Ezra
7 Nizyakayinda zintu eezi, mubweendelezi bwaMwaami Aritasasita waPesiya, Ezra* wakabweeda. Wakali mwana waSeraya, mwana wa-Azariya, mwana waHilikkiya, 2 mwana waShalumu, mwana waZadokki, mwana wa-Ahitubbi, 3 mwana wa-Amariya, mwana wa-Azariya, mwana waMerayoti, 4 mwana waZerahiya, mwana wa-Uzi, mwana waBbukki, 5 mwana wa-Abbishuwa, mwana waFiniyasi, mwana wa-Eliyezari, mwana wa-Aroni mupati wabapayizi. 6 Ooyu ngu-Ezra wakasika kazwa kuBbabbiloni. Wakali mulembi* uuzi kabotu* Mulawu waMozesi, ooyo Jehova Leza wama-Israyeli ngwaakabapa. Mwaami wakamupa zintu zyoonse nzyaakakumbila, nkaambo kuboko kwaJehova Leza wakwe kwakali aalinguwe.
7 Bamwi ma-Israyeli, bapayizi, maLevi, bayimbi, balindi bamageedi, ababelesi baatempele* bakayinka kuJerusalema mumunyaka wamusanu ayibili wabweendelezi bwaMwaami Aritasasita. 8 Mpawo Ezra wakasika kuJerusalema mumweezi wamusanu mumunyaka wamusanu ayibili wabweendelezi bwamwaami. 9 Ezra wakasaanguna lweendo lwakuzwa kuBbabbiloni mubuzuba bwakusaanguna mumweezi wakusaanguna mpawo wakasika muJerusalema mubuzuba bwakusaanguna mumweezi wamusanu, nkaambo kuboko kubotu kwaLeza wakwe kwakali aalinguwe. 10 Ezra wakali wabamba moyo* wakwe kuti ayanduulisisye Mulawu waJehova akuuchita, ayiisye atala amalayilile aawo ambeta mu-Israyeli.
11 Oolu nduulugwalo Mwaami Aritasasita ndwaakapa Ezra mupayizi kumwi kali mulembi,* syaazibwene mukwiiya* milawu yaJehova amalayilile ngaakapa ma-Israyeli:
12 *“Aritasasita, mwaami wabaami, kuli Ezra mupayizi kumwi kali mulembi* wamulawu waLeza wakujulu: Baaluumuno lwiingi. Lino 13 ndalayilila kuti muntu woonse uuli mubwaami bwangu aakati kama-Israyeli abapayizi babo amaLevi uuyanda kwiinkaamwi andinywe kuJerusalema, ayinke. 14 Nkaambo watumwa aamwaami abasikumupa lulayo bali musanu ababili kuti uyanduulisisye kuti mulawu waLeza wako, ooyo ngulaawo,* ulikutobelwa na muJuda amuJerusalema, 15 alubo ubweze nsiliva angolida eezyo mwaami abasikumupa lulayo nzibapa chakuliyandila kuli Leza wa-Israyeli uukkala muJerusalema, 16 kuswaanizya ansiliva yoonse angolida njutambula* muchilikiti* choonse chaBbabbiloni, aamwi azipo bantu abapayizi nzibapa chakuliyandila kung’anda yaLeza wabo iili muJerusalema. 17 Chakufwambaana, weelede kubelesya mali eeyi kuula bapule bang’ombe, bagutu, bana bambelele aamwi azipo zyabo zyazilyo azipo zyabo zinywigwa, weelede kuzitenta aachipayililo chang’anda yaLeza wako iili muJerusalema.
18 “Kufumbwa nzuyanda kuchita, iwe abapayizinyokwe, mulakonzya kubelesya nsiliva yoonse angolida yasyaala, kweendelana akuyanda kwaLeza wanu. 19 Zibelesyo zyoonse nzwaapegwa zyamulimu wang’anda yaLeza wako, weelede kuzitola kunembo lyaLeza kuJerusalema. 20 Azimwi zintu zyoonse ziyandikana zyang’anda yaLeza wako nzweelede kupa, uyoozipa kazizwa muchibikkilo chamwaami.
21 “Ime ndiMwaami Aritasasita, ndalayilila basikubamba zibikkilo zyamubwaami boonse bali muchilawu chili Mutala aaMulonga* kuti zintu zyoonse Ezra mupayizi kumwi kali mulembi* waMulawu waLeza wakujulu nzyaamukumbila mumuchitile chakufwambaana, 22 kusika kumatalenta* aansiliva aali 100, makkore* aawiiti aali 100, mabbati* aawayini aali 100, mabbati aamafuta aali 100, amunyo mwiingi loko. 23 Zintu zyoonse Leza wakujulu nzyaakalayilila azichitwe chabusungu kung’anda yaLeza wakujulu, kuchitila kuti bukali bwaLeza butasikili bantu bali mubweendelezi bwamwaami abana bakwe. 24 Mukuyungizya, mwalayililwa kuti bapayizi, maLevi, bayimbi, balindi bamilyango, babelesi baatempele* ababelesi bang’anda yaLeza eeyi mutababbadalisyi mitelo, batamupi zipo nikuba kubabbadalisya mutelo wamumugwagwa.
25 “Anduwe Ezra, kweendelana abusongo mbulaabo kuzwa kuli Leza wako,* sala basinkuta ababetesi kuti babeteke bantu boonse bali muchilawu chili Mutala aaMulonga, bantu boonse bazi milawu yaLeza wako; mpawo aabo batayizi mubayiisye. 26 Kufumbwa muntu uutatobeli Mulawu waLeza wako amulawu waMwaami, weelede kubetekwa mpawaawo, mpawo apegwe chisubulo kazitakwe ndaba kuti nchalufu, nkutandwa, nkubbadalisigwa naakuti nkubikkwa mujele.”
27 Atembawulwe Jehova Leza wamasianene, ooyo wakabikka muzeezo ooyu mumoyo wamwaami kuti abotye ng’anda yaJehova iili muJerusalema. 28 Alubo wanditondeezya luyando lutamani kunembo lyamwaami abasikumupa lulayo akuli basilutwe bamwaami boonse bali aamanguzu. Nkinkaako, ndakaba aachibindi* nkaambo kuboko kwaJehova Leza wangu kwakali aalindime mpawo ndakabunganizya bazulwidi* kuzwa aakati kama-Israyeli kuti bayinke aandime.