Baami Wakusaanguna
2 Davida naakaba aafwiifwi kufwa, wakapa mwaanakwe Solomoni malayilile aaya aakuti: 2 “Ndaamba kufwa.* Nkinkaako, sima ube aachibindi mbuli mwaalumi. 3 Weelede kuswiilila Jehova Leza wako kwiinda mukweenda munzila zyakwe akuswiilila malayilile aakwe, milawu yakwe, mbeta zyakwe, aziyeezyo zyakwe mbuli mbukulembedwe muMulawu waMozesi. Kuti wachita oobo, unoozwidilila* muzintu zyoonse nzuchita kufumbwa nkuya. 4 Mpawo Jehova uzoozuzikizya chisyomezyo chakwe nchaakaamba atala andime naakati: ‘Kuti bana bako bakkala kabatobela nzila zyangu kwiinda mukweenda kabasyomeka kunembo lyangu amoyo wabo woonse abuumi bwabo boonse, takuzoobuliki muntu pe uuzwa mubana bako uutazookkale aachuuno chabwaami cha-Israyeli.’
5 “Alubo uzizi kabotu loko nzyaakandichitila Jowabbu mwana waZeruya, anzyaakachita basilutwe babili bamasooja aa-Israyeli, nkukwaamba Abbineri mwana waNeri a-Amasa mwana waJetere. Wakabajaya, watila ganzi lyankondo muchiindi chaluumuno, alubo wakabikka ganzi lyankondo aabbanti lyamuchibuno chakwe aamanyatela aakali kumawulu aakwe. 6 Weelede kuchita kweendelana abusongo bwako alubo utazoolekeli kuti mvwi zyakwe zyiinke muKabanda* muluumuno.
7 “Pesi bana baBbazilayi muGiliyadi, weelede kubatondeezya luyando lutamani alubo beelede kuba aakati kabaabo balida aatebbulu lyako, nkaambo bakandigwasya chiindi nindakali kuchija mukulanaako Abbisalomu.
8 “Alubo aafwiifwi anduwe kukkede Shimeyi mwana waGera wamusyobo waBbenjamini wakuBbahurimu. Nguwe wakandituka aalutuko luchisa loko mubuzuba nindakali kuya kuMahanayimu. Pesi naakakunuka kuti azoonditambule kuJodani, ndakakonka kulinguwe kwiinda muli Jehova kanditi: ‘Tandizookujayi pe apanga.’ 9 Utamusiyi kupela pe kutamupede chisubulo, nkaambo uli musongo, alubo ulizizi nzweelede kumuchita. Weelede kumutola muKabanda* mvwi zyakwe kazili aaganzi.”
10 Mpawo Davida wakalazikwaamwi amasianyinakulu alubo wakazikkwa muMuunzi waDavida. 11 Davida wakeendelezya Israyeli kwaminyaka iili 40. MuHebburoni wakeendelezya kwaminyaka iili 7, alubo muJerusalema wakeendelezya kwaminyaka iili 33.
12 Mpawo Solomoni wakakkala aachuuno chabwaami chaDavida wisi, alubo bwaami bwakwe bwakali kuyabusima loko.
13 Mukuya kwachiindi, Adonija mwana waHagiti wakasika kuli Bbati-shebba, banyina baSolomoni. Bbati-shebba wakamubuzya kuti: “Waza muluumuno na?” Wakati: “Iiyi ndaza muluumuno.” 14 Mpawo wakati: “Kuli makani ngindiyanda kumubuzya.” Bbati-shebba wakati: “Amba.” 15 Wakati: “Muzizi loko kuti bwaami bwakeelede kuba bwangu alubo ma-Israyeli boonse bakali kulangilila ndime kuti ndibe mwaami. Pesi bwaami bwakandiinda bwaba bwamwanikaangu, nkaambo Jehova nguwe wakapa kuti bube bwakwe. 16 Pesi lino kuli chintu chimwi nchindiyanda kukumbila kulindinywe. Mutandikakili pe.” Mpawo Bbati-shebba wakasandula kuti: “Amba.” 17 Wakati: “Ikaka, ndikumbila kuti mundikumbilile kumwaami Solomoni—nkaambo takoomukakila pe—kuti andipe Abbishagi muShunemu kuti abe mwanakazi wangu.” 18 Naakamvwa oobo, Bbati-shebba wakati: “Nchibotu! Ndilakukumbilila kumwaami.”
19 Nkinkaako, Bbati-shebba wakanjila mwakali Mwaami Solomoni kuti akamubuzye makani aa-Adonija. Mbaakababona biyo banyina, mwaami wakanyampuka kuti akabatambule mpawo wakabakotamina. Wakakkala aachuuno chakwe chabwaami alubo wakalayilila kuti kubikkwe chuuno chabwaami chabanyina bamwaami, kuchitila kuti bakkale kubbazu lyakwe lyakuchilisyo. 20 Mpawo bakati: “Kuli chintu chimwi biyo nchindiyanda kukumbila kulinduwe. Utandikakili pe.” Nkinkaako, mwaami wakati kuli banyina: “Amwaambe baama. Tandikoomukakila pe.” 21 Bakati: “Zumizya kuti Abbishagi muShunemu apegwe Adonija mukulanaako kuti abe mwanakazi wakwe.” 22 Naakamvwa oobo, Mwaami Solomoni wakasandula banyina kuti: “Nkamboonzi nimulikukumbila Abbishagi muShunemu kuti apegwe Adonija? Amumukumbilile ambubo bwaami, nkaambo mukulanaangu, alubo bali kubbazu lyakwe ngu-Abbiyata mupayizi aJowabbu mwana waZeruya.”
23 Mpawo Mwaami Solomoni wakakonka kwiinda muli Jehova kati: “Leza andipe chisubulo chipati kuti Adonija taasweekelwa aabuumi bwakwe akaambo kazeezi nzyaakumbila. 24 AJehova muumi, ooyo wakandisimya akundizyatika aachuuno chabwaami chaDavida ndeende, ooyo wakandiyakila ng’anda mbuli mbaakasyomezya, Adonija ulajayigwa sunu.” 25 Aachiindi nchicheecho, Mwaami Solomoni wakatuma Bbenaya mwana waJehoyiyada, ooyo wakayinka waakuyasa Adonija mpawo wafwa.
26 Kuli Abbiyata mupayizi, mwaami wakati: “Kuya kumuunzi wako ku-Anatoti! Weelede kufwa, pesi sunu tandikookujaya pe, nkaambo wakabweza Bbokesi lyaMwaami Singuzuzyoonse Jehova kunembo lyaDavida ndeende, akuti wakafwabaamwi andeende mumapenzi aakwe woonse.” 27 Nkinkaako, Solomoni wakatanda Abbiyata kuti aleke kubeleka kali mupayizi waJehova, kuti kuzuzikizigwe jwi lyaJehova ndyakaamba atala ang’anda ya-Eli kuShilo.
28 Jowabbu naakamvwa mulumbe ooyu—nkaambo Jowabbu wakali kubbazu lya-Adonija, pesi taakwe naakaba kubbazu lya-Abbisalomu pe—Jowabbu wakachijila kutente lyaJehova waakujata meja aachipayililo. 29 Mpawo Mwaami Solomoni wakabuzigwa kuti: “Jowabbu wachijila kutente lyaJehova, nkwali nkukooko, kumbali aachipayililo.” Mpawo Solomoni wakatuma Bbenaya mwana waJehoyiyada kati: “Yinka ukamujaye!” 30 Nkinkaako, Bbenaya wakaya kutente lyaJehova mpawo wakati kulinguwe: “Mwaami waamba kuti, ‘Zwaawo!’” Pesi Jowabbu wakasandula kuti: “Peepe! Ndilafwida mpawaano.” Bbenaya wakabweedezya mulumbe kumwaami, wakati: “Mbuboobu mbaamba Jowabbu, mbuboobu mbaandisandula.” 31 Mpawo Mwaami wakati kulinguwe: “Chita mbuli mbaamba, mujaye umuvwikke kuchitila kuti ugwisye ganzi litakwe mulandu aalindime akuli bamung’anda yandeende eelyo Jowabbu ndyaakatila. 32 Jehova uzooboozya ganzi lyakwe aamutwe wakwe, nkaambo wakajaya baalumi babili apanga, ndeende Davida katazizi pe. Baalumi aabo bakaliluleme alubo bakali kabotu kwiinda nguwe: nkukwaamba Abbineri mwana waNeri silutwe wamasooja aa-Israyeli, a-Amasa mwana waJetere, silutwe wamasooja aaJuda. 33 Ganzi lyabo lizooboola aamutwe waJowabbu alubo aamitwe yabana bakwe kukabe kutamani. Pesi kuli Davida, kubana bakwe, kung’anda yakwe akuchuuno chakwe chabwaami, akube luumuno luzwa kuli Jehova kukabe kutamani.” 34 Mpawo Bbenaya mwana waJehoyiyada wakatanta waakuyasa Jowabbu wamujaya, mpawo wakazikkwa kung’anda yakwe munkanda. 35 Mpawo mwaami wakabikka Bbenaya mwana waJehoyiyada kuba mupati wamasooja mundawu yaJowabbu, alubo mwaami wakabikka Zadokki mupayizi mundawu ya-Abbiyata.
36 Mpawo mwaami wakayita Shimeyi wamubuzya kuti: “Liyakile ng’anda muJerusalema, ukkale oomuno. Utazoozwi pe kuti uye kuliimwi ndawu. 37 Mubuzuba mbutazoozwe akuzubuka Kkuti lyaKkidroni,* ziba kuti ulifwide. Ganzi lyako lizooba aamutwe wako.” 38 Shimeyi wakavwiila mwaami kuti: “Nzwaamba zilikabotu. Ime ndimubelesi wako ndilachita mbuli mbaamba mwaami.” Nkinkaako, Shimeyi wakakkala muJerusalema kwamazuba miingi.
39 Pesi kumamanino aaminyaka iitatu, bazike baShimeyi babili, bakachijila kuli Akkishi mwana waMaakka mwaami wakuGati. Shimeyi naakabuzigwa kuti: “Bazike bako bali kuGati,” 40 Shimeyi wakatanta aadonki lyakwe mpawaawo, weenda kuti akabone Akkishi kuGati kuchitila kuti akayanduule bazike bakwe. Shimeyi naakaboola kuzwa kuGati kali aabazike bakwe, 41 Solomoni wakabuzigwa kuti: “Shimeyi wakali wazwa muJerusalema waya kuGati mpawo lino waboola.” 42 Naakamvwa oobo, mwaami wakayita Shimeyi wamubuzya kuti: “Teendakapa kuti ukonke na kwiinda muli Jehova akukuchenjezya kuti: ‘Mubuzuba mbutazoozwe oomuno akuya kuliimwi nyika, uzibe kuti ulifwide’? Teenduwe na nwaakandisandula kuti, ‘Nzwaamba zilikabotu, ndilaziswiilila’? 43 Nkamboonzi nwaatakabamba chikonke chaJehova akuleka kuswiilila mulawu ngundakakubikkila?” 44 Mpawo mwaami wakabuzya Shimeyi kuti: “Ubuzi loko mumoyo wako bubi boonse mbwaakachitila Davida ndeende, Jehova ulaboozya bubi oobo aamutwe wako. 45 Pesi Mwaami Solomoni uzoolongezegwa,* achuuno chabwaami chaDavida chizoozyatikwa kunembo lyaJehova kukabe kutamani.” 46 Kuzwa waawo, mwaami wakalayilila Bbenaya mwana waJehoyiyada, mpawo wakayinka waakumuyasa wafwa.
Nkinkaako, bwaami bwakasima loko mukuboko kwaSolomoni.