Lwabili Luya Kuli Timoti
1 Ndime Pawulu, mwaapostoli waKkristu Jesu kwiinda mukuyanda kwaLeza, kweendelana achisyomezyo chabuumi bujanwa kwiinda muli Kkristu Jesu, 2 ndilikukulembela Timoti mwanaangu uuyandwa:
Luzyalo lupati, lweetelelo aluumuno kuzwa kuli Leza Taata aKkristu Jesu Mwaami wesu, azibe aalinduwe.
3 Ndilamulumba Leza ooyo ngundibelekela mulimu uusalala mbuli mbubakachita masianene, kandili aamoyo* uusalala uutandipi mulandu, tandileki pe kukuyeeya munkombyo zyangu zyakukombelezya sikati amansiku. 4 Nindiyeeya misozi yako, nga ndaba aachiyandisyo chakuti ndizookubone, kuchitila kuti ndizule kukondwa. 5 Nkaambo ndilaluyeeya lusyomo lwako lutali lwakuupa-wupa, oolo lwakasaanguna kuba muli banyookulu Loyisi, amuli banyoko Yunisi, pesi ndundili aachoonzyo chakuti mululi amulinduwe.
6 Akaambo kakaambo aaka, ndilikukuyeezya kuti, uchisosele mbuli mulilo chipo chaLeza chili mulinduwe, nchwaakajana aawo nindakakubikka maboko. 7 Nkaambo Leza taakatupa muuya wakuyoowa pe, pesi wakatupa muuya wamanguzu awaluyando awakuba aamizeezo iilikabotu. 8 Nkinkaako, utabi aabweeme pe bwakupa bukamboni atala aMwaami wesu naakuti atala andime ndimusungwa akaambo kakwe, pesi libambile kuswaana mapenzi akaambo kamakani mabotu, kwiinda mukusyoma manguzu aaLeza. 9 Wakatuvuna alubo wakatwiita akwiitwa kusalala, kutali aakaambo kamilimu yesu pesi akaambo kamakanze aakwe aluzyalo lupati. Luzyalo oolu twakalupegwa chiindi loko kwiinda muli Kkristu Jesu, 10 pesi lino lwabikkwa aantanganana kwiinda mukuyubununwa kwaMufutuli wesu Kkristu Jesu, ooyo wamwaya lufu alubo wayubununa buumi akutabola kwiinda mumakani mabotu, 11 aayo ngindakasalilwa kuti ndibe mukambawusi wawo amwaapostoli amuyiisi.
12 Andime nchindilikuswaana mapenzi aaya akaambo kazintu eezi, pesi tandikwe bweeme pe. Nkaambo ndilimuzi Ooyo ngundakasyoma alubo ndili aachoonzyo chakuti ulakonzya kuzibamba zintu nzindakabikka mumaboko aakwe kusikila mubuzuba oobo. 13 Yinkilila kunembo kukakatide kuchikozyanisyo chamajwi mabotu* ngwaakamvwa kulindime kwiinda mulusyomo aluyando, eezyo zibawo akaambo kakujatana aaKkristu Jesu. 14 Chibambe kabotu chintu eechi chiyandikana nchwaakapegwa kwiinda mumuuya uusalala, ooyo uukkede mulindiswe.
15 Ulizizi kuti bantu boonse bamuchilikiti cha-Asiya bakandichija, kuswaanizya aFugela aHemojini. 16 Mwaami abafwide luzyalo bamung’anda ya-Onesiforo, nkaambo chiindi chiingi wakali kundisungwaazya alubo taakaba aabweeme pe ancheni zyangu zyamujele. 17 Pesi naakali kuRoma wakandiyanduula kusikila wandijana. 18 Mwaami ape kuti akajane luzyalo luzwa kuli Jehova* mubuzuba oobo. Alubo uliizi kabotu milimu yoonse njaakachita ku-Efeso.