Baami Wakusaanguna
3 Solomoni wakapangana chizuminano chalukwatano aFaro mwaami wa-Ijipita. Wakakwata* mwana waFaro wamweeta muMuunzi waDavida kusikila naakamaninsya kuyaka ng’anda yakwe ang’anda yaJehova amuduli uuzyunguluka Jerusalema. 2 Pesi bantu bakachili kupa zipayizyo mundawu zyakukombela,* nkaambo kusika aachiindi eecho, ng’anda yiitwa aazina lyaJehova teeyakalinayakwa pe. 3 Solomoni wakayinkilila kunembo kuyanda Jehova kwiinda mukweenda munzila zyaDavida wisi, pesi wakachili kupa zipayizyo akupa kuti zipo zyuuntumuke busi mundawu zyakukombela.*
4 Mwaami wakayinka kuGibbiyoni kuti akape zipayizyo nkukooko, nkaambo ndawu eeyo yakukombela* njiyo yakazibinkene loko.* Solomoni wakapa zipo zitentwa zili 1 000 aachipayililo eecho. 5 Jehova wakalibonia kuli Solomoni mansiku muchilengaano kuGibbiyoni, mpawo Leza wakati: “Kumbila kufumbwa nchuyanda kuti ndikupe.” 6 Mpawo Solomoni wakati: “Wakatondeezya luyando lutamani lupati kumubelesi wako Davida ndeende naakali kweenda kunembo lyako kasyomeka, kaluleme, alubo katakwe bubi mumoyo wakwe. Wakayinkilila kunembo kumutondeezya luyando oolu lutamani lupati kusika sunu kwiinda mukumupa mwana mulombe kuti akkale aachuuno chakwe chabwaami. 7 O Jehova Leza wangu, lino wandibikka ime ndimubelesi wako kuti ndibe mwaami aandawu yaDavida ndeende nikuba kuti ndichili muniini* akuti tandikwe luzibo pe.* 8 Ime ndimubelesi wako ndili aakati kabantu bako mbwaakasala, bantu biingi loko zyakuti tababaliki pe. 9 Nkinkaako, ndipe moyo uuswiilila ime ndimubelesi wako, kuchitila kuti ndibeteke bantu bako akuti ndimvwisisisye chibotu achibi, nkaambo ngwani uukonzya kubeteka bantu bako aaba biingi* oobu?”
10 Jehova wakabotelwa akaambo kachintu eechi nchaakakumbila Solomoni. 11 Mpawo Leza wakamubuzya kuti: “Akaambo kakuti wakumbila chintu eechi, taakwe nwaakumbila kuti woongole* naakuti kukumbila bunoti naakuti kukumbila kufwa kwabasinkondonyokwe, pesi wakumbila kumvwisisisya kuti ubeteke kabotu, 12 ndilachita nzwaakumbila. Ndilakupa moyo wabusongo awakumvwisisisya zyakuti takuzoobi uumbi uuli mbuli nduwe mbuli mbukwakatalikwe uumbi uuli mbuli nduwe musule. 13 Mukuyungizya, ndilakupa anzwaatakumbila, nkukwaamba bunoti abulemu, zyakuti takuzoobi uumbi mwaami uunooli mbuli nduwe mubuumi bwako.* 14 Alubo kuti weenda munzila zyangu kwiinda mukubamba malayilile aangu amilawu yangu mbuli mbaakeenda Davida wuso, ndizoopa kuti woongole.”*
15 Solomoni naakabuka kung’onzi, wakabona kuti wakali wabona chilengaano. Mpawo wakaya kuJerusalema waakwiimikila kunembo lyabbokesi lyachizuminano chaJehova alubo wakapa zipayizyo zitentwa azipo zyalumvwanano akuchitila babelesi bakwe boonse pobwe.
16 Aachiindi eecho, banakazi babili mawuule bakasika kumwaami bayimikila kunembo lyakwe. 17 Mwanakazi wakusaanguna wakati: “Ikaka simalelaangu, ime amwanakazi ooyu tukkala mung’anda iimwi, alubo ndakatumbuka kalimo mung’anda. 18 Mubuzuba bwachitatu kuzwa nindakatumbuka, mwanakazi ooyu anguwe wakatumbuka. Twakalaamwi, katuli babili kupela. Taakwe uumbi muntu pe ngutwakalaawe mung’anda. 19 Mwana wamwanakazi ooyu wakafwa mansiku, nkaambo wakamulimba. 20 Nkinkaako, wakabuka aakati kabo wabweza mwanaangu wakali kumbali lyangu nindakali koona ndimuzike wako, wamulazika mumaboko aakwe,* mpawo wakabweza mwanaakwe uufwide wamulazika mumaboko aangu. 21 Nindabuka kuseeni kuti ndinyonsye mwanaangu, ndajana kuti ulifwide. Nkinkaako, ndamulangisisya kuseeni mpawo ndabona kuti teengunguwe pe ngundakazyala.” 22 Pesi umwi mwanakazi wakati: “Peepe, wangu mwana muumbulu, wako nguwe wafwa!” Pesi mwanakazi wakusaanguna wakali kuti: “Peepe, wako mwana ngooyu uufwide, pesi wangu muumbulu.” Mbuboobu mbubakali kukazyania kunembo lyamwaami.
23 Kumamanino, mwaami wakati: “Ooyu ulikwaamba kuti, ‘Wangu mwana ngooyu muumbulu, wako ngooyu uufwide!’ ayooyu ulikuti, ‘Peepe, wako mwana ngooyu uufwide, wangu ngooyu muumbulu!’” 24 Mwaami wakati: “Amundeetele panga.” Nkinkaako, bakamweetela panga mwaami. 25 Mpawo mwaami wakati: “Amunenge mwana muumi abe muzipanzi zibili, chimwi chipanzi muchipe umwi mwanakazi mpawo chimwi chipanzi muchipe umwi.” 26 Aachiindi nchicheecho, mwanakazi wakali aamwana muumbulu wakakombelezya mwaami, nkaambo wakafweluka mwida akaambo kamwanaakwe. Wakati: “Ikaka simalelaangu! Amumupe biyo mwana ooyu muumbulu! Mutamujayi pe kaka!” Pesi umwi mwanakazi wakali kwaamba kuti: “Takooba wangu pe nikuba kuba wako! Leka bamunenge abe muzipanzi zibili!” 27 Mpawo mwaami wakati: “Mwana muumbulu amumupe mwanakazi wakusaanguna! Mutamujayi pe, nkaambo aaba mbiibanyina.”
28 Nkinkaako, ma-Israyeli boonse bakamvwa atala akubeteka mwaami nkwaakachita alubo bakamulemeka* loko mwaami, nkaambo bakabona kuti Leza wakamupa busongo bwakuti abeteke munzila iiluleme.