Ezra
6 Aachiindi eecho, Mwaami Dariyasi wakapa malayilile mpawo bakayanduulisisya mumalembe aachiindi* aakali kujanika mwakali kubambilwa zintu ziyandikana muBbabbiloni. 2 Kwakajanika bbuku lyakupeta mumuunzi uukwabililidwe ku-Ekkibbatana muchilikiti* chakuMediya, mubbuku eeli mwakalembedwe makani aakuti:
3 “Mumunyaka wakusaanguna wabweendelezi bwaMwaami Kkoreshi, Mwaami Kkoreshi wakapa malayilile aali atala ang’anda yaLeza iili muJerusalema aakuti: ‘Ayiyakululwe ng’anda kuti ibe ndawu mpubanoopeda zipayizyo zyabo, ntalisyo zyayo zyeelede kuyakwa, yeelede kulampa makkiyubbiti aali 60* kuyamujulu, busasa bulampa makkiyubbiti aali 60, 4 amizila iitatu yamabwe mapati aayilikene aakakunkulisigwa kaatolwa aandawu yawo amuzila uumwi wamasamu, mali yoonse iitabelesegwe yeelede kuzwa mung’anda yamwaami. 5 Alubo azibweedezegwe zibelesyo zyangolida azyansiliva zyamung’anda yaLeza, eezyo Nebbukkadineza nzyaakagwisya mutempele muJerusalema mpawo wazitola kuBbabbiloni, kuchitila kuti zikabikkwe mundawu yazyo mung’anda yaLeza muJerusalema.’
6 “Nkinkaako, iwe Tatenayi numweendelezi wachilawu chili Mutala aaMulonga,* Sheta-bbozenayi, abeenzinyokwe, beendelezi baniini bamuchilawu chili Mutala aaMulonga—amusosoloke kundawu eeyo. 7 Mutapambanisyi mulimu uulikuchitwa aang’anda yaLeza. Mweendelezi wamaJuda abaalu bamaJuda mbabo batayakulule ng’anda yaLeza, aandawu mpuyakabede. 8 Mukuyungizya, ndilikubikka mulawu wanzimweelede kuchitila baalu baJuda bali kuyakulula ng’anda yaLeza. Mweelede kufwambaana kubapa mali yakubelesya kuzwa muzibikkilo zyamubwaami, mali yamutelo yakabunganizigwa muchilawu chili Mutala aaMulonga, kuchitila kuti baalumi aaba bayinkilile kunembo kuchita mulimu ooyu kabatachelezegwi pe. 9 Kufumbwa ziyandikana—bapule bang’ombe bachili baniini, bagutu, bana bambelele bazipo zitentwa kuli Leza wakujulu, wiiti, munyo, wayini, amafuta mbuli mbubaamba bapayizi bali muJerusalema—beelede kukkala kabazipegwa buzuba abuzuba. 10 Kuchitila kuti bakkale kabapa zipo zibotezya Leza wakujulu akuti kabakombela buumi bwamwaami abwabana bakwe. 11 Alubo ndabikka mulawu wakuti kufumbwa muntu uutyola mulawu ooyu, chisamu chiyoosomonwa aang’anda yakwe aanzikwe akugankaminwa aali nchicho mpawo ng’anda yakwe iyoochinchwa ibe chimbuzi chabantu boonse* akaambo kamulandu ooyo. 12 Leza ooyo wakapa kuti zina lyakwe likkale nkukooko, ajaye kufumbwa mwaami naba muntu uunyampula kuboko kwakwe kuti atyole mulawu ooyu akuti anyonyoone ng’anda yaLeza iili muJerusalema. Ime ndiDariyasi ndabikka mulawu ooyu. Azichitwe chakufwambaana.”
13 Mpawo chakufwambaana, Tatenayi mweendelezi wachilawu chili Mutala aaMulonga, Sheta-bbozenayi, abeenzinyina bakachita zyoonse nzibakalayililwa aaMwaami Dariyasi. 14 Baalu bamaJuda bakayinkilila kunembo kuyaka, amulimu wakayinkilila kunembo kabasungwaazigwa aabupolofita bwaHagayi abwaZakkariya muzukulu wa-Ido; bakamaninsya kuyaka tempele kweendelana amalayilile aaLeza wa-Israyeli amalayilile aaKkoreshi aDariyasi aMwaami Aritasasita waPesiya. 15 Bakamaninsya kuyaka ng’anda eeyo mubuzuba bwachitatu mumweezi wa-Ada,* mumunyaka wamusanu awumwi wabweendelezi bwaMwaami Dariyasi.
16 Mpawo ma-Israyeli, bapayizi maLevi abantu boonse bakazwa mubuzike bakapeda ng’anda eeyi yaLeza kabakondwa. 17 Nibakali kupobweda ng’anda yaLeza eeyi, bakeeta bapule bang’ombe bali 100, bagutu bali 200, bana bambelele bali 400, abapule bampongo bali 12 kuti babe chipayizyo chachibi chama-Israyeli boonse, kweendelana amweelwe wamisyobo yama-Israyeli. 18 Bakasala bapayizi mutubunga twabo amaLevi munkamu zyabo kuti babelekele Leza muJerusalema kweendelana azilembedwe mubbuku lyaMozesi.
19 Alubo bantu bakazwa mubuzike bakachita Pasika mubuzuba bwachi 14 mumweezi wakusaanguna. 20 Bapayizi amaLevi bakali balisalazya, nkinkaako, boonse bakali basalala; bakajaya chipayizyo chaPasika kabachitila bantu boonse bakazwa mubuzike, bapayizinyina akulichitila lwabo. 21 Mpawo ma-Israyeli bakazwa mubuzike bakachilyaamwi abantu boonse bakaliswaanizya aambabo alubo ibakalipambula kukutasalala kwazisi zyamunyika eeyo kuti bakombe* Jehova Leza wa-Israyeli. 22 Alubo bakachita Pobwe lyaChinkwa Chitakwe Bumena kwamazuba aali musanu aabili kababotelwa, nkaambo Jehova wakapa kuti babotelwe alubo wakapa kuti mwaami wa-Asiriya abe kubbazu lyabo. Nkinkaako, wakabagwasya* mumulimu wakuyaka ng’anda yaLeza wakasimpe, Leza wa-Israyeli.