Baami Wachibili
6 Bana babapolofita bakati kuli Elisha: “Bona! Ndawu eeyi njitukkedaamwi anduwe yacheya loko. 2 Tukumbila kuya kuJodani tukagonke zisamu mpawo tukayake nkukooko.” Wakati: “Amwiinke.” 3 Umwi wabo wakati: “Ulayinkaamwi na andiswe tubabelesi bako?” Wakati: “Iiyi, tulayinkaamwi.” 4 Nkinkaako, wakayinkaamwi ambabo, mpawo bakaakusika kuJodani basaanguna kugonka zisamu. 5 Umwi wabo naakali kugonka musamu, kaleba* kakasomoka mumwiini kawida mumaanzi, mpawo wakayita kati: “Ikaka simalelaangu, ndakakabolekwa biya!” 6 Muntu waLeza wakasimpe wakati: “Kawidaali?” Wakamutondeezya mpukakawida. Mpawo wakagonka kasamu wakawaalila mpukakawida, mpawo kaleba* kakayibuka. 7 Wakati: “Kabweze.” Nkinkaako, wakakasompokela wakabweza.
8 Mwaami waSiriya wakayinka kuti akalwane aa-Israyeli. Wakabuzya makani kubabelesi bakwe, mpawo wakati: “Ndilayinka aandinywe tukakkempe kundawu iiliboobu.” 9 Mpawo muntu waLeza wakasimpe wakatumizya jwi kumwaami wa-Israyeli kati: “Chenjelela kuti, utayindi aandawu eeyi pe, nkaambo maSiriya balikukunukila nkukooko.” 10 Nkinkaako, mwaami wa-Israyeli wakatumizya jwi kundawu ooko muntu waLeza wakasimpe nkwaakali wamuchenjezya kuti atayindi pe. Wakaliswini kumuchenjezya alubo mwaami taakayinka pe kundawu eeyo. Eezi zyakachitika kwaziindi zyiingi.*
11 Eezi zyakamunyemya mwaami waSiriya, nkinkaako, wakayita babelesi bakwe wababuzya kuti: “Amundibuzye! Ngwani aakati kesu uuli kubbazu lyamwaami wa-Israyeli?” 12 Umwi mubelesi wakwe wakati: “Taakwe pe, mwaami simalelaangu! Elisha mupolofita wamu-Israyeli nguwe uulikubuzya mwaami wa-Israyeli zintu nzwaamba mung’anda yako yakoona.” 13 Wakati: “Amwiinke mukayanduule nkwabede, kuchitila kuti nditume bantu bakamujate.” Mukuya kwachiindi, wakabuzigwa kuti: “Uli muDotani.” 14 Aachiindi nchicheecho, wakatuma mabbiza angolo zyankondo nkukooko kuswaanizya ankamu mpati yamasooja. Bakayinka mansiku baakuzyunguluka muunzi.
15 Mubelesi wamuntu waLeza wakasimpe wakafuma kuseeni wazwa aanze, mpawo wakabona nkamu yamasooja kayili aamabbiza angolo zyankondo kayizyungulukide muunzi. Mubelesi wakati kulinguwe: “Simalelaangu! Tulachita biyeni?” 16 Pesi wakati: “Utayoowi pe! Nkaambo aabo mbitulaabo mbiingi kwiinda aabo mbibalaabo.” 17 Mpawo Elisha wakasaanguna kukomba kati: “O Jehova, ikaka jula meso aakwe kuchitila kuti abone.” Aachiindi nchicheecho, Jehova wakajula meso aamubelesi, mpawo wakabona chilundu kachizwide mabbiza angolo zyankondo zyamulilo kazizyungulukide Elisha mumabazu woonse.
18 MaSiriya nibakakunuka kabaza kulinguwe, Elisha wakakomba kuli Jehova kati: “Ikaka, wofwaazya bantu aaba.” Nkinkaako, wakabawofwaazya mbuli Elisha mbaakakumbila. 19 Elisha wakati kulimbabo: “Eeyi teenjiyo pe nzila, alubo ooyu teenguwo pe muunzi. Amunditobele ndimutole kumuntu ngumuli kuyanduula.” Nikuba oobo, wakabatola kuSamariya.
20 Nibakasika muSamariya, Elisha wakati: “O Jehova, jula meso aabo kuchitila kuti babone.” Nkinkaako, Jehova wakajula meso aabo, mpawo bakabona kuti bakali aakati kaSamariya. 21 Mwaami wa-Israyeli naakababona, wakati kuli Elisha: “Ndeende ndibajaye na, ndibajaye na?” 22 Pesi wakati: “Utabajayi pe. Kuti wajata bantu munkondo ulabajaya na? Bape chakulya amaanzi kuti balye akunywa mpawo babweede kuli simalelaabo.” 23 Nkinkaako, wakabachitila pobwe pati mpawo bakalya akunywa. Nibakamaninsya, wakababuzya kuti babweede kuli simalelaabo. Zigwebenga zyakuSiriya, eezyo zyakali kunyanga bantu zintu teezyakazooboola lubo pe munyika ya-Israyeli.
24 Nikwakayinda chiindi, Bbeni-hadadi mwaami waSiriya wakabunganizya nkamu yakwe yoonse yamasooja mpawo wakayinka waakusinkila Samariya. 25 Nkinkaako, mwakaba nzala mpati muSamariya, alubo bakayisinkila kusikila mutwe wadonki wasaanguna kuulwa aansiliva zili 80, alubo chipanzi chimwi aakati kazipanzi zine zyakkaabbu* yamafumba aanziba, chakali chasaanguna kuulwa aansiliva zili 5. 26 Mwaami wa-Israyeli naakali kwiinda aamuduli, umwi mwanakazi wakamukwiilila kati: “Tugwasye, O mwaami simalelaangu!” 27 Mpawo wakati: “Kuti Jehova taakugwasya, ime ndilazijana kuli zintu zyakuti ndikupe? Kulubuwa lwakupolela na? Naakuti kuchikandilo chawayini naakuti chamafuta?” 28 Mwaami wakazoobuzya kuti: “Niinzi chilikukukataazya?” Mwanakazi ooyo wakasandula kuti: “Mwanakazi ooyu wakati kulindime, ‘Yeta mwanaako tumulye sunu, mpawo juunza tuzoolya mwanaangu.’ 29 Nkinkaako, twakajika mwanaangu twamulya. Mubuzuba bwakatobela ndakati kulinguwe, ‘Yeta mwanaako tumulye.’ Pesi wakamusisa mwanaakwe.”
30 Mwaami mbaakaamvwa biyo majwi aamwanakazi ooyu, wakadelula zigogo zyakwe. Naakayinda kumbali aamuduli, bantu bakabona kuti wakazweete zigogo zyamasaka kunsi aazigogo zyakwe. 31 Mpawo wakati: “Leza andipe chisubulo chipati kuti Elisha mwana waShafati taadyunkulwa mutwe sunu!”
32 Elisha wakalikkede mung’anda yakwe alubo baalu bakakkedaamwi anguwe. Mwaami wakatuma muntu kunembo lyakwe, pesi mutumwa katanasika, Elisha wakati kubaalu: “Mwamubona na mwana wamujayi kuti watuma muntu kuti azoondidyunkule mutwe? Amulangilizye, mutumwa naasika mujale mulyango mpawo mutyaminine kkoma kuchitila kuti atanjili pe. Muluumvwide na musindo* wamawulu aasimalelaakwe uulikumvwika musulaakwe?” 33 Naakachili kwaambuula aambabo, mutumwa wakasika kulinguwe, mpawo mwaami wakati: “Penzi eeli lyazwa kuli Jehova. Ani ndichimulindilaanzi biya Jehova?”