisi. 17 Mpawo ndakabalayilila kuti bayinke kuli Ido muzulwidi wandawu yakali kutegwa Kkasifiya. Ndakababuzya kuti bakabuzye Ido ababelesinyina, babelesi baatempele* aabo bakali muKkasifiya, kuti batweetele babelesi bamung’anda yaLeza wesu. 18 Mbukunga kuboko kwaLeza wesu kwakali aalindiswe, bakatweetela mwaalumi uuchenjede kuzwa kubana baMali muzukulu waLevi mwana wa-Israyeli, nkukwaamba Sherebbiya abana bakwe ababbululu bakwe, baalumi bali 18; 19 aHashabbiya, ooyo wakalaamwi aJeshaya uuzwa kumaMerari ababbululu bakwe abana babo, baalumi bali 20. 20 Alubo kwakali babelesi baatempele* bali 220 aabo Davida abasilutwe mbibakapa mulimu wakugwasya maLevi. Boonse aaba bakasalwa kweendelana amazina aabo.
21 Mpawo ndakaambilizya kuti tulyiimye kulya nkukooko kumulonga wa-Ahava kuchitila kuti tulibombye kunembo lyaLeza wesu, akuti tukumbile kuzulwidwa aanguwe mulweendo lwesu abana besu azintu zyesu zyoonse. 22 Ndakaba aabweeme kuti ndikumbile masooja abasimabbiza kumwaami kuti batukwabilile kuli basinkondoma munzila, nkaambo twakali twabuzya mwaami kuti: “Kuboko kubotu kwaLeza wesu, kuli aali baabo boonse bamuyanduula, pesi manguzu aakwe abukali bwakwe zibukila aabo boonse bamusiya.” 23 Nkinkaako, twakalyiimya kulya akukumbila Leza wesu atala amakani aaya, mpawo wakakuswiilila kukumbila kwesu.
24 Aakati kabapati babapayizi ndakasala baalumi bali 12, nkukwaamba Sherebbiya aHashabbiya, aamwi ababbululu babo bali kkumi. 25 Mpawo ndakabapimina nsiliva angolida azibelesyo eezyo mwaami abasikumupa lulayo abasilutwe ama-Israyeli boonse bakali nkukooko nzibakapa kung’anda yaLeza wesu. 26 Nindakamaninsya kupima, ndakabapa matalenta* aansiliva aali 650, zibelesyo zyansiliva zili 100 zilema matalenta aali 2, matalenta aangolida aali 100, 27 tulido twangolida tuli 20 twakali kuulwa aamadarikki* aali 1 000, azibelesyo zili 2 zyakkopa mbotu iing’ayima kayisalala-salala ziyandikana mbuli ngolida.
28 Mpawo ndakababuzya kuti: “Inywe mulasalala kuli Jehova, anzizyo zibelesyo zilasalala, nsiliva angolida nzipo zyakuliyandila kuli Jehova Leza wamasianyookulu. 29 Amuzibambe kabotu kusikila mukazipime kunembo lyabapati babapayizi amaLevi abasilutwe bamaanda aamawisi aa-Israyeli muJerusalema, mumaanda* aali mung’anda yaJehova.” 30 Mpawo bapayizi amaLevi bakabweza nsiliva angolida azibelesyo nzibakapiminwa, kuchitila kuti bazyeete kuJerusalema kung’anda yaLeza wesu.
31 Mpawo mubuzuba bwachi 12 mumweezi wakusaanguna, twakanyampuka kumulonga wa-Ahava katuya kuJerusalema, kuboko kwaLeza wesu kwakali aalindiswe, alubo wakatuvuna kukuboko kwabasinkondoma akubantu bakali kukonzya kutuyubilila munzila. 32 Nkinkaako, twakasika kuJerusalema akukkala mazuba aatatu. 33 Mpawo mubuzuba bwachine, twakapima nsiliva angolida azibelesyo mung’anda yaLeza wesu alubo twakazipa Meremoti mwana wa-Urija mupayizi, ooyo wakali aa-Eliyezari mwana waFiniyasi bakalaamwi aJozabbadi mwana waJeshuwa aNowadiya mwana waBbinuyi, maLevi. 34 Zintu zyoonse zyakabalwa akupimwa, bulemu bwazyo zyoonse bwakalembwa. 35 Aabo bakaboola kabazwa mubuzike kuzwa kuliimwi nyika, bakapa bapule bang’ombe bali 12 kabachitila ma-Israyeli boonse, bagutu bali 96, tugutu tuli 77 kuti zibe zipayizyo zitentwa kuli Leza wa-Israyeli, abapule bampongo bali 12 kuti babe chipayizyo chachibi; banyama boonse aaba bakali chipo chitentwa kuli Jehova.
36 Mpawo bayiminini* bamwaami abeendelezi bamuchilawu chili Mutala aaMulonga,* twakabapa milawu iilembedwe yamwaami mpawo bakagwasilizya bantu akupa zintu zyakali kuyandikana kung’anda yaLeza wakasimpe.